Babilon dim labaar
50
1 Labaar la nwa ka Zugsɔb la pian' dɔlis Jeremia onɛ an Wina'am nɔdi'es la ni Babilon dim nɛ Babilon teŋgbauŋ la yɛla:2 “Mɔɔlimi li tɛɛns la sʋʋgin,
ʋkim tuuta la agɔla mɔɔli li;
da basi si'ela amaa yɛlimi li wʋsa ye,
‘Ba na nyaŋ Babilon;
ka diis ba'ar Bel nyan,
ka dabiem na kpɛn' ba'ar Marduk.
Banɛ ka ba ya'abi zi'el la na di nyan
ka dabiem kpɛn' bada nɛ wina la wʋsa.’
3 Sʋ'ʋlim na yi ya-datiuŋ na zab nɛ o
ka san'ami o teŋ la bas.
Sɔ' kʋ lɛn bɛɛ ani,
nidib nɛ bʋnkɔnbid wʋsa na zɔɔ lalig.
4 Li saŋa nɛ li dabisa ya'a paae,
Israel dim nɛ Juda dim na la'as taaba
ba na kummi ieedi ba Zugsɔb Wina'am la,”
Zugsɔb la yɛl si'em la.
5 Ba na bu'osid Zion suor
ka fɛndigi ba nindaasi kpa'adi ani.
Ba na kena zaŋi ba mɛŋi naal nɛ Zugsɔb la
li na anɛ nɔnaar linɛ ka' naarɛ
ka ba kʋ tami li yɛlaa.
6 M nidib la da nwɛnɛ pɛ'ɛs banɛ bɔdig;
banɛ kemi ba la kɛ ka ba bɔdig
ka bɛ zuoya la ni gɔɔnd.
Ba bɛ nɛ zuoya nɛ kukuosinɛ giilim
ka tami ba mɛŋ vʋ'ʋsʋm zin'ig.
7 Onɛ wʋsa nyɛɛ ba, kʋʋdi ba nɛ;
ba dataas la da yɛl ye, Tinam pʋ tʋm taalɛ,
banɛ tʋm bɛ'ɛdi pɔ'ɔgi ba Zugsɔb onɛ aan ba kɔnbkem amɛŋa la,
onɛ ka ba yaanam da mɔr ti'ir la kɛ ka li aan ala.
8 “Zɔm yii Babilon;
basimi Babilon dim teŋ la,
ka nwɛnɛ bʋʋs banɛ gaadi ba taaba tuonnɛ.
9 M na kɛ ka buudbɛda banɛ bɛ ya-datiuŋ la la'as taaba,
m na kɛ ka ba la'as taaba zab nɛ Babilon.
Ba na zi'enɛ ba zi'esa ni zab nɛ o,
anina ka ba na gban'e o.
Ba piema la na nwɛnɛ zabzabidib banɛ mi' zaba hali
ka yit ka pʋ lɛbid zaalim.
10 Ala ka ba na nyaŋ Babilon dim;
banɛ zabid nɛ Babilon la na faaɛn ban bɔɔd si'el.”
Zugsɔb la yɛl si'em la.
11 Fʋ sʋnfʋ ma'ae ka fʋ maan sumalisim,
fʋn kanɛ faandi m nidib la;
fʋ ian'adi nwɛnɛ na'asa'a bʋ'ʋd ki
ka kaasid wʋʋ wieddaad nɛ.
12 Nyan tita'ar na dii fʋ ma;
onɛ du'af la na di nyan hali.
Babilon na pɔɔd tɛɛns wʋsa sʋʋgin,
li na anɛ sian'atita'ar,
ka an pipiris nɛ zin'ikanɛ ka ku'om kae.
13 Zugsɔb la sʋnpɛɛn zugɔ, nidib kʋ bɛ ani
amaa li na bɛ nɛ li kɔn'ɔkɔn'.
Banɛ wʋsa dɔl Babilon n gat
li na paki ba ka ba kɛɛnd o,
san'auŋ kanɛ paae o la yɛla.
14 Maalim zi'enɛ giligi Babilon,
yanam banɛ mi' tiraad tɔɔnb la wʋsa.
Tɔɔnmi nɛ o! Da kɛ ka piim kpɛlim,
ka o tʋm tʋʋmbɛ'ɛdi pɔ'ɔg Zugsɔb la.
15 Kaasimi kuŋ zin'ig wʋsa gilig o!
O siakya, o dɔɔd banɛ wa'am hali la liya,
o zaŋguom la aaɛn li.
Nɛ'ɛŋa sadigim an Zugsɔb sam yɔɔb la,
yɔɔmi sam la;
niŋimi nɛ o wʋʋ on niŋ bam si'em la.
16 Da kɛ ka ba lɛm bʋd Babilon teŋin
bɛɛ ba nɔk gɔn'ɔgʋ bunɛ.
Dataa kanɛ kʋʋd la zug
kɛl ka sɔ' wʋsa lɛb o mɛŋ nidibin,
kɛl ka sɔ' wʋsa zɔɔ lɛb o mɛŋ teŋin.
17 “Israel dim nwɛnɛ kɔnbid banɛ
ka gbigima kadi ba ka ba widig.
Onɛ dɛŋi gban'e ba yiiga
da anɛ Asiria na'ab.
Ka Babilon na'ab Nebukadnɛza
ba'asi kɔɔ ba kɔnba naae la.”
18 Dinzugɔ, Zugsɔb onɛ an Paŋtita'ar Sɔb ka an Israel Wina'am la yɛl si'eli nwa ye:
“M na namis Babilon na'ab nɛ o teŋ la wʋsa
wʋʋ man daa namisi Asiria na'ab si'em la.
19 Amaa m na mɔr Israel banɛ nwɛnɛ kɔnbid la
lɛbi ba mɛŋ teŋin na,
ka ba na ɔnbid yaama Kaamel nɛ Basan zuoya la ni;
Efiram nɛ Gilead zuoya la ni
ka ba na di linɛ malisi ba tig.”
20 Dabisban la ni nɛ saŋkan la,
Zugsɔb la yɛl si'em la,
“ba na ieed Israel gbɛlʋŋ
amaa ka kʋ nyɛ si'ela,
ba mɛ na ieed Juda dim tʋʋmbɛ'ɛd
amaa ka kʋ nyɛ si'ela,
bɔzugɔ banɛ kpɛlim bi'ela la
m na kɛɛ ba tʋʋmbɛ'ɛdi bas.
21 Kem zabi nɛ Meratam teŋ la
nɛ banɛ bɛ Pekod la.
Kadiminɛ ba kʋʋ ba ka san'ami ba nyain!”
Zugsɔb la yɛl si'em la.
“Maalim si'el wʋsa wʋʋ man yɛlif si'em la.
22 Zaba vuud bɛ teŋin la,
vuud la anɛ san'auŋ tita'ar!
23 Babilon da nwɛnɛ hamma nɛ
nwɛ'ɛd tɛɛns sʋ'ʋlim bu'asid,
amaa gɔsim on dig o kɔn'ɔkɔn'
tɛɛns la sʋʋgin si'em!
24 Babilon teŋa, m bɛndif nɛ baŋ,
baŋ la gban'af nɛ ka fʋ naan baŋi li.
Ba daa nyɛɛf ka gban'af
bɔzugɔ fʋ zan'as Zugsɔb la nɔɔr.
25 Zugsɔb la yɔ'ɔg o zaba la'ad suak zin'ig la
ka yis o sʋnpɛɛn zaba la'ad la na.
Zugsɔb onɛ an Paŋtita'ar Sɔb la mɔr tʋʋma
na tʋmi li Babilon teŋin.
26 Yimi lalli kena zab nɛ o.
Yɔ'ɔgim o bʋya la;
la'asimi ba wʋʋ ki nɛ.
San'ami ba wʋsa nyain
ka da kɛ ka sɔ' kpɛlim.
27 Kʋʋm o na'aribpaalis la wʋsa;
mɔri ba keŋ kʋʋb zin'igin!
Tɔɔg na paae ba! Bɔzugɔ ba dabisir paae ya,
ba namisʋg la saŋa paae ya.
28 Kɛlisim zɔɔma banɛ yi Babilon
n kul Zion na la yɛt si'em ye,
‘Gɔsimi ti Zugsɔb Wina'am la yɔ sam si'em!
O sid yɔ o Pʋ'ʋsim Yir la sam.’
29 La'asim tɔn'ɔsnam na ka ba zab nɛ Babilon,
banɛ tɔɔnd tiraad la wʋsa!
La'asim giligi teŋ la;
da kɛ ka sɔ' zɔɔ pɔnsɛ!
Yɔɔm o sam on maal si'el la;
niŋim o wʋʋ on niŋ si'em la.
Bɔzugɔ o mak o mɛŋ nɛ Zugsɔb la,
Israel dim Wina'am Onɛ An Kasi la.
30 Dinzugɔ, na'akim la na kpi suoraadin;
daakan la, soogianam la wʋsa na an baanlimm.”
Zugsɔb la yɛl si'em la.
31 “Gɔsima, fʋn kanɛ an nyɛɛsim sɔba, m duoe zi'enɛ fʋ yɛla.”
Zugsɔb onɛ an Paŋtita'ar Sɔb la yɛl si'em la.
O yɛl ye, “Fʋ daar paae ya,
fʋ namisʋg la saŋa paae ya.
32 Nyɛɛsim sɔb la na tu'ugi li
ka sɔ' kae na sʋŋ o ka o duoe.
M na nyu'oe fʋ tempʋʋs la wʋsa nɛ bugum
ka li na kanb banɛ wʋsa bɛɛ o san'an la.”
33 Zugsɔb onɛ an Paŋtita'ar Sɔb la yɛl si'eli nwa ye,
“Israel nidib la nyɛ mugusʋg,
ban nɛ Juda nidib la wʋsa.
Banɛ gban'e ba la wʋsa mɔri ba nɛ kiŋ-kiŋ,
ka zan'as ye ba kʋ kɛ ka ba keŋɛ.
34 La'am nɛ wala ba Faangid la mɔr paŋ;
o yʋ'ʋri buon Zugsɔb Paŋtita'ar Sɔb.
O na zi'enɛ zabi ba yɛla
ka mɔr vʋ'ʋsʋm kɛɛn ba teŋin la na,
amaa banɛ bɛ Babilon la kʋ nyɛ vʋ'ʋsʋm.
35 Ba na zab nɛ Babilon dim!”
Zugsɔb la yɛl si'em la.
“Ba na zab nɛ banɛ bɛ Babilon teŋin la
ka zab nɛ ba kpɛɛmnam nɛ banɛ an ya'am dim la!
36 Ba na zab nɛ ziri nɔdi'esidib la!
Ba na lieb zɔn.
Ba na zab nɛ zabzabidib la!
Dabiem na kpɛn' ba.
37 Ba na zab nɛ ba widi nɛ zaba tɛrekonam la
nɛ saam banɛ zabidi sʋŋidi ba la wʋsa!
Ba na lieb wʋʋ pu'ab nɛ.
Ba na zab nɛ ba,
ka faaɛn ba kpan'am la mɔri keŋ.
38 Sawak na li teŋ la zug
ka kɔldaad la wʋsa na kʋdig!
Teŋ la pɛ'ɛli nɛ bada,
ka ba bada la kpɛn'ɛsidi ba dabiem.
39 Alazug, wɛog bʋnkɔnbid nɛ zanku'a na kena bɛɛ ani,
ka viid na gbɛɛndi li pʋʋgin.
Nidib kʋ lɛm bɛɛ ani
bɛɛ sɔ' lɛn zin'in ani zʋmaana banɛ na ti kena la.
40 Nwɛnɛ Wina'am da san'am Sodom nɛ Gomora
nɛ tɛɛns banɛ kpi'e ani si'em la,
ala ka sɔ' mɛ kʋ bɛ Babilon teŋinɛ;
sɔ' kʋ zin'inɛ ani.”
Zugsɔb la yɛl si'em la.
41 Gɔsima! Dataas yi ya-datiuŋʋ kena;
sʋ'ʋlim kanɛ labis ka li na'anam mɛ zu'oe
ba duoe nɛ paŋtita'ari kenna.
42 Ba bɔbnɛ nɛ tiraad nɛ kpana;
ba anɛ bugusnam ka pʋ zɔt nimbaanliga.
Ban ban'adi ba widi ken la,
ba vuudi nwɛnɛ atɛuk ku'om vuud nɛ.
Ba kennɛ nwɛnɛ banɛ ti'eb zaba
ye ba zab nɛ Babilon teŋ la.
43 Babilon na'ab wʋmi ba labaar,
ka o giinla kɛns.
Sʋnsa'aŋ paae o,
ka li zabid o wʋʋ pu'a na sa'ae ka li zabid si'em la.
44 Nwɛnɛ gbigimi na yi Joodan gɔn'ɔsin na,
wa'ae yaama zin'igin ye o gban'e kɔnbʋg si'em la,
ala ka m na kad Babilon n yis teŋin la tɔ'ɔtɔ.
Anɔ'ɔn ka m na gaŋ ka o tʋmi li?
Anɔ'ɔnɛ nwɛnɛ mam ka anɔ'ɔnɛ na mak nɛ mam?
Kɔnbkem bɛ ya na zi'enɛ zab nɛ mam?
45 Dinzugɔ, kɛlisim Zugsɔb la gban'e Babilon yɛla si'em,
on gban'e Babilon teŋ la yɛla si'em nwa:
Ba na gban'e pɛbibis la mɔri keŋ;
ka san'ami ba kariyauŋ la wʋsa ban zug.
46 Ba ya'a ti gban'e Babilon teŋ la
li dammir na kɛ ka teŋgbauŋ la kirid;
kikaasig la na maligim kaas buudi la wʋsa sʋʋgin.