Ammon dim labaari nwa
49
1 Nɛ'ɛŋa anɛ Ammon dim yɛla:Zugsɔb la yɛl si'eli nwa ye,
“Israel pʋ mɔr biribisɛɛ?
O pʋ mɔr faditibaa?
Ka bɔ ka yanam Molek win nidib la kena
ye ya di'e Gad teŋ la sʋ'oe ya?
Bɔ ka ya bɛɛ li tempʋʋsin la?
2 Amaa dabisa kenna,” Zugsɔb la yɛl si'em la,
“Ka m na kɛ ka zaba kuŋ kaasi
keŋ Rabba linɛ an Ammon dim teŋ tita'arin la;
li na lieb dabɔɔd,
ka ba na nyu'oe tembibis banɛ kpi'e la nɛ bugum.
Ka banɛ daa kad Israel dimi yis la
Israel mɛ yʋ'ʋn na kadi ba yis.”
Zugsɔb la yɛl si'em la.
3 “Kaasimi, Hesbon dima, ka Ai teŋ la san'am ya!
Kaasimi, Rabba dima!
Yɛɛmi bɔto fuud ka kumi;
zɔm lɛbi kpɛ' ka lɛb kpɛ' zaŋguoma la pʋʋgin:
ba na kɛ ka ya Molek win la lɔ'ɔŋ teŋ
la'am nɛ o maanmaannib nɛ o kpɛɛmnam la wʋsa.
4 Bɔ ka fʋ dʋ'ʋsidi fʋ mɛŋi fʋ bɔn'ɔd la yɛla?
Fʋ dʋ'ʋsidi fʋ mɛŋ ye fʋ bɔn'ɔd la du'ad zʋʋd sʋ'ʋŋa.
Fʋn kanɛ ka' sida sɔba,
fʋ ti'enɛ fʋ kpan'am la ka yɛt ye,
‘Anɔ'ɔn na zab nɛ mam’
5 M na kɛ ka banɛ giligif la wʋsa
kpɛn'ɛsif dabiem,”
Zugsɔb onɛ an Paŋtita'ar Sɔb la pian'ʋkʋ nwa.
“Ba na kadi ya wʋsa,
ka sɔ' kae na nyaŋi la'as zɔɔma la.
6 La'am nɛ wala, li nya'aŋ m na lɛbis Ammon dim zusʋŋ la.”
Zugsɔb la yɛl si'em la.
Edom dim labaar
7 Edom dim yɛla:
Zugsɔb onɛ an Paŋtita'ar Sɔb la yɛl si'eli nwa:
“Ya'am dim lɛn kae Teman teŋinɛ?
Sa'alʋg bɔdig baŋir dimin la nɛɛ?
Ba ya'am la pun'oe nɛɛ?
8 Fɛndigim zɔ, yanam banɛ bɛ Dedan teŋin la
su'ami tampinyɔ'ɔd banɛ zulim la ni,
bɔzugɔ m na kɛ ka tɔɔg paae Esau
li saŋa la m na namis o.
9 Banɛ pɔn'ɔd tiis wala la ya'a pɔn',
ba kʋ nya'al bi'elaa?
Na'ayiis ya'a kpɛn' yisi'a ni yʋ'ʋŋɔ,
ba kʋ zunɛ ban bɔɔd si'el bɛn ma'aanɛ?
10 Amaa m na yɛɛs Esau ka kɛɛ o biel;
M na pilig zin'ibanɛ ka o su'ad la,
ka o kʋ lɛn nyaŋi lus o mɛŋa.
O biis nɛ o nidib nɛ o kpi'es wʋsa na kpi,
ka sɔ' kʋ lɛm bɛ ya'asɛ.
11 Basimi fʋ kpiibis la ka m na guri ba nyɔvʋya.
Pʋkɔnya la mɛ nɔkimi ba ti'iri niŋi m san'an.”
12 Zugsɔb la yɛl si'eli nwa ye, “Banɛ pʋ nar ye ba nyɛ namisʋg la ya'a paam namisʋgɔ, ya tɛn'ɛs ye ya na keŋ zaalim ka da nyɛ namisʋgɔ? Ya kʋ keŋ zaalim, asɛɛ ka ya nu nwam linɛ aan m sʋnpɛɛn la.” 13 Zugsɔb la yɛl ye, “M pɔ ya ye Bozira teŋ na lieb dabɔɔg, ka an bʋnzɔtir, ka lɛn an bʋnla'adir onɛ ka ba na mɔri pɔɔd nɔɔri tisid nidib; ka li tempʋʋs la wʋsa na lieb dabɔɔd, saŋa linɛ ka' bɛnnɛ.”
14 M wʋm labaar ka li yi Zugsɔb la san'an na ye,
“Ba tʋm nidib tɛɛns sʋ'ʋlim ni ye ba yɛl ye,
‘La'asimi taaba!
Duom yii zaba!’
15 Nannanna m na kɛ ka fʋ lieb tembil tɛɛns la sʋʋgin,
ka nidib na nɛ'ɛsidif.
16 Fʋn kpɛn'ɛsid nidib dabiem la,
nɛ nyɛɛsim kanɛ ka fʋ mɔri fʋ sʋnfʋn la ma'adif.
Fʋ bɛ nɛ tampiins linɛ bɛ zuoya zug la,
ka bɛ kukuos zug agɔla.
La'am nɛ fʋn maali fʋ tɛɛd ka li bɛ agɔla lalli wʋʋ fʋ anɛ silʋg la,
ani ka m na vɛ'ɛgi fʋ sigis na.”
Zugsɔb la yɛl si'em la.
17 “Edom na lieb bʋnzɔtir;
banɛ wʋsa dɔl ani gaad, li na aan ba pakir
ka ba wʋsa na kɛɛnd o,
o sapu'ad la yɛla.
18 Nwɛnɛ Sodom nɛ Gomora da san'am
la'am nɛ tɛɛns banɛ da kpi'e ba la.”
Zugsɔb la yɛl ye,
“ala mɛn ka sɔ' kʋ bɛ Edom sʋ'ʋliminɛ,
nid kʋ bɛɛ ani ya'asɛ.
19 Nwɛnɛ gbigimi na yi Joodan gɔn'ɔsin na
wa'ae yaama zin'igin ye o gban'e kɔnbʋg si'em la,
ala ka m na kad Edom yis o teŋin la tɔ'ɔtɔ.
Anɔ'ɔn ka m na gaŋ ka o tʋmi li?
Anɔ'ɔnɛ nwɛnɛ mam ka anɔ'ɔnɛ na mak o mɛŋ nɛ mam?
Kɔnbkem bɛ ya na zab nɛ mam?
20 Dinzugɔ, kɛlisim Zugsɔb la gban'e Edom yɛla si'em,
on gban'e ye o niŋ banɛ bɛ Teman teŋin la yɛla si'em.
Ba na gban'e pɛbibis la mɔri keŋ;
o na san'ami ba kariyauŋ la wʋsa ban zug.
21 Ba liig la vuud na kɛ ka teŋ dam;
ba na maligim kaas ka li paae Atɛuk Zɛn'ugʋn.
22 Gɔsima! Silʋg bɛɛ ani laan ka na zulig na,
yadig o kpʋkpama Bozira zugin.
Daakan la ya'a paae Edom zabzabidib la sʋnya
na nwɛnɛ pu'a na sa'ae bɔɔd du'ab.”
Damaskus dim labaar
23 Damaskus dim yɛla:
“Li pak Hamat nɛ Apad dim
ban wʋm lababɛ'ɛd la zug.
Ba sʋnya san'am ya,
ka li daami ba ka ba zɔti tuulim wʋʋ atɛuk ku'om nɛ.
24 Damaskus tadig ya,
dabiem gban'e ba,
ka ba fɛndigi zɔt;
tɔɔg nɛ zabir yʋ'ʋn gban'e ba,
ka li zabir nwɛnɛ pu'a na sa'ae.
25 Sida ba na bas teŋ kanɛ yʋ'ʋri daa yit hali la,
teŋ kanɛ ka ba ya'am kpɛn' hali la!
26 Sida, na'akim la na kpi suoraadin;
ka soogianam la na an baanlimm dabiskan la ni.”
Zugsɔb Paŋtita'ar Sɔb la pian'ʋkʋ nwa
27 “M na nyu'oe Damaskus zaŋguoma la bugum;
li na di Na'ab Ben Hadad kpi'euŋ zin'is la wʋsa.”
Kedar nɛ Hazo dim labaar
28 Kedar nɛ Hazo sʋ'ʋlim labaar, banɛ ka Babilon na'ab Nebukadnɛza da kena zab nɛ ba la:
Zugsɔb la yɛl si'eli nwa ye,
“Duom, zam nɛ Kedar dim
ka kʋ nimbanɛ bɛ ya-nya'aŋ la!
29 Ba na faaɛn ba sʋga nɛ ba kɔnbid;
ba na zii ba gbɛɛnsa la mɔri keŋ
la'am nɛ ba yʋgʋma nɛ ba la'ad wʋsa.
Nidib na tansidi ba ka yɛt ye,
‘Dabiem gilig zin'ig wʋsa!’ ”
30 “Zɔmi tɔ'ɔtɔ, yanam banɛ bɛ Hazo la!
Kpɛn'ɛm su'a tampinyɔ'ɔd banɛ zulim ni.”
Zugsɔb la yɛl si'em la.
“Babilon na'ab Nebukadnɛza duoe zi'enɛ ya yɛla;
o gban'e ya yɛla bɛ'ɛd.
31 Duom zab nɛ sʋ'ʋlim
banɛ bɛ nɛ ba mɛŋ ti'ir la,”
Zugsɔb la yɛl si'em la.
“Sʋ'ʋlim kanɛ pʋ mɔr za'anɔya bɛɛ gammɛ;
nidib la bɛ nɛ ba kɔn'ɔkɔn'.
32 Ba na zabi faaɛn ba yʋgʋma,
ba bi'emnam na vaae ba niigi mɔri keŋ.
M na widigi ba kpɛn'ɛs zin'ibanɛ lal;
tɔɔg na yi zin'ig wʋsa paae ba.”
Zugsɔb la yɛl si'em la.
33 “Hazo na lieb wɛbaas zin'ig,
li na dig zaalim ka nidib kae saŋa linɛ ka' bɛnnɛ.
Sɔ' kʋ lɛm bɛɛ ani;
nid kʋ lɛn zin'inɛ ani ya'asɛ.”
Elam dim labaar
34 Zugsɔb la labaari nwa kɛn Jeremia onɛ an Wina'am nɔdi'es la san'an na, li anɛ Elam yɛla, Juda na'ab Zedekaya na'am diib paalim:
35 Zugsɔb onɛ an Paŋtita'ar Sɔb la yɛl si'eli nwa ye,
“Gɔsima, M na kɔ'ɔg Elam dim tiraug,
linɛ aan ba paŋ la.
36 M na kɛ ka paŋ yi zin'is anaasi na zab nɛ Elam,
li na yi saŋgbana la lʋga anaasi la wʋsa;
M na widigi ba kpɛn'ɛs lʋga anaasi la wʋsa,
hali ka sʋ'ʋlim kʋ lɛm bɛ ya'as
ka Elam dim kʋ keŋɛ.
37 M na widig Elam dimi ba dataas la tuon,
m na widigi ba banɛ ieedi ba nyɔvʋr la tuon;
m na mɔr tɔɔgʋ ba zugin na,
li anɛ m sʋnpɛɛn linɛ mɔr dabiem la.”
Zugsɔb la yɛl si'em la.
“M na dɔlli ba bugir nɛ zaba sʋ'ʋg
hali nɛ man na ti li' ba wʋsa.
38 M na zi'eli m na'am gbauŋ Elam sʋ'ʋlimin
ka san'am o na'anam nɛ kpɛɛmnam la wʋsa.”
Zugsɔb la yɛl si'em la.
39 “La'am nɛ wala, dabisa kenna
ka m na lɛbis Elam zusʋŋ la na.”
Zugsɔb la yɛl si'em la.