Moab dim labaari nwa
48
1 Zugsɔb onɛ an Paŋtita'ar Sɔb ka an Israel dim Wina'am la yɛl Moab dim yɛla si'em nwa:“Tɔɔg na paae Nebo teŋ, bɔzugɔ li na san'am.
Ba na gban'e Kiriafaim teŋ ka diisi li nyan;
ba na diis kpi'euŋ zin'ig la nyan ka widigi li.
2 Ba kʋ lɛn zun'e Moab ya'asɛ;
nidib na bɛ Hesbon teŋinɛ gban'e gban'ar ye,
‘Kemi na ka ti li' teŋ kan la nyain.’
Hali Madmena teŋ la na lɛbi fɔn baanlimm;
zaba sʋ'ʋg la mɛ na katif.
3 Kɛlisim kaasig linɛ yit Horonam na,
san'auŋ nɛ kaasig nɛ ya'am fɛndigir na bɛ.
4 Moab teŋ la na nwa';
ka bibibis la na kaasid.
5 Ba na dɔl suor kanɛ dʋt Luhif la,
kaasid hali ken;
ka suor kanɛ sigid Horonam la
ka ba wʋm sʋnsa'aŋ kaasig.
6 Zɔmi! Zɔm faaɛn ya nyɔvʋr;
niŋimi wʋʋ sian'arin waligi bɛ mɔɔgin nɛ.
7 Yanamɛ sadigim ti'e ya mɛŋ tʋʋma nɛ ya kpan'am la,
ba na gban'e ya ka ya na an yammis mɛn,
Kemos onɛ aan ya win la mɛ na lɔ'ɔŋ teŋ,
la'am nɛ o maanmaannib nɛ ba kpɛɛmnam la.
8 Onɛ san'amid la na kena san'am tɛɛns la wʋsa,
ka teŋ baa yinne kʋ kpɛlim.
Bɔn'ɔg la na san'am
ka kukuos la wʋsa birigi san'am,
bɔzugɔ Zugsɔb la pian' ya.
9 Zu'asim yaarim Moab teŋin,
bɔzugɔ teŋ la na san'am wʋsa;
tempʋʋs la na kpɛlim zaalim
ka sɔ' kʋ bɛɛ ba nii.
10 Nɔpɔɔr bɛ onɛ pʋ tʋm Zugsɔb la yɛl ye o niŋ si'el la!
Nɔpɔɔr bɛ onɛ zan'as ka pʋ kʋ nidib la!
11 Moab dim nyɛ vʋ'ʋsʋm lin yi ba biilim saŋa,
wʋʋ daam ka ba zi'el ye li tisig
ka pʋ kpa'ae li gan'ar yinne ni lɛbis yinne nii,
ba pʋ gban'e ba lɔ'ɔŋ teŋa.
Daam la nan kpɛm mɔr malisim wʋʋ lin daa an si'em la,
ka li nyumalisiŋ la pʋ tiakɛ.
12 Zugsɔb la yɛl ye, Dabisa kenna,
ka m na tʋm nimbanɛ kpa'asid la,
ka ba na kpa'ae li yis gan'arin la na;
ba na kpa'as gan'a la daam wʋsa
ka nwa'ae gan'a la.
13 Ani ka nyan na kpɛn' Moab dimi ba win Kemos yɛla,
wʋʋ Israel dimi daa niŋ Betel win la yadda
ka di nyan si'em la.”
14 Ya na niŋ wala yɛl ye, “Tinam anɛ zabzabidib,
ka mɔr sʋnkpi'euŋ zaba ni?
15 Ba na kpɛn' Moab sʋ'ʋlim tɛɛns la wʋsa san'ami li;
na'akimsʋma la wʋsa na kpi zaba la ni.
Man onɛ an Zugsɔb Paŋtita'ar Sɔb la pian' la.
16 Moab liig la li'el ya;
yɛlbɛ'ɛd na li o zugin tɔ'ɔtɔ.
17 Yanam banɛ kpi'e nɛ o la, kaasim tis o,
banɛ mi' on daa an si'em la wʋsa;
yɛlimi ye, Gɔsim zan'an kanɛ mɔr paŋ la kɔ'ɔg si'em;
gɔsim na'am dansaar la kɔ'ɔg si'em!
18 Sigimi ya na'am gbauŋ la zugʋ
zin'in teŋ kpi'emisin,
yanam Dibon teŋ dima.
Onɛ san'am Moab la
na kena zab nɛ ya
san'ami ya tempʋbanɛ mɔr kpi'euŋ la.
19 Zi'enimi suor kpikpɛŋ ka gɔsid,
yanam banɛ bɛ Aroa teŋin la.
Bu'osimi dau kanɛ zɔt la nɛ pu'a kanɛ bɔdigid la,
bu'osimi ba ye, ‘Bɔɔ maalɛ?’
20 Moab dim di nyan, bɔzugɔ ba widig ya.
Kummi ka kaasidi!
Mɔɔlimi Aanon kɔlʋgin la
ye Moab san'am ya.
21 Sariakadib paae tɛɛns banɛ bɛ kʋkʋna zug la,
li paae Holon nɛ Yahaza nɛ Mefaaf
22 nɛ Dibon nɛ Nebo nɛ Bet Dibilatam,
23 nɛ Kiriafaim nɛ Bet Gamul nɛ Bet Meon
24 nɛ Keriof nɛ Bozira
nɛ Moab tempʋbanɛ bɛ yammin nɛ lalli la wʋsa.
25 Moab iil linɛ pa'annɛ o paŋ la kɔya;
o nu'ug mɛ kɔ'ɔg ya,”
Zugsɔb la yɛl si'em la.
26 Kɛl ka o nuu kʋʋl,
bɔzugɔ o zan'as Zugsɔb la nɔɔr.
Kɛl ka Moab bilim o mɛŋ tiindin la;
ka lieb onɛ ka ba na la'ad o.
27 Li ka' Israel n da aan ya bʋnla'adir laa?
Ba da gban'e o na'ayiis sʋʋginɛɛ?
Ya lɔbidi ya zut ka la'ad o
saŋa kanɛ ka ya pian'ad o yɛla.
28 Yanam banɛ bɛ Moab la,
basimini ya tempʋʋs la ka keŋ bɛ tampiinsin.
Bɛɛi wʋʋ dawana
ka maali ya tɛɛd tampinyɔ'ɔdin.
29 “Ti wʋm Moab nyɛɛsim la yɛla,
on dʋ'ʋsid o mɛŋ ka mɔr nyɛɛsim si'em la,
o nyɛɛsim nɛ o tita'alim la
nɛ on gban'e o sʋʋnrin ye on gat sɔ' wʋsa la.
30 M mi' on gɔsidi pʋ nyɛt nidib si'em
amaa lin kʋ sʋŋ o,”
Zugsɔb la yɛl si'em la.
O dʋ'ʋsi-m-mɛŋ la na naae zaalim.
31 Dinzug m na kaas Moab yɛla,
Moab yɛla ma'aa ka m kaasid,
M kumnɛ Kir Haresef yɛla.
32 Yanam vain tiis banɛ bɛ Sibma teŋin la,
m na kaasi tisi ya, wʋʋ Jaza kum si'em la.
Ya wila la yaadim paae atɛuk la;
hali ba paae Jaza Tɛukʋn la.
San'auŋ sɔb la lii fʋ wala banɛ bi'ig la zug.
33 Sumalisim wʋsa gaad ya
ka bas Moab tiis nɛ o pɔɔd la.
M kɛya ka daam pʋ lɛn yit daam nwia'asʋg zin'igin laa;
sɔ' pʋ lɛn nwia'asidi li ka tansid agɔla nɛ sumalisim.
La'am nɛ ban nan tansid la,
li ka' sumalisim tansʋgɔ.
34 “Ba kaasig la dʋtnɛ
Hesbon n paae Eleale nɛ Jahaz,
ka yi Zoar hali paae Horonam nɛ Egilaf Sielisiya,
hali Nimirim ku'om la kʋdig nɛ.
35 M na kɛ ka banɛ bɛ Moab teŋin la kpi'ilim;
banɛ maan teŋgbana kukuosin
ka nyu'od bʋnnyubisa tisi ba wina la.”
Zugsɔb la yɛl si'em la.
36 “M kaasidi m sʋnfʋn tisid Moab wʋʋ na'akpak nɛ;
ka kaasidi tisid Kir Haresef.
Kpan'am kanɛ ka ba nyɛ la wʋsa gaad ya.
37 Ba wʋsa pʋni ba zut
ka sɔ' wʋsa pʋn o tieŋ,
ba kisi ba nu'us wʋsa
ka yɛ bɔto fuudi kaasid kʋʋr.
38 Moab sʋ'ʋlim tɛɛnsin la dɔɔd wʋsa zut,
nɛ nidibi la'as zin'isi'a wʋsa,
si'el-si'el kae asɛɛ kukuma ma'aa,
bɔzugɔ m nwa'ae Moab nɛ wʋʋ gan'ar nɛ
ka sɔ' pʋ lɛm bɔɔdi lii.”
Zugsɔb la yɛl si'em la.
39 “Gɔsim Moab teŋi nwa'ae si'em!
Moab yʋ'ʋn fɛndignɛ bid kʋdig nɛ nyan!
Moab yʋ'ʋn lieb nɛ bʋnla'adir,
ka an pakiri tis banɛ gilig o la wʋsa.”
40 Zugsɔb la yɛl si'eli nwa ye:
“Gɔsima! Silʋg zuligid na,
o yadig o kpʋkpama Moab zugin.
41 Ba na nyaŋ tempʋʋs la
ka faaɛn kpi'euŋ zin'is la.
Daakan la Moab zabzabidib la sʋnya
yʋ'ʋn na nwɛnɛ pu'a sa'ae bɔɔd du'ab nɛ.
42 Moab teŋ la na san'am
bɔzugɔ ba zan'as Zugsɔb la nɔɔr.
43 Moab nidiba, dabiem digi guri ya
li anɛ bɛndig nɛ bʋmbɔk nɛ baŋ.”
Zugsɔb la yɛl si'em la.
44 “Banɛ wʋsa nyɛ dabiem la ka zɔt
na li bʋmbɔkin la,
onɛ wʋsa naan bʋmbɔkin dʋt na,
baŋ la na gban'e o;
m na kɛ ka yʋʋm kanɛ an namisʋg saŋa la
paae Moab dim la wʋsa.”
Zugsɔb la yɛl si'em la.
45 “Hesbon teŋ la ma'asim
ka zɔɔma la zi'e bʋra.
Bɔzugɔ, bugum naam Hesbon n yina,
bugum pielim yi Sihon teŋin;
li ditnɛ Moab gbɛ'og,
nɛ banɛ dʋ'ʋsidi ba mɛŋ la zunwana.
46 Tɔɔg paae ya, Moab dima!
San'auŋ paae Kemos win nidib la;
ba gban'e ya biribis la lɔ'ɔŋ teŋ
ka kɛ ka ya bipumis la lieb yammis.”
47 “La'am nɛ wala, dabisa kenna
ka m na kɛ ka Moab zusʋŋ la lɛb na.”
Zugsɔb la yɛl si'em la.
Moab sariakadib yɛla la naari la.