Labakaŋa anɛ Filisitia dim din
47
1 Zugsɔb la labaari nwa kɛn Jeremia onɛ an nɔdi'es la ni na Filisitia dim yɛla saŋa kanɛ ka Faaro nam pʋ keŋ zab nɛ Gaza dima.2 Zugsɔb la yɛl si'eli nwa ye,
“Gɔsim ku'om la dʋt ya-datiuŋ si'em;
li na zɔt nɛ paŋ wʋʋ kɔldaug ku'om nɛ.
Li na pɛ'ɛl teŋ ka lim linɛ bɛɛ ani wʋsa,
nɛ tempʋʋs la nɛ nimbanɛ zin' ani la.
Nidib la na kaas agɔla;
banɛ bɛ teŋin la wʋsa na kaasid.
3 Widi nɔba ya'a ti vuudi ian'adi kenna
dataa la zaba tɛrekonam la ya'a ti vuud
ka ba nɔba la ian'asid.
Ba'anam kʋ gi'e ye ba sʋŋi ba biisɛ;
ba na zɔt ka ba nu'us kpi.
4 Dabisir paae ya
ka ba na san'am Filisitia dim
ka li' banɛ kpɛlim
ka na sʋŋ Taya nɛ Sidon.
Zugsɔb la bɔɔd ye o san'am Filisitia dim,
banɛ da kpɛlim ka dɔl atɛukʋ yi Kafitora teŋin la.
5 Gaza na kum ka pʋn o zug sʋnsa'aŋ yɛla;
Askɛlon na an baanlimm.
Yanam banɛ kpɛlim ka bɛ paalʋ la,
bʋndaar ka ya na bas kʋʋr kaasig nɛ ya mɛŋ niŋgbina nwaabɔ?
6 Ya fabinnɛ yɛt ye, ‘Aa, Zugsɔb zaba sʋ'ʋgɔ,
bʋndaar ka fʋ na vʋ'ʋsɛ?
Lɛmmi fʋ tɛɛngʋn la;
gu'om ka an baanlimm.’
7 Amaa li na niŋ wala vʋ'ʋs
Zugsɔb la tisi li nɔɔr la?
On yɛli li ye li zam nɛ Askɛlon
nɛ nimbanɛ bɛ atɛuk nɔɔrin wʋsa la?”