Labakaŋa anɛ Egipt yɛla
46
1 Nɛ'ɛŋa an Zugsɔb la labaari yi Jeremia onɛ an nɔdi'es la san'an na tɛɛns sʋ'ʋlim yɛla:2 Egipt yɛla:
Labakaŋa anɛ Egipt na'ab Faaro Neko soogianam yɛla, banɛ ka Babilon na'ab Nebukadnɛza da nyaŋi ba Kakimis Efiritis Kɔldaugin la, Josia biig Jehoyakim da di na'am la li yʋma anaasi saŋa:
3 “Ti'ebimi ya gbanti'edis, banɛ an bʋmbibis nɛ bʋmbɛda la wʋsa,
ka yii keŋ zaba!
4 Li'emi widi la nɛ salibir,
ban'ami widi la!
Zi'enimi ya zi'esa ni
pidimi kʋnt zupibis!
Saasimi ya kpana la nɔya,
ka bɔbi ya zaba la'ad!
5 M nyɛ bɔ?
Dabiem kpɛn' ba nɛ,
ba lɛbidnɛ nya'aŋ,
ba nyaŋi ba zabzabidib la.
Ba zɔti tɔ'ɔtɔ
ka pʋ lɛn gi'ed nya'aŋa,
ka dabiem gilig zin'ig wʋsa.
Zugsɔb la yɛl si'em la.
6 Banɛ mi' zɔɔg hali la kʋ nyaŋi zɔɔ
bɛɛ banɛ mɔr paŋ la nyaŋi pɔnsɛ.
Ya-datiuŋ linɛ kpi'e Efiritis kɔldaug la baba,
ka ba tu'usidi lit.
7 Anɔ'ɔnɛ nwa duod wʋʋ Nail kɔldaugɔ,
ka nwɛnɛ mu'ar ku'om pɛ'ɛli badigida?
8 Egipt duosid nɛ wʋʋ Nail kɔldaug nɛ,
nwɛnɛ ku'om pʋbid kɔldaadin nɛ paŋ.
O yɛl ye, ‘M na duoe pil teŋgbauŋ la;
m na san'am tempʋʋs nɛ ba nidib la,’
9 Widii, kemi tuon!
Kemi nɛ sʋnpɛɛn, yanam banɛ dɔribid zaba tɛrekonam la!
Kemi, zabzabidibaa.
Kus nɛ Put dim banɛ ziid gbanti'edis la,
yanam Libiya dim banɛ tɛk tiraug la.
10 Amaa dabiskan la anɛ Zugsɔb onɛ an Paŋtita'ar Sɔb la din;
li anɛ sam yɔɔb dabisir, ka o na yɔ o dataas sam.
Zaba sʋ'ʋg la na kʋ hali ti tig,
li na kʋ hali ka ziim la ti yisi li ku'onuud.
Zugsɔb onɛ an Paŋtita'ar Sɔb la na maal maan
teŋ kanɛ bɛ ya-datiuŋ ka kpi'e nɛ Efiritis kɔldaug la.
11 Egipt nwɛnɛ pu'asadir nɛ
Kɛl ka o keŋ Gilead n iee kpaam linɛ an tiim.
Amaa fʋ iee suoya bɛdegʋ ka duoe zaalim
ka laafi kae tisi fɔ.
12 Buudi wʋsa na wʋm pu'asadir la di nyan la yɛla;
o kaasig la na pɛ'ɛl dunia.
Zabzabid na tu'ug o tiraan;
ka ba wʋsa na la'asi li teŋin.”
13 Labakaŋa ka Zugsɔb la pian' tis Jeremia onɛ an nɔdi'es la, Babilon na'ab Nebukadnɛza na kena zab nɛ Egipt la yɛla.
14 Mɔɔlim nɛ'ɛŋa Egipt teŋin, ka yɛli li Migdɔl,
ka mɛ mɔɔli li Memfis nɛ Tapanes.
Ti'ebim ka zi'eni ya zi'esa ni,
bɔzugɔ zaba sʋ'ʋg la na kʋʋd banɛ kpi'e nɛ ya la.
15 Bɔ ka ya zabzabidib la lit teŋinɛ?
Ba kʋ nyaŋi zi'enɛ bɔzugɔ Zugsɔb la na da'ae ba bas teŋin.
16 Ba na tu'usidi takid;
ba na lit taaba zug.
Ba na yɛl ye, Duomi, kɛlli ka ti lɛb!
Ti kulimi ti mɛŋ nidibin nɛ ti mɛŋ teŋin!
Zɔmi ka bas dataa kanɛ zabid nɛ sʋ'ʋg ka mugusidi ti la.
17 Ani ka ba na yɛl ye,
Aa, Egipt na'ab Faaro maannɛ tʋkpiidʋg zaalim;
o san'am o suori bas.
18 “Asida mɛnɛ”, Na'akanɛ yʋ'ʋri buon
Zugsɔb onɛ an Paŋtita'ar Sɔb la,
Sɔ' na kena an onɛ bɛ zuoya la sʋʋgin nwɛnɛ Tabo zuor la,
ka nwɛnɛ Kamel zuor kanɛ bɛɛ atɛuk nɔɔrin la.
19 Vaami ya la'adi lɔ'ɔŋ teŋ,
yanam banɛ bɛ Egipt la,
bɔzugɔ Memfis na san'am
ka lieb dabɔɔd ka nidib kʋ bɛɛ ani.
20 “Egipt nwɛnɛ na'asa'a vɛnliŋ,
amaa pɔ'ɔg na yi ya-datiuŋʋ
kena zab nɛ o.
21 Soogianam banɛ ka o da' la anɛ o taaba
ka nwɛnɛ na'abibis banɛ nɔb nɛ.
Ban mɛ na fɛndig ka ba la'am zɔ,
ba kʋ zi'enɛ,
bɔzugɔ dabisbɛ'og paae ba,
ba namisʋg saŋa paae ya.
22 Egipt na vʋ'ʋsidi nwɛnɛ waafʋ zɔt ka fʋʋsid nɛ,
dataa la zabidi kenna nɛ paŋ la;
ba na la'asi gilig o nɛ liemis,
wʋʋ nidibi na nwaad tiisi lugid.”
23 Ba na nwaa o tiis la,
“hali ba ya'a bɔɔd ban zu'oe si'em.
Zugsɔb la yɛl si'em la.
Ba zu'oe gaad na'azɔmnam,
sɔ' kʋ nyaŋi kaali ba.
24 Egipt pu'asadir la na di nyan,
ba na nɔk o tis nimbanɛ yi ya-datiuŋ la na.”
25 Zugsɔb onɛ an Paŋtita'ar Sɔb ka an Israel Wina'am la yɛl ye, “M bɔɔd ye m mɔr nɛ namisʋgʋ kɛn Ammon onɛ an Tebɛs teŋ win la zugin na, nɛ Na'ab Faaro, nɛ Egipt dim wina nɛ ba na'anam nɛ banɛ ti'e Faaro la zugin na. 26 M na nɔki ba tis banɛ ieedi ba nyɔvʋr la, m na nɔki ba tis Babilon na'ab Nebukadnɛza nɛ o kpɛɛmnam la. Amaa li nya'aŋ Egipt na lɛm mɔr nidib wʋʋ lin da an si'em la.” Zugsɔb la yɛl si'em la.
27 “M tʋmtʋm Jakob nidibaa, da zɔti dabiem;
yanam Israel dima, da kɛ ka li paki ya.
M na faaɛn ya yi tɛɛns banɛ bɛ lalli la,
ya yaas na yi tɛɛns banɛ ka ba mɔri ba keŋ la lɛb na.
Jakob nidib la na lɛm mɔr sumbʋgʋsʋm ka dabiem kae,
ka sɔ' kae na kpɛn'ɛsi ba dabiem.
28 M tʋmtʋmnib Jakob nidiba, da zɔti dabiem,
ka m bɛ nɛ ya,”
Zugsɔb la yɛl si'em la.
“La'am nɛ man san'am tɛɛns
banɛ ka m da widigi ya kpɛn'ɛsi ba sʋʋgin la,
m kʋ san'ami ya nyainnɛ.
M na tɛki ya tʋbir ka li dɔl sida suor;
m kʋ kɛ ka ya keŋ zaalim ka pʋ di'e tʋbtɛɛgirɛ.”