Sariakadib na paae buudi
34
1 Buudii, li'elimi na ka kɛlisi;nidibaa, kɛlisimi sʋ'ʋŋa!
Kɛl ka teŋgbauŋ la nɛ linɛ bɛɛ li pɔɔgin wʋsa wʋm,
nɛ dunia la nɛ linɛ yiti li pʋʋgin na la!
2 Zugsɔb la sʋnf pɛlig nɛ buudi wʋsa;
nɛ ba zabzabidib la wʋsa.
O na san'ami ba wʋsa,
ka nɔki ba tis ka ba kʋʋ ba.
3 Ba na kʋʋ ba lɔbi bas,
ka ba niŋgbina nyuug duoe,
ka zuoya la wʋsa pɛ'ɛl nɛ ba ziim.
4 Nwadbibis banɛ bɛ saŋgbana ni la na bu'oe
ka saŋgbauŋ la na kpilim wʋʋ gbauŋ nɛ.
Nwadbibis nɛ linɛ bɛ saŋgbana ni la na lit teŋin
wʋʋ tiis vaandi kʋdigi sʋʋgid nɛ.
5 M sʋ'ʋraug la ti'eb arezana ni naae;
gɔsima, li na sig Edom na kat saria,
nimbanɛ ka m pɛsigi ba ye ba san'am nyain la.
6 Zugsɔb sʋ'ʋg la wʋsa anɛ ziim,
kpaam buligi li,
pɛ'ɛs nɛ bʋʋs ziim
nɛ kpaam linɛ bɛ pɛ'ɛs sianini ni la.
Zugsɔb la na maal maan kaŋa Bozra teŋin,
o na kʋʋ li bɛdegʋ Edom teŋin.
7 Mɔɔgin niigi la na la'am kpi nɛ ba,
nɛ na'arabibis nɛ na'aratitada la.
Ba teŋ la na madig nɛ ziim,
ka zin'ig wʋsa wʋ'ʋg nɛ kpaam.
8 Zugsɔb la mɔr dabiskanɛ an sam yɔɔb,
li anɛ yʋʋm kanɛ ka o na yɔ Zion bi'emnam la samme tis Zion dim.
9 Edom kɔldaad la na lieb kotaal,
ba teŋ la na nyɛligid wʋʋ kidibiri la'aŋ bugum,
ka nwɛnɛ kotaal ka bugum la'aŋi dit!
10 Yʋ'ʋŋ nɛ nintaŋ wʋsa li kʋ kpiigɛ,
nyɔ'ɔs na duod saŋa wʋsa.
Li na yi zʋmaaŋ yinne paae zʋmaaŋ ya'as
ka teŋ la na kpɛn dig zaalim;
sɔ' kʋ lɛn dɔl ani gaad ya'asɛ.
11 Viid nɛ agaand na sʋ'oe zin'ig la,
ba na maali ba tɛɛd anina.
Wina'am na mak Edom teŋ la nɛ o makir nwiig
ka kɛ ka li kpɛlim zaalim ka dig yɔɔg-yɔɔg.
12 Ba ninsʋma la kʋ mɔr linɛ nar ye ba buon ye sʋ'ʋlim,
ba tuongatib la wʋsa na bɔdig.
13 Gɔn'ɔs na di'e ba tempʋʋs la wʋsa,
gɔn'ɔs nɛ tiyɔɔd na yii ba kpi'euŋ zin'isin,
li na lieb wɛbaas nɛ viid gbɛɛnsa.
14 Mɔɔgin bʋnyuos nɛ zaŋku'a na la'asid ani,
ka sian'arin bʋʋs na kaasidi buon taaba,
ani ka yʋ'ʋŋ bʋnyuos na nyɛ ba vʋ'ʋsʋm zin'ig.
15 Viiug na tɛ tɛog anina nyɛ' gɛla,
o na wiak anina ka gur o biis la o kpʋkpama ni,
wibid mɛ na la'asid ani ayi', yi'.
16 Gɔsim Zugsɔb gbauŋʋn la ka karim gɔs lin yɛl si'el:
Bama wʋsa na bɛ ani,
baa yinne kʋ bɛ ani aan o kɔn'ɔkɔn'.
Li anɛ Wina'am nɔɔri pian' zi'el,
ka o siig na la'asi ba na.
17 O pʋdig sɔ' wʋsa o din,
o nu'ugʋ maki tɔndi ba.
Ba na sʋ'oe li saŋa linɛ ka' bɛnnɛ
ka ba zʋmaana bɛdegʋ na zin'inɛ anina.