Sʋnsa'aŋ nɛ sʋŋir
33
1 Tɔɔg na paae fʋn kanɛ an san'auŋ sɔb la,hali baa bam pʋ san'amif la!
Tɔɔg na paae fʋn kanɛ an zam sɔb la
hali baa bam pʋ zammif la!
Fʋ ya'a bas san'auŋ, ba na san'amif;
fʋ ya'a bas zammʋg, ba na zammif.
2 Zugsɔba, zɔmi ti nimbaanlig,
ti ti'ir bɛ nɛ fʋ ni.
Fʋnɛ tisidi ti paŋ daar wʋsa,
yɛla ya'a ti paae ti, fʋn faanmi ti.
3 Nidib ya'a wʋmi fʋ tansʋg, ba zɔtnɛ;
fʋ ya'a duoe, buudi wʋsa widigidnɛ.
4 Yɛlimi ba ye, Ya la'abanɛ ka ya fan' la,
nidib na dii li nwɛnɛ na'azɔm baanlʋgʋ fanrisid vaand si'em la,
nwɛnɛ na'azɔmnam bɛdegʋ na ian'adi ba zugin nɛ.
5 Ba na dʋ'ʋs Zugsɔb la yʋ'ʋr, on bɛɛ agɔla la zug.
O kɛ ka sida nɛ pʋpielim pɛ'ɛl Zion tempʋʋg la.
6 Onɛ na aan ya ɛɛnbir saŋa wʋsa,
nɛ ya faangir tita'ar nɛ ya'am nɛ baŋir.
Zugsɔb la zɔtim na kɛ ka ya paam lina wʋsa.
7 Kɛlisimi, ba nimbanɛ an sʋnkpi'euŋ dim la bɛ suoraadinɛ
zi'e kaasid agɔla gɔla:
Banɛ ka ba tʋm ye ba maal nɔnaar la
ba kumnɛ hali ban gʋ'ʋŋ la zug.
8 Nidib bas suoraad la wʋsa,
sɔ' pʋ lɛn dɔl suoya la.
Nɔnaar la san'am ya,
ba nɛ'ɛs banɛ di kasɛt la nɛ,
ba pʋ lɛn na'asid sɔ'ɔɔ.
9 Pɔɔd la kʋdignɛ ka bʋmbʋta sʋʋgid;
Lebanon dinɛ nyan ka o tititada la ziank.
Saron kʋ'ʋlʋm zin'is yʋ'ʋn nwɛnɛ Araba pipirig la nɛ,
ka Basan nɛ Kaamel tivɛnla vaand la sʋʋg.
10 Zugsɔb la yɛl ye, “Nannanna m na duoe zi'en,
ba yʋ'ʋn na zun'om ka dʋ'ʋsi m yʋ'ʋr.
11 Pɔkanɛ ka fʋ mɔr la nwɛnɛ udug nɛ,
ka fʋn na du'a si'el la nwɛnɛ kikan'agbita nɛ,
fʋ ya'a vʋ'ʋs li na anɛ bugum diti fʋ mɛŋ.
12 Nidib la na kanbi lieb tampɛligim,
ka nwɛnɛ gɔn'ɔs ka ba nwaae nyu'oe bugum.
13 Yanam banɛ bɛ lalli la, kɛlisimi man maal si'el la.
Yanam banɛ mɛ bɛ yammin la,
baŋimi man mɔr paŋ si'em!”
14 Dabiem kpɛn' tʋʋmbɛ'ɛd dim banɛ bɛ Zion teŋin la,
banɛ zi' Wina'am la kiridnɛ, ka yɛt ye,
“Anɔ'ɔn na nyaŋi zi'en nɛ bugum kanɛ dit nwa?
Ka anɔ'ɔnɛ na kpɛm bɛ nɛ bugum linɛ dit ka pʋ kpiigid la?”
15 Ayei! Li anɛ onɛ ken nɛ pʋpielim la,
nɛ onɛ pian'ad linɛ an sida la.
Ba zan'asi ye ba kʋ muk nidibi di'e ligidi,
ka pʋ tiennɛ ba nu'ugʋ di'ed ligidi linɛ ka sɔ' na da' ba.
Ba li' ba tʋba ka pʋ kɛlisid banɛ gban'ad ninkʋʋr yɛla la,
ka umi ba nini ka pʋ siakidi gɔsid bɛ'ɛdɛ.
16 Nimbama na zin'in ya' banɛ ka na'am bɛ,
ba na kpɛn' kpi'euŋ zin'ig linɛ bɛ zuor zug la su'a li pʋʋgin.
Ani ka ba na mɔr diib saŋa wʋsa,
ka ku'om mɛ kʋ pansigi baa.
17 Ya nini na nyɛ Na'ab la nɛ o na'am vɛnlim,
ka ya gɔs teŋ kanɛ yalim hali la.
18 Ya na kpɛn tɛɛnsid dabiem linɛ da bɛ kʋdimin sa la yɛla ye,
“Tuongatib kpɛɛm la bɛ yaanɛ?
Onɛ di'esid lampɔ la bɛ yaanɛ?
Kpɛɛm kanɛ di'esid zaŋguoma nɛ za'anɔya lampɔ la
o sɔb mɛ bɛ yaanɛ?”
19 Ya kʋ nyɛ nimbanɛ dʋ'ʋsidi ba mɛŋ la ya'asɛ,
nimbanɛ pian'adi pʋ mɔr gbin gban'arɛ
nɛ teŋ zʋŋ pian'ad linɛ ka' gbin la.
20 Gɔsimi Zion zuor zug,
tempʋkanɛ an ya malʋŋ tiɛnr zin'ig la.
Ya nini na nyɛ Jerusalem,
ka li na an zin'ikanɛ bɛllim mɔr sumalisim.
Li na nwɛnɛ sʋgʋr kanɛ ka ba kʋ viigi li,
ba kʋ vuoɛn li dazi'eda la, bɛɛ kɛnsi li nwiis la.
21 Anina ka Zugsɔb la na aan ti Paŋtita'ar Sɔb.
Li na nwɛnɛ teŋ kanɛ bɛ kɔldabɛda nɛ mu'a ni,
amaa ka anrʋŋ buudi wʋsa kae na nyaŋi lɔ'ɔŋi paae anina.
22 Zugsɔb la aan ti sariakat,
Zugsɔb la an onɛ tisidi ti wada,
Zugsɔb la aan ti na'ab,
li anɛ onɛ na faaɛn ti.
23 Ya nwiis banɛ lɔɔ ya anrʋŋ la yidig ya,
ka li daug linɛ zi'e sappi la pʋ ba'a sʋ'ʋŋaa
ka li fukanɛ ka pɛbisʋg da'ad la aans.
Ba na pʋdig ban fan' la'asieba la ka li zu'oe,
hali banɛ an waba na di'e la'ad la bɛdegʋ.
24 Banɛ wʋsa bɛ Zion teŋin la sɔ' kʋ yɛl ye, “Mam bɛn'ɛda”;
ka banɛ bɛ ani ka tʋm bɛ'ɛd la, ba na kɛɛ ba taali bas.