Pʋpielim sʋ'ʋlim yɛla
32
1 Gɔsima, na'ab na duoe na gur teŋ la nɛ pʋpielim,ka teŋinna'anam la na gur teŋ la nɛ yɛlsida.
2 Ba wʋsa na nwɛnɛ dɔɔg linɛ lus sisi'em lɛbis
ka nwɛnɛ zin'ikanɛ ka nid na su'a ka pɛbisʋg kʋ paae o.
Ba na nwɛnɛ ku'osuor linɛ pʋbidi ken pipiris zin'ig,
ka nwɛnɛ tampintita'akanɛ bɛ zin'ikanɛ ka ku'om kae.
3 Ala ka banɛ nini nyɛt la na ken ka kʋ umi ba nini,
ka banɛ tʋba wʋm la na kɛlis sʋ'ʋŋa.
4 Banɛ tʋm nɛ kikirʋg la na lieb banɛ gban'ad yɛla gbin,
ka gik bɛɛ bidʋg zilim na lak ka o pian'ad nyain-nyain.
5 Ba kʋ lɛm buon zɔlʋg ye burikin,
bɛɛ ba buol ninyaalig ye na'asi sɔba.
6 Zɔlʋg na pian'ad o zɔlim pian'ad paalʋ,
o pʋtɛn'ɛri pɛ'ɛl nɛ bɛ'ɛd la zug.
O tʋʋma anɛ linɛ pʋ dɔl Wina'am suorɛ,
ka o pian'ad pian'abɛ'ɛdi yadigid Zugsɔb la yɛla.
O pʋ sʋŋid kɔ'ɔm dima,
ka mɔŋ banɛ ka ku'onuud mɔri ba la ku'om.
7 Yalim la suoya anɛ bugusim suoya,
ka o gban'ar wʋsa an bɛ'ɛd.
O mɔɔd ye o san'am nɔŋ dim nɛ ziri pian'ad,
hali baa nɔŋdaan ya'a mɔr sidaa.
8 Amaa burikin gban'ar anɛ burikinnim,
ka o zi'e kiŋ-kiŋ o tʋʋm sʋma yɛla.
Jerusalem pu'ab
9 Yanam pu'a banɛ zin' ka li malisi ya la,
duom zi'en ka kɛlis.
Yanam pu'a banɛ tɛn'ɛs ye si'el wʋsa an sʋ'ʋŋa tisi ya la,
kɛlisimi man ye m yɛli ya si'el!
10 Lin yi nannanna ken li kʋ paae yʋʋmmɛ
ka yanam banɛ tɛn'ɛs ye si'el pʋ daamidi ya la na kirid,
ya bʋnwanna la kʋ walɛ,
ya kʋ nyɛ wala la pɔn'ɔɔ.
11 Kirimi nɛ dabiem,
yanam pu'a banɛ zin' ka li malisi ya la.
Sɔn'ɔsimini ya fuud ka sɔɔn'e bɔto fuud!
12 Bibigimi ya nyɔ'ɔg nɛ sʋnsa'aŋ,
pɔɔd banɛ mɔr kʋ'ʋlʋm nɛ bʋnwanna pɔɔd la yɛla,
13 bɔzugɔ m nidib la bɛ zin'isi'a la liebnɛ gauŋ nɛ gɔn'ɔs.
Kummi ya' banɛ ka ya daa mɔr sumalisim
nɛ tempʋkanɛ ka ya daa nwɛ'ɛd nyɔ'ɔg la yɛla.
14 Ba na zɔ ka basi ba ya' sʋma la;
tempʋkanɛ ka nidib daa pɛ'ɛl la,
sɔ' kʋ lɛm bɛɛ li nii.
Tempʋkpi'ema la nɛ dɔwɔk
linɛ ka ba daa bɛɛ ani gur teŋ la, nidib kʋ lɛm bɛɛ ani.
Sian'arin bʋmis na bɛ ani maan sumalisim,
ka li na anɛ yam sʋma zin'igi tis kɔnbid.
15 Li na anɛ ala ti paae Wina'am na ti kpa'ae o siig la sigis na.
Ani ka pipiris la na lieb kʋ'ʋlʋm zin'ig,
ka zin'ikanɛ mɔr kʋ'ʋlʋm la lieb sian'anr linɛ mɔr tiis.
16 Yɛlsida na zin'in pipirisin
ka pʋpielim na bɛ zin'ibanɛ mɔr kʋ'ʋlʋm la.
17 Pʋpielim nyɔɔd anɛ sumbʋgʋsʋm,
ka mɛ kɛt ka ti bɛ baanlimm
ka mɔr sʋnkpi'euŋ saŋa wʋsa.
18 M nidib la na bɛ teŋ la zug nɛ sumbʋgʋsʋm,
ba na zin' ba yaan ka dabiem kae,
zin'ibanɛ ka ba na vʋ'ʋsid ka daamʋg kʋ paae baa.
19 Hali baa sakuga ya'a lii san'am sian'anr la wʋsa,
ka tempʋʋg la lieb dabɔɔg,
20 la'am nɛ wala, albareka na bɛnɛ ya;
ya na bʋti ya bʋmbʋta kɔlis nɔɔrin,
ka ya niigi nɛ bʋmis na gɔɔndi ba ya'amin.