Tɔɔg na paae banɛ ti'iri bɛ Egipt la
31
1 Tɔɔg na paae banɛ ken Egipt n bɔɔd sʋŋir,ka ti'e ba widi la ban zu'oe la zug,
ka niŋ yadda nɛ ba zaba tɛrekonam
nɛ ba wiedban'adib la ban mɔr paŋ la zug,
amaa ka lɛɛ pʋ gɔsid Israel Dim Wina'am Onɛ An Kasi,
bɛɛ bɔɔd sʋŋir Zugsɔb la san'anɛ.
2 La'am nɛ wala o ya'am zu'oya
ka o na nyaŋi mɔr namisʋg na,
o ya'a pian' si'el o pʋ lɛbid nya'aŋa.
O na duoe zab nɛ banɛ an bugusnam la,
nɛ banɛ sʋŋid bugusim dim la.
3 Amaa Egipt dim la anɛ saalib ka ba ka' Wina'am;
ba widi la anɛ niŋgbina ma'aa ka ba ka' siisɛ.
Zugsɔb la ya'a ti tiɛn o nu'ug, onɛ sʋŋid la na tu'ug,
ka onɛ ka ba sʋŋid la mɛ li,
babayi' la na la'asi bɔdig.
4 Zugsɔb la yɛlim si'eli nwa:
“Nwɛnɛ gbigimi nwa'am si'em la,
gbigimtita'ar ya'a gban'e bʋnkɔnbʋg ye o ɔnb,
kɔnbkemnib ya'a kaas kuŋʋ la'asi gilig o si'em
li kʋ kɛ ka dabiem kpɛn' gbigim la
bɛɛ tʋkpiidʋg la daam o.
Ala ka Zugsɔb onɛ an Paŋtita'ar Sɔb la na sig na
zi'en Zion zuor kʋkʋn la zuginɛ zab.
5 Nwɛnɛ bʋn-ian'ada ɛɛnti yadig kpʋkpama laan agɔl si'em la,
ala ka Zugsɔb la na an gbanti'edʋgʋ tis Jerusalem.
O na guri li sʋ'ʋŋa,
ka sʋŋi li ka faaɛn li.”
6 Israel dima, ya pɔ'ɔg Zugsɔb la ka zan'as o, amaa lɛmmini o san'an. 7 Dabiskan la daar ya'a ti paae, ya yinne-yinne na zan'as anzurifa nɛ sanlima bada banɛ ka ya nɔki ya tʋʋmbɛ'ɛd nu'usi maal la.
8 “Asiria dim na kpi zaba ni,
amaa li ka'anɛ ninsaali na kʋʋ ba.
San'auŋ na paae ba zaba ni ka li ka' ninsaalib paŋa.
Zaba la na kɛ ka ba zɔɔ widig
ka ba na'akim na tʋm yammis tʋʋma.
9 Dabiem na kɛ ka ba zin'ikpi'ema la li,
dabiem mɛ na kpɛn' ba zaba tuongatib la zabbɔn'ɔgin.”
Zugsɔb la pian'ʋkʋ la,
on onɛ ka o bugum bɛ Zion teŋin,
ka li nyu'or zin'ig bɛ Jerusalem tempʋʋgin la.