Banɛ nyɛ faangir mɔr sumalisim
35
1 Pipirig nɛ teŋ kpi'emis la na mɔr sumalisim,tiis na yina pu puum ka maal sumalisim.
2 Li na maal puum tɔ'ɔtɔ,
ka na maal sumalisim bɛdegʋ ka nwɛ'ɛd sumalisim kuŋ.
Li na mɔr Lebanon vɛnlim la buudi,
li vɛnlim na nwɛnɛ Kaamel zuor nɛ Saron teŋgbauŋ;
ba na nyɛɛ ti Zugsɔb la na'am pipilim
nɛ ti Wina'am la vɛnlim.
3 Kpɛmisim banɛ nu'usi buk la,
ka kpɛ'ɛŋ banɛ duma gɛn la.
4 Yɛlim banɛ zɔt dabiem la ye,
“Kpɛ'ɛŋimi ya sʋnya ka da zɔt dabiem,
ya Wina'am la na kena,
o na kena yɔ sam.
Wina'am mɛŋ na yɔ sam nɛ o siig paŋ,
o na kena faaɛn ya, ya bi'emnam nu'usin.”
5 Banɛ nini zu'om la na lak,
ka tʋbkpida tʋba yɔ'ɔg.
6 Waba na ian'ad wʋʋ walis nɛ,
ka gigis tansid agɔla gɔla nɛ sumalisim.
Ku'om na tansidi yit sian'arin na
ka pʋbidi yit pipirisin.
7 Zin'ikanɛ ka nintaŋ tʋʋlʋg kanbid titanbin'isi la na lieb bɛuŋ,
ka ku'om tansidi yit zin'ikanɛ kʋdig la wʋsa.
Zin'ikanɛ an zin'ibɛ'ɛd ka wɛbaas bɛɛ anina la,
kɔlkantima nɛ ku'omin mɔɔd na bus.
8 Suoraug na bɛɛ anina;
ba na buonnɛ li ye, Wina'am Suor.
Tʋʋmbɛ'ɛd dim kʋ nyaŋi dɔlli lii.
Li na anɛ banɛ dɔl suokan la din,
ka banɛ an zɔn nɛ bugusim dim la kʋ nyaŋi dɔl suokaŋaa.
9 Ba kʋ lɛn nyɛ gbigim aninaa,
ka bʋnyua mɛ kʋ duoe anii.
Ba taaba wʋsa lɛn kae.
Amaa banɛ nyɛ faangir la ma'aa na kenna ani.
10 Banɛ ka Zugsɔb yɔɔ ba yɛla la na lɛb na,
ba na yʋ'ʋmmi kpɛn'ɛd Zion tempʋʋg,
ka sumalisim linɛ ka' naar la na bɛ nɛ ba.
Sumpielim nɛ sumalisim na pɛ'ɛli ba,
ka sʋnsa'aŋ nɛ mugusʋg na zɔ ka basi ba.