7
1 Na'ab pu'ayua, fʋ nɔba vɛnl nɛ ta'ada hali,fʋn na'ab pu'ayua biiga!
Fʋ gbɛya ayi' saalimnɛ vɛnli nwɛnɛ niŋgɔnkɔris,
ka nwɛnɛ onɛ mi' kpi'eb hali kpi'a li nɛ nu'us.
2 Fʋ nyu'ug la nwɛnɛ daam nwam kanɛ an gbiliga nɛ
ka damalisiŋ pʋ naadi li pʋʋginɛ.
Fʋ pʋʋr la nwɛnɛ ki dʋʋr
ka na'apu'a-kʋ-si'is-ku'om giligi li.
3 Fʋ bin'isa ayi' la zi'enɛ sappi,
li nwɛnɛ walbibis banɛ an liiba
ka bɛ mɔɔd puum teŋsʋkʋ ɔnbid yam.
4 Fʋ niŋgɔɔnr la nwɛnɛ zan'antɔlig
ka ba nɔk wabʋg nyina maali li.
Fʋ nini ian'adi pil-pil wʋʋ Hesbon teŋ bɛuŋ
linɛ kpi'e Bat-Rabim za'anɔɔr la.
Fʋ Nyɔnya la vɛnli nwɛnɛ Lebanon girimbisa
linɛ zi'e kpa' Damaskus tempʋʋg la.
5 Fʋ zug la vɛnlim nwɛnɛ Kamel zuor.
Fʋ zuobid la sɔbig nɛ liŋ-liŋ ka nyɛɛn hali;
ka li vɛnlim la na nyaŋi fɛndig na'ab ya'am.
6 Fʋ vɛnli hali ka li mɛ narif,
m ya'ambʋnnɛ, fʋ zi'esim la sid paae m ya'am!
7 Fʋ zi'esim la nwɛnɛ kpʋkparig tiig,
ka fʋ bin'isa la nwɛnɛ wala nɛ li buudi ka ba la'as.
8 Lin ka m ye, “M na dʋ kpʋkparig la
paae kpʋkpara la pɔn'.”
Fʋ bin'isa la nwɛnɛ vain tiig wala nɛ,
ka fʋ vʋ'ʋsʋm la nyuug malisi
nwɛnɛ apʋl wala nyuugʋ malis si'em la,
9 ka fʋ nɔɔr nwɛnɛ damalisiŋ nɛ.
Pu'asadir la:
Kɛl ka daam la pʋbi paae m ya'ambʋn la san'an,
dɔlisidi sigid o nɔŋgban nɛ o nyina ni.
10 M anɛ m ya'ambʋn la din
ka o ya'am bɔɔd si'el la an mam ma'aa.
11 Kem na, m ya'ambʋnnɛɛ, kɛl ka ti keŋ kpikpɛŋ,
kɛl ka ti keŋ teŋkpɛŋi gbɛɛn ani.
12 Kɛl ka ti isigi keŋ vain tiis pʋʋgin la
ka gɔs ye tiis la bus ya, bɛɛ?
Ka pomanganɛt la ya'a puud,
ani ka m na pa'ali fʋ m nɔŋir.
13 Tipuum banɛ nyuugʋ malis hali la
tiig nɛ zin'ig wʋsa
ka bɛɛ ti dɔɔg za'anɔɔrin la.
Bʋnkʋda nɛ bʋmpaala wʋsa bɛ,
ka m la'asi ba wʋsa digili gurif, m ya'am bʋnnɛ.