8
1 M naan bɔɔdin ye fʋ aannɛ m taʋnkanɛ mu'a m ma bin'isir!
Li ya'a aan na la ka m nyɛɛ nɛf zin'isi'a,
m naan muakinɛ fʋ nɔɔr,
ka sɔ' kʋ nɛ'ɛsi ma.
2 M naan gaadini fʋ tuon
ka dɔlli fʋ kuli m ma yin.
M ma kanɛ pa'alim la san'an.
M naan tisi nɛf daam kanɛ nyuugʋ malis ka fʋ nu,
danmalisʋŋ kanɛ ka m nwiaki yisi m mɛŋ pomanganɛt tiis wala ni la.
3 O nɔk o dagɔbʋg nu'ug la kʋki m zug,
ka o datiuŋ nu'ug la kuakim.
4 Yanam Jerusalem pu'asada,
pɔɔmi ye ya kʋ kɛ ti taab bɔɔb kʋkɔr duoe
ka li saŋa nam pʋ paae.
Pu'asadir la taaba:
5 Anɔ'ɔnɛ nwa yi pipirisin kenna
ka nɔk o mɛŋi dɛllim o ya'ambʋn la?
Pu'asadir la:
Apʋla walsʋma tiig la gbinnin ka m duof;
ani ka fʋ ma da tʋki fʋ pʋʋg,
ani ka o da lɛn sa'ae du'af.
6 Fɛndigimi fʋ pʋtɛn'ɛr sɔ' wʋsa ni
ka kɛ ka fʋ ya'am bɛ man ni ma'aa,
da lɛm gban'e sɔ' nu'ugɔ sɛɛ mam ma'aa;
ka nɔŋir kpi'emi nwɛnɛ kum nɛ,
li ya'amlɛog mɛ mɔr paŋ wʋʋ kpi'im teŋ.
Li la'aŋid nwɛnɛ bugum nɛ,
ka diti nwɛnɛ bugum pielim dit nɛ paŋ si'em la.
7 Ku'om bɛdegʋ kʋ nyaŋi pie nɔŋiri basɛ
bɛɛ kɔldaad ku'om nyaŋi pʋbigi li gaadɛ.
Sɔ' ya'a nɔk o yin kpan'am wʋsa ye o da' nɔŋir,
ba na nɛ'ɛs o hali.
Pu'a la tanp:
8 Ti mɔri ti taʋn bil,
ka o bin'isa nam pʋ nɔbigɛ.
Ti na niŋi ti taʋn la yɛla wala
daakanɛ ka dau kena ye o bɔɔd o?
9 O ya'a aan zaŋguom,
ti naan nɔkin anzurifa mɛɛ gilig o.
O ya'a lɛn aan nɛ kʋlʋŋ,
ti naan nɔkin na'aziinr dalamma maali lus o lɛbis.
Pu'asadir la:
10 Mam anɛ zaŋguom,
ka m bin'isa la zi'e sappi
wʋʋ dɔbanɛ wa'am nɛ.
O nini gɔsidim nɛ ka pʋ tigida
ka li nwɛnɛ ninkanɛ kɛ ka o ya'am digin.
11 Solomon mɔr vain tiis pɔɔg ka li bɛ Baal-Hamon teŋin;
o nɔki li tis nidib ye ba di'e li gur ka tʋm.
Sɔ' wʋsa ya'a pɔn' tiis la wala naae
ba na mɔr anzurifa ligidi tusir-tusir na tis o.
12 Amaa mam mɛŋ vain pɔɔg anɛ m mɛŋ din;
kɛl ka Solomon mɔr o anzurifa tusir-tusir la,
ka banɛ gur la mɛ mɔri ba kɔbisyi' yi la.
Dau la:
13 Fʋn kanɛ bɛ lɔmbɔn'ɔgin
ka fʋ zuanam nɛ fʋ tʋmtʋmnib bɛɛ fʋ san'an la,
kɛl ka m wʋmi fʋ kʋkɔr!
Pu'asadir la:
14 M sabua onɛ ka m nɔŋ hali,
kem tɔ'ɔtɔ na nwɛnɛ mɔlif,
bɛɛ waldaug kanɛ an bʋmpɔlli bɛ zuoya ni,
zin'ikanɛ ka bʋnnyubisa bɛ la.