Dau la:
5
1 M kpɛn' m lɔmbɔn'ɔgin la,m taʋn nɛ m pu'apaala.
M la'asi m bʋnnyubisa la.
M di m sinkpaam nɛ li mantigan'ama la;
ka nuu m daam nɛ m bin'isim la.
Dau la zuanam la pian' tisi ba:
Dimmi, yanam banɛ an m zuanama, dimi ka nu;
dim tigi yanamɛ bɔɔd si'em, m ya'ambʋnama.
Pu'asadir la:
2 M gbis ya ka m pʋtɛn'ɛr lɛɛ nɛi.
Kɛlisima! Onɛ ka m nɔŋ la nwɛ'ɛd dɔɔg za'anɔɔr la ye,
Dau la:
“Yɔ'ɔgim tisim, m taʋn nɛ m ya'ambʋnnɛ,
fʋ anɛ m dawan, ka paae m ya'am.
M zug la wʋsa yʋdignɛ nɛ mɛligim,
ka m zuobid ma'ae yʋ'ʋŋ la wʋsa.”
Pu'asadir la:
3 Mam pʋn yɛɛgi m fuug sa,
m na lɛn yɛɛ li ya'asɛɛ?
Mam pie m nɔba sa,
m na lɛn yɛɛ m la'ad ka kɛ ka li miligɛɛ?
4 M ya'ambʋn tiɛn o nu'ug dɔɔg za'anɔɔrin,
ka m ya'am pin'ili tuod o yɛla.
5 M duonɛ ye m yɔ'ɔg ka o kpɛn' na
ka mir linɛ nyuusid hali la taae m nu'us.
Man gban'e kʋlʋŋ la linɛ yɔ'ɔgid la.
6 M yɔ'ɔg za'anɔɔri tisim ya'ambʋn la,
amaa ka o pʋn gaad sa.
On gaad la ka m sʋʋnr san'am,
ka m gɔs ka tɛn'ɛs ye m na nyɛɛ o amaa ka pʋ nyɛɛ o.
M buol o amaa o pʋ siakɛ.
7 Banɛ gur teŋ la duoe kaadi giligid la,
ba daa nyɛɛm,
ka bʋ'ʋm hali fiebi fieb;
ka faanm fuugʋ mɔri keŋ,
ba anɛ banɛ gur zaŋguoma la!
Pu'asadir la tu'asidi tisid o taaba la:
8 Jerusalem pu'asada, m bɛlimnɛ
ya ya'a nyɛɛm ya'ambʋn la,
ya na yɛl o ye bɔ?
Yɛlimin o ye, nɔŋir ma'aa kɛ ka m nwi'e.
O taaba la lɛbisid ye,
9 Fʋ sabua la vɛnli gat pu'ab wʋsaa,
fʋ ya'ambʋn la gat banɛ bɛ la wala?
Fʋ ya'ambʋn la gat ban la wala-wala,
ka fʋ bɛlimmi tii ala?
Pu'asadir la:
10 M ya'ambʋn la vɛnli nya'am-nya'am ka mɔr paŋ,
o bɛ nɛ o kɔn', tusa piiga la sʋʋgin.
11 O zug la anɛ sanlim sʋŋ;
o zuobid la nwɛnɛ ba pan'ami li nɛ
ka sɔbigi nwɛnɛ agaung.
12 O nini vɛnli nwɛnɛ dawan nɛ
bɛ kɔldaug nɔɔrin.
O nini pɛligi nwɛnɛ bin'isim ka o nɔki sʋʋd nɛ,
ka nwɛnɛ niŋgɔnkɔris ka o kɔr.
13 O kpɛnda nwɛnɛ vugus ka ba sɛ bʋnnyubisa tiis
O nɔŋgban nwɛnɛ na'apu'a-kʋ-si'is-ku'om nɛ,
ka mir linɛ nyuugʋ malis hali la tu'asidi yiti lit.
14 O kpʋkpama la nwɛnɛ sanlim daad
ka ba nɔki li bulig gɔtiŋin.
O niŋgbina nwɛnɛ wabʋg nyina ka ba saalimi li
ka maali li nɛ kugvɛnla.
15 O nɔba nwɛnɛ kugpiela zan'antɔlis
ka ba ba'a li nɛ sanlima zi'esa
Fʋ ya'a nyɛ o, o nwɛnɛ Lebanon zuoya
ka nwɛnɛ na'aziinr wila yaadim si'em la.
16 O nɔɔr muakir malis nɛ;
ka o si'el wʋsa mɔr ya'amlɛog.
Jerusalem pu'abaa,
m ya'ambʋn la an si'em nwa.