Dau la:
4
1 M ya'ambʋnnɛɛ, fʋ vɛnl hali!Fʋ sid vɛnl, oo!
Fʋ nini banɛ ka fʋ ligil la vɛnli nwɛnɛ dawan nini.
Fʋ zuobid la sɔbigi nwɛnɛ bʋʋsi
naan Gilead zuorin la wa'adi sigid na.
2 Fʋ nyina la pɛlignɛ nwɛnɛ pɛpielʋg kɔnbid,
nwɛnɛ pɛ'og kanɛ ka ba sʋʋ o ka o nan dʋt na.
Baa yinne kae pʋ mɔr o bu'arɛ,
baa yinne pʋ zi'e o kɔn'ɔkɔn'.
3 Fʋ nɔŋgban la mu'oenɛ vɛnl wʋʋ pien gum,
ka fʋ pian'ad la mɔr nɔŋilim.
Fʋ gbɛ'og la nie bɔbigin la naa vɛnl
ka gbilisi nwɛnɛ taba kiig.
4 Fʋ niŋgɔɔnr la nwɛnɛ David girimbisa
linɛ ka ba mɛɛ li ka li vɛnl;
ka fʋ kɔr niŋgɔnkɔris
wʋʋ ban ya'an zaba la'ad za'antɔligin si'em la.
5 Fʋ bin'isa ayi' la zi'enɛ sappi,
li nwɛnɛ walbibis banɛ an liiba
banɛ bɛ na'apu'a-kʋ-si'is-ku'om teŋsʋkʋ ɔnbid yam.
6 Ya'a ka' bɛog ti nie
ka zibisim la gaadɛ,
m na bɛ zuoya la zin'ikanɛ ka bʋnnyubisa
linɛ an frankinsense nɛ mir bɛ la ni.
7 M ya'ambʋnnɛɛ, fʋ vɛnlim la bɛ nɛ zin'ig wʋsa;
fʋ pʋ mɔr gba'arɛ.
8 Dɔllim ka ti yi Lebanon teŋin,
ɛɛn, m pu'apaalaa, dɔllim ka ti yi Lebanon na.
Kɛl ka ti la'am naan Amana zuorin la sig na,
ka naan Senir nɛ Hemon zuoya la zugɔ sig na.
Yim gbigima buugin la
nɛ zuoya linɛ an wɛbaas gbɛɛnsir la ni.
9 Fʋ fɛndigi m ya'am, m taʋn nɛ m pu'apaala;
fʋ fɛndigi m ya'am.
Fʋ gɔsig yimmʋ,
nɛ fʋ niŋgɔnkɔris la fɛndigi m ya'am.
10 M taʋn nɛ m pu'apaala,
fʋ nɔŋir la mɔr ya'amlɛog!
Fʋ nɔŋir la malisi gaad damalisiŋ,
ka fʋ tudaari la nyuug malisi gaad bʋnnyubisa wʋsa!
11 M pu'apaala,
fʋ nɔɔr malisi nwɛnɛ sinkpaam tu'asid nɛ;
bin'isim nɛ siind bɛɛ fʋ zilimin la.
Fʋ fuug la nyuug nwɛnɛ bʋnnyubisa
nɛ li buudi wʋsa banɛ bɛ Lebanon teŋin nɛ.
12 M pu'apaal nɛ m taʋn,
fʋ nwɛnɛ lɔmbɔn'ɔg ka ba yɔɔ lɛbis;
fʋ anɛ bulkanɛ bɛ pʋʋgin,
bulkanɛ ka ba taasi li nɔɔr.
13 Fʋ tiis pɔɔg la anɛ pomanganɛt linɛ vɛnl.
Li wan walsʋma ka mɔr nyuug linɛ malis.
14 Bʋnnyubisa tiis buudi wʋsa bɛɛ ani,
la'am nɛ frankinsense nɛ mir
nɛ bʋnnyubisa banɛ bɛ wʋsa.
15 Fʋ anɛ lɔmbɔn'ɔgin bulkanɛ ka ku'om bʋnnɛ
naanid Lebanon zuoya zugʋ pʋbidi sigid na.
Pu'asadir la:
16 Pɛbisʋg kanɛ yit ya-datiuŋ naa, duom!
Pɛbiskanɛ yit ya-dagɔbʋgɔ, kem na!
Lɔmmi pɛbisim gɛɛlini m lɔmbɔn'ɔg la,
ka li nyuug la widigi gilig zin'ig wʋsa.
M ya'am bʋnnɛ, kemi m lɔmbɔn'ɔgin la na
lɛmim tiis la walmalisa linɛ bɛɛ ani la.