3
1 M diginnɛ m kɔn'ɔkɔn' gadʋg zug yʋ'ʋŋ la wʋsaka bɔɔd onɛ ka m ya'am nɔŋ hali la;
M iee o zin'ig hali ka pʋ nyɛ o.
2 M na duoe nannanna gilig tempʋʋg la,
m na gilig suoraad la nɛ lɔdis la wʋsa;
man na iee onɛ ka m nɔŋ nɛ m sʋnf wʋsa la.
M sid iee o hali ka pʋ nyɛ o.
3 Dap banɛ gur tempʋʋg nyɛ mam, ban daa kaadi giligid la, ka m bu'osi ba ye,
“Ya nyɛ onɛ ka m nɔŋ hali laa?”
4 Man fansigi gaad la nɔɔ,
ka keŋ tuon bi'ela ka nyɛ m ya'am bʋn la.
Man nyɛ o la.
M gban'e o nu'ug ka pʋ siak ye m bas o ka o keŋɛ,
ka mɔr o tat-tat nɛ man ti mɔr o paae m ma yin na
kpɛn' onɛ da nɔki m pʋʋg la dɔɔgin.
5 Yanam Jerusalem pu'asada,
pɔɔmi nɛ bʋnkɔnbkanɛ ka ya pɔɔd la ye,
ti nɔŋir la kʋ san'am.
Da tiɛnd nɔŋir yɛla ka li saŋa nam pʋ paae.
6 Anɔ'ɔnɛ nwa yi pipirigini kenna
nwɛnɛ nyɔ'ɔsi duoda?
O nɔk tudaari nɛ bʋnnyubisa banɛ bɛ wʋsa,
linɛ ka banɛ kuosid la'ad mɔr la, mis o mɛŋ.
7 Gɔsima! Li anɛ Solomon ka ba ziid
ka zabzabidib banɛ kpi'em ban pisyuobʋ dɔl o,
ba anɛ Israel zaba tuongatib kpɛɛmnam.
8 Ba wʋsa mɔr zaba sʋ'ʋs,
ba wʋsa mɛ mi' zaba sʋ'ʋŋa.
Sɔ' wʋsa mɔr o sʋ'ʋg ka li bɛɛ o sakpidirin
gur zabaa na ti kɔ' yʋ'ʋŋ.
9 Na'ab Solomon mɛŋi kpa' linɛ ka ba nɔki ziid o la;
dasʋma linɛ yi Lebanon na la ka o nɔki maal.
10 Li daad la buligi nɛ anzurifa,
li gbinnin la ba bulig nɛ sanlima.
Fupipɛlʋg ka ba nɔki maali li zin'isa la.
Li anɛ Jerusalem pu'asada la ʋgi li nɛ nɔŋilim.
11 Zion teŋ pu'asadaa, yimi naa
gɔsi Na'ab Solomon pid o na'am zupibig si'em.
Na'am zupibig kanɛ ka o ma da nɔki pil o
o pu'adiir malʋŋ dabisir daar la,
daakan la ka o sʋnf da ma'ae hali.