2
1 M nwɛnɛ mɔɔd puum linɛ mu'oeka vɛnl hali bɛ bɔn'ɔgin la.
Dau la:
2 Nwɛnɛ puum kanɛ vɛnl ka bɛ gɔn'ɔs sʋʋgin si'em la
ala ka m ya'am bʋn bɛ pu'asada sʋʋgin.
Pu'asadir la:
3 Nwɛnɛ apʋl tiigi bɛ mɔɔgin tiis sʋʋgin si'em la
ala ka onɛ aan m ya'am bʋn la mɛ bɛ na'akim sʋʋgin.
M ya'am bɔɔdnɛ hali ye m zin' o ma'asim,
ka o wala mɛ malisi m nɔɔrin hali.
4 O mɔrimi keŋ diib zin'igin,
ka pa'alim o nɔŋilim kanɛ nwɛnɛ fuugʋ lusim la.
5 Tisimi m tiis wala ka m di ka paam paŋ,
tisimi m apʋl linɛ an tiig wala la ka m di ka m nini lak;
ka nɔŋir kɔ'ɔm ma'aa kɛ ka m nwi'e.
6 O nɔk o dagɔbʋg nu'ug la kʋki m zug,
ka o datiuŋ nu'ug la kuakim.
7 Yanam Jerusalem pu'asada,
pɔɔmi nɛ bʋnkɔnbkanɛ ka ya pɔɔd la ye,
ti nɔŋir la kʋ san'am.
Da tiɛnd nɔŋir yɛla ka li saŋa nam pʋ paae.
8 Kɛlisima! M ya'am bʋnnɛ! Gɔsima, onɛ ka m nɔŋ la kenna,
o yi zuoya la nii kenna,
o ian'asid kʋkʋna nii kenna.
9 Onɛ ka m nɔŋ la nwɛnɛ walig bɛɛ mɔlif nɛ.
Gɔsima! Onɛ zi'e ti yampʋn la.
O gbɛlisidi gɔsid takoro la ni na,
ka gɔsid vɔnya la ni.
10 Onɛ ka m nɔŋ la yɛlim ye,
Dau la:
Duoma, m ya'am bʋnnɛ,
m sʋnf bʋnnɛ, kem na dɔllim.
11 Gɔsima! Sɛɛung gaad ya
saa pʋ lɛn niida.
12 Puum yit teŋin la;
yʋʋma saŋa paae ya,
ka dawana kaasidi
ti teŋ la zug.
13 Kekama tiis pin'ili wan waldɛɛnna;
ka vain tiis la puum nyuug pɛ'ɛl zin'ig wʋsa.
Duom, kem na, m nɔŋirɛ;
m ya'ambʋnnɛɛ, kem na ye!
14 Fʋ anɛ m dawan, onɛ bɛ tampiins lɛuŋʋn
ka kpɛn' suak zin'igin zuoya la ni.
Kɛl ka m nyɛ fʋ nindaa;
ka kɛ ka m wʋmi fʋ kʋkɔr
ka fʋ kʋkɔr malis nɛ hali,
ka fʋ nindaa vɛnl amɛŋa.
15 Gban'am zaŋsiris la tisi ti,
gban'am zaŋsirbibis banɛ san'am vain tiis pɔɔg
saŋkanɛ ka tiis la puud la.
Pu'asadir la:
16 Man anɛ m nɔŋir la din ka on mɛ aan m din;
ka mɔr o pɛ'ɛs la bɛ na'apu'a-kʋ-si'is-ku'om pʋʋgin ka ba ɔnbidi giligid.
17 Sɛɛ bɛog ti nie
ka zibisʋg gaad;
fɛndigim na, m ya'am bʋnnɛ,
nwɛnɛ mɔlif bɛɛ walig
kanɛ bɛ kʋkʋna la ni.