Sɛnlʋŋ Yʋʋma
1
1 Solomon Yʋʋm malisiŋ linɛ gaad o yʋʋma la wʋsa:Pu'asadir la pian'ad dau kanɛ ka o nɔŋ la ye,
2 Muakimim nɛ fʋ nɔɔr
ka fʋ nɔŋir la gaad damalisiŋ.
3 Fʋ yʋ'ʋr la nwɛnɛ tudaar kanɛ nyuugʋ malis
ka ba kpa'ae ka li nyuug tiig zin'ig wʋsa nɛ.
Bi'esʋg kae nɛ pu'asada nɔŋif la!
4 Mɔrim ka ti yi! Kɛl ka ti keŋ tɔ'ɔtɔ!
Kɛl ka m na'ab la mɔrimi keŋ o dɔɔgin.
Pu'asadir la zuanam yɛt dau la ye,
Ti bɔɔdi fʋ yɛla ka mɔr sumalisim fʋ yɛla;
ti na zun'e fʋ nɔŋilim gaad damalisiŋ.
Pu'asadir la mɛŋ:
Asida, li nar ye ba zun'ʋf!
5 Mam anɛ sabilig, la'am nɛ wala m vɛnl hali.
Yanam Jerusalem pu'asada
sɔbig nɛ nwɛnɛ Kedar teŋ dim sʋga nɛ,
amaa ka nwɛnɛ Solomon dɔɔg fuvɛnla la.
6 Da gɔsidim kii, man an sabilig la zugɔ,
nintaŋi nwɛ'ɛm la zug ka m sɔbig.
M tanp la wʋsa sʋnf daa pɛlig nɛ mam
ka ba kɛ ka m guri ba vain pɔɔd,
dinzug ka m basim mɛŋ vain pɔɔg la.
7 Fʋn kanɛ ka m nɔŋ la,
yɛlimim fʋn kemmi fʋ kɔnbid la zin'isi'a,
nɛ winnigi ɛɛnti bul ka kɔnbid la vʋ'ʋsid zin'isi'a?
Bɔ ka m na nwɛnɛ pu'a kanɛ ka ba lus o nindaa ka o su'a
dɔlli ya'adi fʋ zuanam kɔnbidɛ.
O zuanam la yɛt, ye,
8 Oi! Pu'a vɛnliŋa,
fʋ ya'a zi', asɛɛ fʋ kadi m kɔnbid la buga,
ka mɔri fʋ bʋbibis la keŋ
ka ba ɔnb yam kɔnbkemnib la sʋgaa bɛ si'el la.
9 M ya'am bʋnnɛ, m nɔki fɔ maki nɛ wiednya'as banɛ gat Na'ab Faaro zaba tɛrekonam tuon la.
10 Fʋ kpɛnda la vɛnli nɛ tʋblɛma hali,
ka sanlima niŋgɔnkɔris pɛ'ɛli fʋ niŋgɔɔnr.
Pu'asadir la zuanam ye,
11 Ti na maal sanlima tʋblɛma,
nɛ anzurifa baansi tisif.
Pu'asadir la:
12 Na'ab la daa zin'in ye o di la,
ka m tudaari la nyuug duoe.
13 M ya'ambʋn la nwɛnɛ kpaam kanɛ nyuugʋ malis hali
ka li pa'ae m bin'isa zug.
14 M nɔŋir la nwɛnɛ puum linɛ widigi vɛnl
ka bɛ En-Gedi vain pɔɔgin la.
Sabua, dau la:
15 M ya'am bʋnnɛ, fʋ vɛnl woo!
Fʋ sid vɛnl hali!
Ka fʋ nini la nwɛnɛ dawan nini.
Pu'asadir la:
16 Fʋ vɛnl hali, m nɔŋirɛ,
ka m nini sid tigif!
Mɔma'asa la na aan ti digisig zin'ig.
17 Na'aziinr tiis la na an ti dɔɔg la datitada;
ka dɔɔns la na aan li yu'ada.