Agur siilima
30
1 Jake biig Agur nimmua pian'akanɛ ka o pian' tis Itiel la nwa. O pian'anɛ tis Itiel nɛ Ukal ye,“Wina'am, m gɛnnɛ;
Wina'am, m gɛnnɛ ka ligid.
2 Man anɛ zi'ilim sɔb ninsaalib wʋsa sʋʋgin;
M pʋ mɔr ya'am kanɛ ka ninsaalib mɔr laa.
3 M pʋ zamis ya'am,
bɛɛ mɔr baŋir Onɛ an Kasi la yɛlaa.
4 Anɔ'ɔnɛ dʋ arezana ni ka sig na?
Anɔ'ɔnɛ nam mi' gban'e pɛbisim nɛ o nu'ugɔ?
Anɔ'ɔnɛ nam mi' pɔnbil ku'om nɛ fuugɔ?
Anɔ'ɔnɛ digil teŋgbauŋ la bɛn wʋsa ɛɛnbirɛ?
O yʋ'ʋrɛ? Ka o biig la yʋ'ʋrɛ?
Fʋ ya'a mi' fʋn yɛlimim!
5 Wina'am pian'ad wʋsa anɛ sida nyain;
o anɛ gbanti'edʋg banɛ ieed suak zin'ig o san'an la.
6 Da paas si'el o pian'ad la zugɔ,
ya'a ka' ala o na tansif ka li pa'al ye fʋ anɛ ziri sɔb.
7 Bʋnama ayi' ka m sɔsidif, O Zugsɔba;
tʋmmi li tisim man nan vʋe la.
8 Kɛl ka faad nɛ dama'am lal nɛ m
ka da kɛ ka li bɛɛ m san'anɛ.
Mɛ da kɛ ka m an nɔŋdaan tapigif bɛɛ m mɔri galisɛ,
amaa tisimim linɛ na sia'alim dabisir wʋsa.
9 Ya'a ka' ala m na mɔr bɛdegʋ ka tami fʋ yɛla
ka yɛl ye, ‘Zugsɔb la aan anɔ'ɔnɛ?’
Bɛɛ m an nɔŋdaan ka zu,
ka li san'ami m Wina'am la yʋ'ʋr.
10 Da zɛrig tʋmtʋmi tis o zugdaana,
ka o na pɔ nɔɔri tisif, ka fʋ nyɛ li namisʋg.
11 Ninsieba bɛɛ pɔɔd nɔya tisidi ba saamnam
ka pʋ kaanbid sʋ'ʋm tisidi ba manama.
12 Nimban gɔsi ba mɛŋ ka ba anɛ kasi
ka zi' ye ba lɛɛ anɛ dian'ad dima.
13 Ba anɛ nimpʋnannib
ka pʋ gɔsid nidibi nyɛta.
14 Ba nyiidi nidib
ka ba yier mɔr linɛ nwɛnɛ zaba sʋ'ʋs nɛ.
Ka ba mugusid nɔŋ dim banɛ bɛ teŋin la
nɛ banɛ an fara dimi bɛ nidib sʋʋgin la.
15 Adanyɔb mɔri bipumis ayi'
ka ba kaasidi yɛt ye, ‘Tisim! Tisim!’
Ka pʋ tigida.
Ala ka bʋnam atan' bɛɛ nan zi' tigɛ,
ka bʋnam anaasi nan zi' yɛl ye, ‘Li sia'al yaa!’
16 Bama anɛ: yaʋg nɛ kʋndu'ar
nɛ teŋ kanɛ zi' tig ku'om.
Bugum mɛ nan zi' yɛl ye, ‘M dii sia'alɛ!’
17 Ninkanɛ nɔk o ba' maal bʋnla'adir
ka nɛ'ɛsid o ma ka pʋ di'ed o nɔɔr la,
agaand na yi bɔn'ɔgin na nwɛ' ba gaad wʋʋ silʋg nɛ,
ka zuund dii ba.
18 Bʋnama atan' bɛɛ an nyalima tisim,
anaasi ka m pʋ gban'e li gbinnɛ.
19 Bama anɛ: silʋg suor saŋgbana ni,
waaf suor tampiing zug,
anrʋŋ tita'ar suor atɛukʋn,
nɛ dau nɛ pu'asadir nɔŋir suoya.
20 Pu'a kanɛ maal o mɛŋ pu'agɔɔndir suoya an si'em nwa:
o ɛɛn dinɛ ka pie o nɔɔr.
Ka li pa'al ye o na san'am dau ka zɔɔ keŋ sʋ
ka ki'isi yɛl ye, ‘Mam pʋ maal si'ela.’
21 Bʋnam atan' ka teŋgbauŋ la nyɛt ka kirid,
bʋnam anaasi ka o kʋ nyaŋi ba.
22 Bama anɛ: Sankpan'asi na di na'am,
nɛ zɔlʋgʋ na di diibi tig,
23 pu'a kanɛ ka nidib pʋ bɔɔd o la na kul sid,
nɛ pu'a-ɛliŋi na kad yipu'a ka lɛdig.
24 Bʋnam anaasi bɛ teŋgbauŋ la zugʋ pɔɔd,
amaa ka ba paŋ lɛɛ galis nɛ.
Bama anɛ:
25 salinsa'as banɛ ka ba paŋ pɔɔd
la'am nɛ wala ka ba su'adi ba diibi paad dɔnwalig;
26 bʋnvʋbaanlʋg banɛ ka ba paŋ pɔɔd,
la'am nɛ wala ka ba maali ba gbɛɛnb zin'ig tampiins sian'asimin;
27 na'azɔmnam pʋ mɔr na'aba,
la'am nɛ wala ba kennɛ salililili;
28 fʋ na nyaŋi gban'e akɔn'ɔs nɛ nu'ug,
la'am nɛ wala ba bɛ na'ayin.
29 Bʋnama atan' bɛ ka fʋ nanɛ ba ken,
bʋnama anaasi kennɛ ba ya'amin.
30 Bama anɛ: gbigim onɛ kpi'emi gat bʋnkɔnbid wʋsa,
ka ken ka si'el pʋ vi'id o la;
31 nɔraug kanɛ ken nɛ nyɛɛsim,
nɛ bʋraug nɛ na'ab kanɛ ka o soogianam gilig o.
32 Fʋ ya'a an zɔlʋg ka dʋ'ʋsi fʋ mɛŋ,
bɛɛ fʋ gban'anɛ gban'abɛ'ɛd,
nɔkimi fʋ nu'usi pin' fʋ nɔɔr.
33 Bɔzugɔ, nwɛnɛ bin'isgbisidim yisid bin'iskpaam,
ka nyɔnya nwɛ'ɛb yisid ziim si'em la,
ala mɛn fʋ ya'a kɛ ka sʋnpɛɛn duoe
li ziidnɛ zaba na.”