Na'ab Lemuel ma sa'alʋg
31
1 Na'ab Lemuel maa pa'al o pian'asieba nwa:2 “M biiga, m mɛŋ pʋʋgin biiga,
M nɔɔr kaanbʋg biiga,
3 da mɔri fʋ paŋi san'amid nɛ pu'aba,
da mɔri fʋ daulim ken banɛ san'amid na'anam la san'anɛ.
4 M biig Lemuel, li ka' na'anam tʋʋma la,
li ka' sʋm ye na'ab nuud daam,
bɛɛ banɛ sʋ'oe tɛɛns la bɔɔd dankpi'ema;
5 ba ya'a nu, ba na tam wada la yɛl si'em la,
ka kad banɛ ka nidib mugusidi ba la saria ka mɔŋi ba bʋʋd.
6 Nɔkim dankpi'ema tis banɛ bɔɔd kum la ka ba nu,
sʋnsa'aŋ dimi bɔɔd daam;
7 kɛl ka ba nu ka tami ba nɔŋ la yɛla
ka mɛ da lɛn tiɛnri ba fara la yɛla ya'asɛ.
8 Pian'am sʋŋ banɛ kʋ nyaŋi pian' ba mɛŋ yɛla la,
ka sʋŋ banɛ mɔr bʋʋd ka pʋ mɔr sʋŋir la.
9 Pian'am ka kad saria ka li dɔl suor;
ka zabi sʋŋ nɔŋ nɛ fara dim.”
Pu'a kanɛ kik ka mi' o mɛŋ mɔrim
10 Anɔ'ɔn kimm lɛɛ na nyaŋi paam pu'a kanɛ an pu'amɛŋa?
O gaad fʋn na mɔr sanlim.
11 O sid ti'ir wʋsa bɛ nɛ o san'an
ka linɛ an bʋnsʋŋ wʋsa pʋ kɔ'ɔŋid o san'anɛ.
12 O vʋm pʋʋgin wʋsa,
o maannɛ o sid sʋ'ʋŋa ka gbɛlʋŋ kae.
13 O kpɛ'ɛŋid o mɛŋi gaansid gum sʋŋʋ
nwiid ka ʋgʋd piena.
14 O nwɛnɛ anrʋŋ kanɛ ka ba mɔri kpiisid,
o ziidi diibi yit lalli sa kenna.
15 O na dɛŋi duoe ka bɛog nam pʋ nie
maal diibi tis o yidim
ka pa'al o yir tʋmtʋm bipumis la sɔ' wʋsa nɛ o tʋʋma.
16 O ɛɛnti gɔs nɛ paalʋ kanɛ an sʋm ka da' li:
on tʋm nyɛ si'el la ka o nɔki kuo pɔɔg.
17 O anɛ onɛ tʋmm o tʋʋma nɛ nimmua;
o kpi'em o tʋʋma ni ka pʋ lɛbid nya'aŋa.
18 O mi' ye o kpikpiŋ an sʋm ka li tisid o nyɔɔd;
o na tʋm ka yʋ'ʋŋ ti kena sɔb.
19 Onɛ kaad o mɛŋ gum,
ka ʋgid o mɛŋ fuud.
20 O sʋŋidi nɔŋ dim
ka mɛ pʋ mɔŋid fara dima.
21 Waadi bɛ daasi'el hali la, dabiem pʋ mɔr o, o yidim yɛlaa;
bɔzugɔ ba wʋsa mɔr waad fuud.
22 O mɛŋi maan fubanɛ na yadig gadʋg;
ka sɔɔnd fuud banɛ pɔnri vɛnl.
23 Ba na'asid o sid wʋrʋg sʋʋgin,
zin'ikanɛ ka o zin' nɛ teŋ la kpɛɛmnam la.
24 O sɛɛnd fuudi kuosid,
ka banɛ kpiisid la kennɛ o san'an na da'ad sɛnbidis.
25 O mɔr paŋ nɛ girima;
ka bɛog sa o saa na zin' ka dit ka maan sumalisim.
26 O pian'adi nɛ ya'am
ka on pa'an si'el wʋsa an sida.
27 O gɔsid o yir sʋ'ʋŋa
ka pʋ mɔr gbanya'am ka na kɔ'ɔŋ diibɔ.
28 O biis na duoe na ka kaanb, kaanb sʋŋʋ tis o;
ka o sid mɛ na faas o ka ye,
29 “Pu'ab bɛdegʋ tʋm tʋʋm sʋma,
amaa fʋ gaadi ba wʋsa.”
30 Fʋ ya'a bɔbi fʋ mɛŋ nɛ fusʋma, li bɛligidnɛ nidib
ka vɛnlim wʋsa mɛ na gaad;
amaa pu'a kanɛ na'asid Zugsɔb la nar ye ba zun'e o.
31 Tisim o yɔɔd linɛ nar ye o di'e la,
ka kɛ ka o tʋʋma la tis o girima nidib la'asʋg zin'igin.