28
1 Onɛ an bugus la zɔti ka sɔ' pʋ kat oo,amaa pʋpielim sɔb la na mɔr sʋnkpi'euŋ wʋʋ gbigim nɛ.
2 Zaba ya'a ti kɔ' teŋin, banɛ sʋ'oe teŋ la anɛ bɛdegʋ,
amaa ninkanɛ mɔr ya'am nɛ baŋir la
na kɛ ka si'el wʋsa ken sʋ'ʋŋa.
3 Nɔŋ daan onɛ mugusid o taaba la
nwɛnɛ saa na niidi da'ad nɛ paŋi san'amid zʋʋd.
4 Banɛ pʋ dɔl wada la faasid bugusnam,
amaa banɛ dɔl wada la pʋ siakidi li'ennɛ baa.
5 Nimbɛ'ɛdnam pʋ gban'ad sida gbinnɛ,
amaa banɛ zɔt Zugsɔb la gban'adi li gbin sʋ'ʋŋa.
6 Fʋ ya'a an nɔŋdaan ka an burikin
sɔn'oe fʋn na mɔr kpan'am ka fʋ bɛllim pʋ dɔl suorɛ.
7 Onɛ dɔl wada la anɛ bikanɛ mɔr pʋtɛn'ɛr,
amaa onɛ dɔl dindiisnam la diisid o ba' nyan.
8 Onɛ di'esid nyɔɔd bɛdegʋ maan kpan'am digin la,
o sɔb la'asidnɛ diginɛ tisid onɛ na zɔt nɔŋ dim nimbaanlig.
9 Onɛ li' o tʋba ka pʋ dɔl wada la,
hali o winsɔsʋg anɛ linɛ ka Zugsɔb la kis.
10 Onɛ nɔk pʋpieli dɔlisid suobɛ'ɛd,
o sɔb na lii o mɛŋ baŋin;
amaa banɛ pʋ mɔr gba'ar la na di faar linɛ an sʋ'ʋŋa.
11 Bʋmmɔr na tɛn'ɛs ye o mɔri ya'am,
amaa nɔŋdaan onɛ an ya'am sɔb la mi' o gbin.
12 Pʋpiel ya'a ti paam paŋ, nidib maannɛ sumalisim;
amaa nimbɛ'og ya'a sʋ'oe teŋ, nidib zɔti su'ad.
13 Onɛ su'ad o tʋʋmbɛ'ɛd kʋ keŋ tuonnɛ,
amaa onɛ viig o tʋʋmbɛ'ɛdi tu'as
ka zan'asi li na nyɛ nimbaanlzɔɔr.
14 Albareka bɛ nɛ onɛ zɔt Zugsɔb la;
amaa onɛ digilim o sʋnf la na kpɛn' yɛla ni.
15 Ninkanɛ sʋ'oe nidib ka an bugus la
nwɛnɛ gbigimi na nwa'am bɛɛ mɔɔgin bʋnyua.
16 Onɛ sʋ'oe teŋ ka pʋ mɔr pʋtɛn'ɛsʋma la mugusidi nidib,
amaa onɛ kis zam la nyɔvʋr na wa'am.
17 Da mɔɔd ye fʋ sʋŋ ninkanɛ kʋ nida;
kɛl ka o kennɛ o kɔn'ɔkɔn' ti paae o kum daar.
18 Onɛ ken ka pʋ mɔr gba'ar la na bɛ nɛ laafi,
amaa onɛ bɛllim pʋ dɔl suor la na nyɛ kʋʋsbɛ'ɛd.
19 Onɛ kuod na paam diib bɛdegʋ,
amaa onɛ yaannɛ gin zaalim-zaalim nɔŋ na kʋʋ o.
20 Ninkanɛ an sida sɔb na nyɛ bareka,
amaa onɛ mɔɔd ye o nyɛ kpan'am tɔ'ɔtɔ
kʋ keŋ zaalim ka da di'e namisʋgɔ.
21 Fʋ ya'a maan baregaŋ li ka' sʋm;
la'am nɛ wala diib bi'ela yɛla ma'aa zug sɔ' na maal bɛ'ɛd.
22 Ninkanɛ tɛn'ɛsid o mɛŋ yɛla ma'aa
ka mɔɔd on na niŋ si'em nyɛ kpan'am,
on sɔb zi' ye nɔŋ bɛ suori gur oo.
23 Fʋ ya'a sa'al sɔ', li nya'aŋ fʋ na nyɛɛ li na'asi
gaad onɛ pian'ad nɛ nɔmalisim ka sida kae.
24 Ninkanɛ zuu o ba' nɛ o ma
ka yɛl ye, “Li ka' bɛ'ɛdɛ”;
on nɛ na'ayiig anɛ yinne.
25 Dindiis anɛ onɛ ieed yɛla,
amaa onɛ tis Zugsɔb la sida na ken tuon.
26 Onɛ ti'e o mɛŋ paŋ la anɛ zɔlʋg,
amaa onɛ mɔr ya'am ken la, daamʋg kʋ paae oo.
27 Onɛ tisid tadimnam piini, si'el kʋ pɔ'ɔg o;
amaa onɛ fɛndig o nindaa bidi ba la, ba na pɔɔ o nɔɔr.
28 Nimbɛ'og ya'a ti sʋ'ʋg teŋ, nidib zɔtnɛ su'ad;
amaa bugusnam la ya'a ti paam san'auŋ
pʋpielnam la kpɛn kennɛ tuon.