27
1 Da dʋ'ʋsidi fʋ mɛŋ bɛog yɛllɛ,ka fʋ zi' bɛogʋ saa na an si'em.
2 Kɛl ka sɔ' dʋ'ʋsif
ka da dʋ'ʋsidi fʋ mɛŋa.
3 Kugir tɛbis ka titan mɛ an zitɛbisʋg,
amaa zɔlʋg daamʋg gat bama ayi' la wʋsa.
4 Sʋnpɛɛn nɛ ɛndʋg anɛ bɛ'ɛd ka na nyaŋi zi san'auŋ na,
amaa anɔ'ɔn na nyaŋi zi'en fufum sɔb tuonnɛ?
5 Fʋ ya'a pian' nyain sa'al nid
li sɔn'oe fʋn na su'a nɔŋ o.
6 Fʋ zua ya'a pu'alimif,
li sɔn'oe fʋ dataa na nɔk o nu'ugʋ kuaki fʋ niŋgɔɔnr.
7 Onɛ dii tig la pʋ bɔɔd siindɛ,
amaa nid kɔ'ɔm ya'a zabid, hali bʋntɔɔg gba malis o nɔɔrin.
8 Nid ya'a yidig o yisuor
li nwɛnɛ niiŋe na yidig o tɛog nɛ.
9 Tudaar nɛ bʋnnyubisa ma'ad sʋʋnr,
ka sɔ' sumbʋgʋsʋm yit nɛ on nyɛɛ o zua sa'alʋg si'em.
10 Da tami fʋ zuanam nɛ fʋ ba' zuanam yɛlaa
mɛ da kennɛ fʋ ba'abiisin saŋa kanɛ ka yɛla paaf ma'anɛ;
fʋ ya'a mɔr kpi'a onɛ an sʋm sɔn'oe fʋn na mɔr ba'abiig kanɛ bɛ lalli sa.
11 M biiga, mɔr ya'am, ka kɛ ka m sʋnf malis;
ala ka sɔ' ya'a nɛ'ɛsim, m mi' man na lɛbis o si'em.
12 Pʋtɛn'ɛr sɔb dɛŋidnɛ nyɛt yɛltɔɔg ka luakid,
amaa zɔlʋg on na gaad tuonnɛ nyɛ namisʋg.
13 Nɔkim onɛ kaanb ye o na yɔ saan sam la fuug;
o ya'a niŋ ala tis pu'agɔɔndir fʋn mɔr fuug la ka li zi'e sam la zi'esim!
14 Fʋ ya'a tansi pʋ'ʋsi fʋ zua bɛkɛung asuba,
o na nɔki li ka li nwɛnɛ nɔpɔɔr ka fʋ tis o nɛ.
15 Pu'a kanɛ nɔŋ zaba
nwɛnɛ saa na niid ka ku'om yun ka pʋ gu'oda.
16 Fʋ ya'a ye fʋ gu' o, li nwɛnɛ fʋn na mɔɔd ye fʋ gu' sisi'em
bɛɛ fʋn na mak ye fʋ gban'e kpaam nu'ugin nɛ.
17 Kunti saasid kʋnt si'em la,
ala ka nidib mɛ zamisidi yiti ba taaba san'an.
18 Onɛ sɛ tiig onɛ na dii li nyɔɔd,
onɛ tʋmmi tisidi o zugdaan na mɔr na'asi.
19 Ninsaali gɔsid ku'omin ka nyɛt o nindaa si'em la,
ala mɛn ka sɔ' wʋsa mɛŋ sʋnf niedi pa'an on an sɔ'.
20 Kum nɛ yaʋgʋ vɔn ka pʋ tigid si'em la,
ala ka ninsaal nini mɛ gɔsid ka pʋ tigida.
21 Bugum ka ba mɔri nyɛligid anzurifa nɛ sanlima
siligid ka li yit nyain,
amaa ba makid ninsaal nɛ on nyɛt na'asi si'em.
22 Fʋ ya'a bɔɔd fʋn tuom zɔlʋg tuodirin,
bɛɛ nɛɛm o wʋʋ zɔm nɛ,
fʋ kʋ nyaŋi yis zɔlimis linɛ bɛɛ o pʋʋgin laa.
23 Baŋimi fʋ kɔnbid la bɛllim an si'em,
ka guri fʋ niigi la sʋ'ʋŋa;
24 ka kpan'am pʋ bɛ saŋa wʋsa,
bɛɛ na'am zi'e sʋ'ʋŋa zʋmaana wʋsa nii.
25 Fʋ ya'a kie yaama ka mɔpaalig yina,
ka la'as mɔbanɛ bɛ kʋkʋna ni na,
26 pɛ'ɛs la kɔnbid na tisif gum ka fʋ ʋg fuud
ka kuos bʋʋs la da' pɔɔg.
27 Fʋ na mɔr bʋʋs bin'isim bɛdegʋ
ka fʋn nɛ fʋ yidim nuud
ka ugusi fʋ sankpan'asnam banɛ an bipumis la.