26
1 Nwɛnɛ saa pʋ nar ye li niid bunib saŋabɛɛ sakuga lit dɔnwalig saŋa si'em la,
ala ka zɔlʋg pʋ nar nɛ na'asii.
2 Nɔpɔɔr linɛ ka' gbin la
na bus kpʋkpama iank wʋʋ lʋʋr bɛɛ lilaaliŋ.
3 Wief din anɛ sisanbig, bʋŋ din anɛ ba li'e o,
ka zɔlʋg din mɛ an bʋ'ʋd!
4 Zɔlʋg ya'a bu'osif zɔlim bu'osʋg,
fʋn da gandig o zɔlim gandigirɛ,
ya'a ka' alaa, fʋn nɛ on na nwɛn taaba.
5 Lɛbisim zɔlʋg wʋʋ on bu'os si'em la
ya'a ka' ala o na tɛn'ɛs ye o mɔri ya'am.
6 Fʋ ya'a tʋm zɔlʋg
li nwɛnɛ fʋn na ki'e fʋ nɔbir nɛ lieŋe bas, bɛɛ nu yabid.
7 Nwɛnɛ pɔn'ɔr nɔbiri zaanlim si'em la,
ala ka zɔlʋg siiliŋ mɛ aɛn.
8 Fʋ ya'a na'as zɔlʋg,
li nwɛnɛ fʋn na niŋ kugir luobʋgʋni vɛnlig.
9 Zɔlʋg ya'a siilim siiliŋ,
li nwɛnɛ danuudi na yɛl ye o yis gun'a o nu'ugin nɛ.
10 Onɛ buol zɔlʋg bɛɛ ningɔɔndir ye o kena tʋm baadi tʋʋma
nwɛnɛ onɛ tɔɔnd piema yɔri-yɔri pu'alim nidib.
11 Baa tiind ka lɛbidi dit si'em la,
ala ka zɔlʋg mɛ tʋmm o zɔlim tʋʋma takid.
12 Fʋ nyɛ ninkanɛ tɛn'ɛs ye on mɔr ya'am hali laa?
Zɔlʋg sɔn'oe ninkan la.
13 Gbanya'a pʋ bɔɔd tʋʋma ka ma'aa ye,
“Gbigim bɛ suorin,
gbigim bɛɛ ani ka li mɔr dabiem hali!”
14 Nwɛnɛ kʋlʋŋi yuulimi li tabidisin si'em la,
ala ka gbanya'a digi liebid ka dɔɔn o gadʋg zug.
15 Gbanya'a na nɔk o nu'ugʋ tʋm laan;
amaa ka ʋkim niŋ nɔɔrin la an yɛl!
16 Gbanya'a tɛn'ɛs ye on mɔr ya'am
gaad nidiba ayɔpɔi banɛ na tun'e gandig bu'osa nɛ ya'am la.
17 Onɛ zɔti kpɛn'ɛd yɛlbanɛ pʋ paae o la
nwɛnɛ ninkanɛ sia'al baa suorin ka gban'e o tʋba.
18-19 Ninkanɛ bɛlis o kpi'a faaɛn o
ka yɛl ye, “Mam maannɛ galima,”
nwɛnɛ gɛɛŋ kanɛ tɔɔnd piema yɔri-yɔri mɔɔd ye o pu'alim nidib.
20 Daad ya'a kae, bugum na kpiis;
bayɛʋg mɛ ya'a kae, zaba naae ya.
21 Nwɛnɛ bugumsaana kɛt ka bugum la'aŋid si'em,
ka daad mɛ kɛt ka bugum dit si'em la,
ala ka nɔŋgbannwa'ar dim mɛ kɛt ka zaba nɔbigid.
22 Bayɛʋg sɔb pian'ad malis nɛ nwɛnɛ sa'anwɛdir nɛ;
li sigid nɛ bɔlimm-bɔlimm paad pʋʋgin sa.
23 Biriku'an sɔb pian'ad nwɛnɛ sɔ' na ya'ab yʋʋr,
ka nyɛlig kɔlibire bʋligi li ka li vɛnl.
24 Nimbɛ'og pian'ad anɛ linɛ malis,
amaa ka bugum zɔɔnd pʋʋgin.
25 La'am nɛ o pian'adi malis la, da niŋ o yadda,
ka o pʋʋg pɛ'ɛli nɛ nɛnnim;
ka yɛlkisa ayɔpɔi bɛɛ o sʋʋnrin.
26 On an nimbɛ'og la o na tun'e pian' nɛ kʋkɔmalisiŋi lusi li;
amaa o bugusim la na nie nidib sʋʋgin.
27 Nid ya'a tu bʋmbɔk, o mɛŋ na lii anina;
ninkanɛ mɛ bilig kugir, li na lɛbi diinl o.
28 Ziri sɔb kis nimbanɛ ka o ma'adi tisidi ba la
ka onɛ pan'asidi ba mɛ mɔɔdi ba san'auŋ.