Solomon siilima banɛ paas
25
1 Solomon siilima sieba nwa, ka Hezekia onɛ an Juda na'ab la kpɛɛmnam da la'asi li sɔbi digil:2 Wina'am nyɛt na'asi nɛ on su'a yɛla la zug;
na'anam mɛ nyɛt na'asi nɛ ban vɛɛnsidi baŋid pian'ad gbin la zug.
3 Nwɛnɛ agɔla lal ka teŋ zulim si'em la,
ala ka fʋ kʋ baŋ linɛ bɛ na'anam pʋtɛnda nii.
4 Nyɛligim anzurifa yis dian'ad linɛ bɛɛ ani la,
ka onɛ tʋm nɛ anzurifa la nɔki li maal la'asʋŋ.
5 Yisim nimbɛ'ɛdnam la na'ab san'an,
ka o na'am la na ba'a zi'en nɛ pʋpielim.
6 Da dʋ'ʋsi fʋ mɛŋ na'ab tuonnɛ,
mɛ da dɛŋi gaŋ kpɛɛmnam zin'isiga;
7 li an sʋm nɛ on na yɛl ye, “Dʋm kpɛla na zin'in,”
n gaad on na diisif nyan burikinnam la sʋʋgin.
Fʋ nini nyɛ si'el la
8 da mɔɔd ye fʋ mɔri li tɔ'ɔtɔ keŋ kɔɔtʋ nii,
li nya'aŋ la fʋ kpi'a la ya'a ti diisif nyannɛ
fʋ na niŋ wala?
9 Fʋn nɛ fʋ kpi'a ya'a mɔr nɔŋgbannwa'ar,
da viigi fʋ kpi'a la gbin ka kɛ ka li yi yiŋa.
10 Ya'a ka' ala nidib na wʋmi li
ka yʋ'ʋbɛ'ɛd kanɛ bɛɛ fʋ san'an la kʋ yi na'anaa.
11 Pian'ad linɛ mɔr gbin la,
nwɛnɛ sanlima na gɛndig nɛ anzurifa nɛ.
12 Ya'am sɔb sa'alʋg nwɛnɛ sanlim tʋblɛm
bɛɛ sanlimsʋŋ baŋi tis onɛ kɛlisid nɛ.
13 Bisʋŋ titʋmis ma'ad banɛ tʋm o la sʋʋnr
nwɛnɛ zʋʋd bunib saŋa ku'oma'asig nɛ;
o bʋgʋnnɛ o zugdaannam sʋʋnr.
14 Onɛ dʋ'ʋsid o mɛŋ ye o na tis sɔ' piini ka pʋ tis o
nwɛnɛ saa na kʋʋ fuk ka pʋ nii.
15 Suguru sɔb bɛlisidi tuongat,
ka onɛ kʋkɔri bʋgʋs nyaŋid yɛl.
16 Fʋ ya'a nyɛ siind fʋn dim zemis;
fʋ ya'a dii galis fʋ na tiin li bas.
17 Da kennɛ fʋ kpi'a yiri pɛndigida,
ka o yaama na yiif ka o kisigif.
18 Onɛ di ziri kasɛti tis o kpi'a
li nwɛnɛ balaar bɛɛ zaba sʋ'ʋg
bɛɛ piim yabid ka o pu'alim o.
19 Yɛla ya'a paaf ka fʋ bɔɔd onɛ ka' sida sɔb sʋŋir
li nwɛnɛ fʋ nyina na pun'oe bɛɛ nɔbir kanɛ pɔn'ɔlim nɛ.
20 Onɛ yʋ'ʋmmi tisid sʋnsa'aŋ sɔb
nwɛnɛ ban na kpa'ae bʋmmi'isʋgʋ gɛndig nɛ zɛɛnm,
bɛɛ sɔ' na yɛɛg o fuug waad daar.
21 Fʋ dataa kɔ'ɔm ya'a zabid, fʋn tisim o diib ka o di,
ka ku'onuud ya'a mɔr o, fʋn tisim o ku'om ka o nu.
22 Fʋ ya'a niŋ ala, li nwɛnɛ fʋn na vaae bugumsaana linɛ diti pa'al o sɔb zugin,
Zugsɔb la mɛ na yɔɔ fʋ li yɛla.
23 Sisi'em mɔr saa kenna si'em la,
ala mɛn ka kikɛung mɔr sʋnpɛɛnni kenna.
24 Samannin bɛllim sɔn'oe
fʋn na la'as dɔɔgin nɛ pu'a kanɛ bɔɔd zaba.
25 Fʋ ya'a wʋm labasʋŋ ka li yi lalli na,
li nwɛnɛ ku'onuudi na wʋmif ka fʋ nyɛ ku'oma'asig.
26 Pʋpiel ya'a ti siak nimbɛ'og sa'alʋg,
li nwɛnɛ bulig ku'om na gɛndig nɛ yabid.
27 Li ka' sʋ'ʋm nɛ fʋn na di siindi galisɛ,
ka mɛ ka' sʋ'ʋm nɛ fʋ na ieed yʋ'ʋri galisɛ.
28 Ninkanɛ pʋ gban'ad o mɛŋ
nwɛnɛ tempʋʋg kanɛ pʋ mɔr zaŋguoma.