23
1 Fʋ ya'a zin'in nɛ na'ab ye fʋ di,gban'ami fʋ mɛŋ ka baŋ banɛ nɔk diibi tisif la an sɔ'.
2 Fʋ ya'a an dindiis,
fʋn gu'usimi fʋ mɛŋ.
3 Da kɛ ka kʋkɔma'asim mɔrif
nɛ o diib la malis si'em la zugɔ,
ka daasi'erɛɛ o bɔɔdi makif nɛ gɔs.
4 Da bɔɔdi fʋ tʋm kʋʋ fʋ mɛŋi paam kpan'am;
mɔr ya'am ka gu'usid.
5 Fʋ ya'a nɔki fʋ nifi kpa' kpan'am, li na gaad
wʋʋ li busnɛ kpʋkpama ianknɛ,
li na ianki dʋʋ agɔla wʋʋ silʋg nɛ.
6 Da di dasuŋ sɔb diibɔ,
da kɛ ka fʋ ya'am kpɛn' lii;
7 bɔzugɔ o anɛ ninkanɛ buudi
tɛn'ɛsid o diib la samme an si'em;
o na yɛl ye, “Dim, dim, ka nuu fʋ bɔɔdim bɛn!”
Amaa ka o sʋnf lɛɛ kpɛnnɛf.
8 Fʋ na tin linɛ ka fʋ di bi'ela la,
ka fʋn faas o si'em la lieb zaalim.
9 Da pian'ad nɛ zɔlʋgɔ,
bɔzugɔ o na gɔsi ziemi fʋ ya'am pian'ad la.
10 Da tɔlis kʋdimin sa titɔndig kugirɛ
bɛɛ fʋ kuaa kpɛn' kpiibig pɔɔginɛ,
11 bɔzugɔ onɛ zabidi ba yɛla la kpi'em nɛ;
o na duoe zi'enɛ tu'a ba antu'a tisi ba.
12 Kɛl ka fʋ pʋtɛn'ɛr di'e sa'alʋg
ka fʋ tʋba kɛlig linɛ an baŋir.
13 Da bas biig sa'alʋgɔ;
fʋ ya'a fieb biig nɛ sisanbig o kʋ kpii.
14 Fiebim biig la nɛ sisanbig
ka linɛ na kɛ ka fʋ faaɛn o yis kumin.
15 M biiga, fʋ ya'a mɔr ya'am,
li na ma'ae mam sʋʋnr.
16 Fʋ ya'a pian'ad linɛ dɔl suor
m sʋnf na malis hali.
17 Da mɔr fufum nɛ tʋʋmbɛ'ɛd dima,
amaa an onɛ mɔr Zugsɔb la zɔtim saŋa wʋsa.
18 Li anɛ sida ye fʋ na mɔr ti'ir bɛog sa,
ka fʋ ti'ir la kʋ naae.
19 M biiga, kɛlisim ka baŋ ya'am,
ka kɛ ka fʋ ya'am gban'e linɛ dɔl suor.
20 Da la'asi fʋ mɛŋ nɛ banɛ gban'e daam nu'us ayi' la
bɛɛ banɛ an dindiisnam laa;
21 ka danuudib nɛ dindiisnam na lieb nɔŋ dim,
ka gbɛɛm sɔb na yɛɛd kparikɛɛnd ma'aa.
22 Kɛlisimi fʋ ba' onɛ du'af la pian'ad,
ka fʋ ma ya'a kʋdig fʋn da nɛ'ɛs oo.
23 Da'am sida ka da kuosi lii;
ieem ya'am, nɛ zamisʋg, nɛ pian'ad gbin gban'ar.
24 Bikanɛ an pʋpielim sɔb, o saam mɔri sumalisim;
ka onɛ biigi mɔr ya'am o nif tigid o nɛ.
25 Kɛl ka fʋ ba' nɛ fʋ ma sʋnf ma'ae;
kɛl ka pu'a kanɛ du'af la mɔr sumalisim!
26 M biiga, pɛligimi fʋ pʋʋgʋ tisim
ka yɔ'ɔgi fʋ nini gɔsi m suoya la;
27 ka pu'a pu'agɔɔndir anɛ bʋmbɔk zulʋŋ
ka pu'a bɛ'ɛd mɛ nwɛnɛ bulig kanɛ nɔɔri pʋ yalimma.
28 O dig nɛ gu'ud wʋʋ banɛ faand,
ka gban'e dau kaŋa lɔ'ɔŋ dau kaŋa
ka kɛt ka banɛ tʋm bɛ'ɛd la zu'oe pɛ'ɛs.
29 Anɔ'ɔnɛ mɔr tɔɔgɔ? Anɔ'ɔnɛ mɔr sʋnsa'aŋa?
Anɔ'ɔnɛ bɔɔd zaba? Anɔ'ɔnɛ fabin na?
Anɔ'ɔn ka o niŋgbina fieb zaalim-zaalim?
Anɔ'ɔn ka o nini mu'oe wii nɛ?
30 Banɛ ka daam kʋʋli ba,
ka ba gɛndigid dankpi'ema kɔn'ɔb, kɔn'ɔbi nuud la.
31 Da gɔsid daam mu'oe wii si'em laa,
bɛɛ lin zi'e nɛ nwammi fuud
ka fʋ nuud ka li malis ka sigid bɔlimm-bɔlimm sʋ'ʋŋa la!
32 Li naarin la, li na dumif nwɛnɛ waaf,
ka li zɛnsim nwɛnɛ dunduug zɛnsim nɛ.
33 Fʋ nini na nyɛt bʋnsaamis
ka fʋ pʋtɛn'ɛr pian'ad yɛl yɔri-yɔri tisidif.
34 Fʋ na nwɛnɛ ninkanɛ gbisid atɛukʋn
ka dig nwiis banɛ ka ba lɔ anrʋŋ la zug.
35 Fʋ na yɛl ye, “Ba nwɛ'ɛm,” amaa m pʋ pu'alim!
Ba bʋ'ʋm amaa li pʋ zabidima!
Bʋndaar ka m na tun'e duoe
ka lɛm paam daam nu?