22
1 Yʋ'ʋsʋŋ gat kpan'am;girima mɛ gat sanlima nɛ anzurifa.
2 Bʋmmɔr nɛ nɔŋdaanɛ an yinne si'em nwa:
Zugsɔb la maali ba wʋsa.
3 Pʋtɛn'ɛr sɔb dɛŋidnɛ nyɛt yɛltɔɔg ka luakid,
amaa zɔlʋg on na gaad tuonnɛ nyɛ namisʋg.
4 A-sie-m-mɛŋ nɛ Zugsɔb la zɔtim
mɔri kpan'am nɛ na'asi nɛ vʋm kenna.
5 Gɔn'ɔs nɛ bɛndis dignɛ bugusnam suoya ni,
amaa onɛ gu'usid o mɛŋ na yi yɛlban la ni.
6 Pa'alim biig on na bɛ si'em,
ka o ya'a ti nɔbig o kʋ tiak ka basi lii.
7 Bʋndaane sʋ'oe nɔŋdaan,
ka onɛ pɛ'ɛŋ mɛ an on pɛ'ɛŋ sɔ' san'an la sankpan'as.
8 Onɛ bʋd bɛ'ɛd na bun yɛltɔɔg,
ka kʋ lɛm mɔr kpi'euŋʋ na mugus nidiba.
9 Onɛ tisid piini la mɛ na nyɛ bareka,
on pʋdigid o diib nɛ nɔŋ dim la zug.
10 Kadim nintʋ'ʋs la yis ka sʋnpɛɛn gaad,
ka nɔŋgbannwa'ar nɛ zaba na naae.
11 Onɛ an burikin ka o pian'ad mɛ tisid sumbʋgʋsʋm,
on sɔb na an na'ab zua.
12 Zugsɔb la kpa'anɛ o nini gɔsid baŋir dim,
amaa o lɛɛ kati banɛ kae sida la pian'adi basid.
13 Gbanya'a pʋ bɔɔd tʋʋma ka ma' ye, “Gbigim bɛ samannin,
m pa'a ti yii keŋ ka o kʋʋm!”
14 Pu'agɔɔndir nɔɔr zulimnɛ nwɛnɛ bʋmbɔk;
onɛ ka Zugsɔb sʋnpɛɛn bɛɛ o zugin la na lii li pʋʋgin.
15 Biig ya'a tʋm zɔlim tʋʋma
sisanbig na sa'al o ka o tiak ka basi li.
16 Onɛ mugusid nɔŋ dim ye o nyɛ kpan'am paas
nɛ onɛ mɔr o la'adi tisid kpan'am dim,
babayi' la wʋsa na lieb nɔŋ dim.
Ya'am dim pian'ad
17 An baanlimm ka kɛlis ya'am dim pian'ad;
kɛl ka fʋ ya'am gban'e man pa'anif si'el la,
18 bɔzugɔ fʋ ya'a nɔki li niŋi fʋ pʋtɛn'ɛrin
ka mɔri li wʋsa fʋ nɔɔrin
ala ka li na niŋif malisim.
19 Mam pa'anif nɛ'ɛŋa nɛ zina
ye li kɛ ka fʋ tis Zugsɔb la sida. Ɛɛn, fʋn ka m yɛt!
20 M pʋ sɔb ya'am pian'ad pistan' tisi fɔɔ?
Li anɛ pian'ad linɛ mɔr sa'alʋg nɛ baŋir. Bɛɛ m ma'aanɛɛ?
21 M pa'alif linɛ an sida ka pʋ mɔr viigirɛ,
ala ka fʋ na baŋ fʋn na gandig banɛ tʋmif la si'em.
22 Da faaɛn nɔŋdaan si'el on an tadim la zugɔ
ka mɛ da mɔŋ fara sɔb bʋʋd kɔɔtʋ nii,
23 bɔzugɔ Zugsɔb la na zabi tisi ba
ka na fan' banɛ faaɛn ba la'ad la.
24 Da dɔl sʋnpɛɛn galisʋg sɔb zuodɛ,
mɛ da la'asi fʋ mɛŋ nɛ onɛ sʋnfʋ pʋ ya'asid pɛligirɛ,
25 ya'a ka' alaa fʋ na zamis o suoya la
ka ti kpɛn'ɛsi fʋ mɛŋ bɛndigin.
26 Da an ninkanɛ bɔɔd ye fʋ zi'enɛ tis nidib ka ba pɛ'ɛŋ
bɛɛ fʋ nɔk la'adi zi'el ye fʋ na yɔ sɔ' sammɛ;
27 fʋ ya'a ti kɔ'ɔŋ yɔɔb,
hali fʋ gadʋg linɛ ka fʋ mɔri dig la, ba na faaɛn li.
28 Da tɔlisi fʋ kpi'a titɔndig kugir
kanɛ ka ba da digil kʋdimin sa laa.
29 Fʋ nyɛ ninkanɛ mi' tʋʋma sʋ'ʋŋa laa?
O na tʋm na'anam yin;
o kʋ tʋm tis tadimnama.