21
1 Na'ab la ya'am bɛ nɛ Zugsɔb la nu'ugin wʋʋ ku'osuor nɛ;onɛ kɛ ka li ku'om pʋbidi ken on bɔɔd si'el.
2 Ninsaal suoya wʋsa anɛ sʋm o mɛŋ nini ni,
amaa Zugsɔb la gban'adi li gbin wʋsa.
3 Sida nɛ fʋn na tʋm linɛ dɔl suor la
ma'ad Zugsɔb la sʋʋnri gat maana.
4 Nimpʋnannim nɛ dʋ'ʋsi-m-mɛŋ
ma'aa an nɛɛsim linɛ bɛɛ tisid tʋʋmbɛ'ɛd dim.
5 Nimmua daan ya'a mɔdig o mɛŋi gban'e gban'asʋma li mɔri nyɔɔdi kenna
ka kikirʋg mɛ mɔr nɔŋi kenna.
6 Nid ya'a dɔlis filim-filim suori paam kpan'am li na naae tɔ'ɔtɔ
nwɛnɛ walim nɛ kum bɛndig nɛ.
7 Bugusnam banɛ nɔŋ zaba la linɛ na mɔri ba keŋ,
ban zan'as ye ba kʋ tʋm linɛ dɔl suor la zug.
8 Onɛ tʋm taal suor anɛ suogɔnlima,
amaa banɛ pʋ mɔr pʋtɛn'ɛbɛ'ɛd la tʋʋma dɔlli suor.
9 Fʋ ya'a gbɛɛnd gɔnnin
li sɔn'oe fʋn na gbɛɛnd nɛ pu'a kanɛ nɔŋ zaba.
10 Bugus ieedi bɛ'ɛd daar wʋsa;
o pʋ zɔt o kpi'a nimbaanliga.
11 Nintʋ'ʋs ya'a ti nyɛ namisʋg,
banɛ nan ka' ya'am na zamis ya'am;
ba ya'a pa'al ya'am sɔb, o paamidi mi'ilim.
12 Wina'am onɛ an pʋpiel la mi' bugusim sɔbi maan si'el o yin,
ka na kɛ ka san'auŋ paae o.
13 Nid ya'a li' o tʋba pʋ bɔɔd ye o wʋm nɔŋdaan kaasiga,
on mɛ na ti kaasid ka sɔ' kʋ kɛlisɛ.
14 Piini linɛ ka ba su'a tis la bʋgʋn onɛ sʋnfʋ pɛlig la sʋʋnr;
ka nid sʋnf ya'a duoe hali, ba na tun'e su'a da' o nɛ ligidi ka li ma'ae.
15 Ba ya'a tu'as yɛlsida, li bʋgʋnnɛ pʋpielim sɔb sʋʋnr
amaa ka kɛt ka dabiem mɔr tʋʋmbɛ'ɛd dim la.
16 Ninkanɛ bie ka bas ya'am linɛ gban'ad si'el gbin la suorin
o na gaadi sig kpi'im teŋ.
17 Onɛ di'emid ka maannɛ o ya'amin la na lieb nɔŋdaan.
Onɛ wʋsa nɔŋ daam nɛ dikpama kʋ tun'e nyɛ kpan'am.
18 Bugusnam la na di'e pʋpielim dim namisʋg,
ka ziri dim la na paam burikinnam namisʋg.
19 Fʋ ya'a bɛ pipirigini fʋ kɔn'ɔkɔn',
li sɔn'oe fʋn na bɛ nɛ pu'a kanɛ nɔŋ zaba ka mɔr sʋnpɛɛn.
20 Ya'am dim yin ka arezak nɛ disʋma bɛ ka ba su'a,
amaa zɔn yin la ba diti si'el wʋsa naae.
21 Onɛ ieed nɔŋilim nɛ pʋpielim tʋʋma
na paam nyɔvʋwɔk, nɛ pʋpielim, nɛ na'asi.
22 Ya'am sɔb zabidi nyaŋid zabzabidib teŋ,
ka san'ami ba kpi'euŋ zin'ig linɛ ka ba ti'e la.
23 Onɛ wʋsa gu'usid o zilim nɛ o nɔɔr yisidi
o mɛŋ yɛla ni.
24 Onɛ an nyɛɛsim sɔb nɛ tita'al,
ba buon o sɔb yʋ'ʋr ye, “Nintʋ'ʋs”;
o tʋmnɛ si'el wʋsa, nɛ nyɛɛsim ma'aa.
25 Ya'amlɛog ma'aa na kʋ gbanya'a,
bɔzugɔ o ye o nu'ug kʋ tʋm si'ela.
26 Dabisir wʋsa o tɛn'ɛsidi on bɔɔd si'el la yɛla,
amaa pʋpiel on tisidi saŋa wʋsa ka kʋ mɔŋ sɔ'.
27 Zugsɔb la kis bugusnam la maana;
ka li kas-kas anɛ on na maal nɛ pʋtɛn'ɛbɛ'ɛd.
28 Onɛ di ziri kasɛt la na paam san'auŋ,
ka onɛ wʋsa kɛlisid o na nyɛ san'auŋ linɛ ka' bɛnnɛ.
29 Ninkanɛ an bugus ma'anɛ lɔdigid o nindaa,
amaa onɛ an burikin tɛn'ɛsidi o yɛla sʋ'ʋŋa.
30 Ya'am si'a kae, mi'ilim si'a kae, gban'asi'a mɛ kae
na nyaŋi gaad Zugsɔb la.
31 Ba bɔb Wiefʋ gur zaba dabisir,
amaa Zugsɔb la sʋ'oe nyaŋir.