20
1 Daam anɛ ninla'ad ka dankpi'euŋ ziid zabbɔɔsim naonɛ bas o mɛŋ ka daam kpɛn'ɛs o mɔɔg ka' ya'am sɔba.
2 Na'ab sʋnpɛɛn nwɛnɛ gbigimi na nwa'am;
onɛ kɛ ka o sʋnf pɛlig na kɔ'ɔŋ o nyɔvʋr
3 Onɛ gban'e o mɛŋ nɛ zaba mɔr girima,
amaa zɔlʋg on ieedi zaba tɔ'ɔtɔ.
4 Gbanya'a pʋ kuod kuob saŋaa;
ala ka bunib saŋa ka o gɔsid o pɔɔg ka si'el kae.
5 Ninsaal pʋtɛn'ɛr nwɛnɛ ku'ozuluŋ nɛ
amaa baŋir sɔb na gban'e li gbin.
6 Nidib bɛdegʋ yɛti ye ba mɔr nɔŋir,
amaa anɔ'ɔn na nyɛ onɛ an yɛlsida sɔba?
7 Pʋpielim sɔb bɛllim pʋ mɔr gba'arɛ;
o biis na nyɛ albareka bɛog sa.
8 Na'ab ya'a ti zin'inɛ o na'am gbauŋ zug ye o kad saria,
o nɔkidnɛ o nini bakid bɛ'ɛd wʋʋ ki ka ba yɛligid nɛ.
9 Anɔ'ɔnɛ na nyaŋi yɛl ye, “Mam pʋʋg anɛ yinne;
man anɛ nyain ka pʋ mɔr tʋʋmbɛ'ɛdɛ?”
10 Nidib ya'a mak la'ad ka zam taaba kuosimin,
li anɛ linɛ ka Zugsɔb la kis hali.
11 Hali biig gba' tʋʋma ni ka nidib baŋid
ye o pʋʋg anɛ yinne ka dɔl suor.
12 Tʋba banɛ wʋm nɛ nini banɛ nyɛt la,
Li anɛ Zugsɔb la maali ba wʋsa.
13 Da nɔŋ gbɛɛm ka fʋ na kilim nɔŋdaan;
duom tʋm, ka fʋ na nyɛ diibi di ka li kpɛlim.
14 Onɛ da'ad la yɛt ye, “Ayei, li anɛ saada, li anɛ saada,”
ka li nya'aŋ ka o yʋ'ʋn nwɛ'ɛd nyɔ'ɔg on da' si'em la yɛla.
15 Sanlima bɛnɛ ka kugvɛnla mɛ bɛ,
amaa ya'am pian'adi gati ba wʋsa.
16 Nɔkim onɛ kaanb ye o na yɔ saan sam la fuug;
o ya'a niŋ ala tis teŋ zʋŋ nid yanam faanmi li!
17 Nid ya'a zu diibi di, li malis nɛ o nɔɔrin,
amaa li nya'aŋ, o nɔɔr na pɛ'ɛl nɛ zigi.
18 Fʋ ya'a gban'e ye fʋ tʋm si'el, fʋn ieem sa'alʋg;
da keŋ zaba ka pʋ gban'e fʋn na zab si'em.
19 Onɛ ginnɛ yɛɛsid viigidi nidib pian'asu'ada paalʋ;
alazugɔ luakim pian'agalisʋg sɔb.
20 Nid ya'a pɔ nɔɔrɛ tis o ba' bɛɛ o ma,
o bugum na kpiis lik amɛŋa ni.
21 Kpan'am linɛ ka fʋ pʋ namis ka paam la
kʋ naae nɛ yɛlsʋmmɛ.
22 Da yɛl ye, “Bɛ'ɛd kanɛ ka fʋ maalim la m na yɔ sammɛ!”
Gu'usim ka Zugsɔb la na yɔɔ li sʋ'ʋŋa lɛbisif.
23 Zugsɔb la kis nidibi na zam taaba kuosim pʋʋgin,
zam makir anɛ linɛ pʋ malis o.
24 Zugsɔb la sʋ'oe ti nɔbir yakir yɛla,
ka sɔ' na niŋ wala baŋ linɛ na niŋ o bɛllim pʋʋginɛ?
25 Tɛn'ɛsim sʋ'ʋŋa ka nyaan pɔ nɔɔri zi'el ye fʋ na pɛsig si'eli tis Zugsɔb la,
ya'a ka' ala fʋ na ti lɛb nya'aŋ ka li an pakiri tisif.
26 Na'akanɛ mɔr ya'am bakidnɛ nimbɛ'ɛdnam la,
ka namisidi ba wʋʋ ki ka ba bʋ' zieŋin yɛligid nɛ.
27 Zugsɔb la fitiri ieed ninsaal siig,
o mɔri gɔsid o sʋʋnrin yɛla wʋsa.
28 Nɔŋir nɛ yɛlsida na sʋŋ na'ab,
ka kɛ ka o zin'inɛ o na'am gbauŋ zugʋ yuug.
29 Na'akim paŋi aan ba girima,
zuobpielim an bʋnkʋt vɛnlim.
30 Bʋ'ʋkanɛ tisid dɛŋ la yisid tʋʋmbɛ'ɛd
ka nwɛ'ɛd mɛ tiakid ninsaal pʋtɛn'ɛr.