19
1 Onɛ an nɔŋdaan ka ken nɛ burikinnimsɔn'oe zɔlʋg kanɛ ka o nɔɔr pian'ad an ziri.
2 Li ka' sʋm nɛ fʋn na mɔr nyɛlʋg ka baŋir kae
bɛɛ kir tɔ'ɔtɔ keŋ yidig suorɛ.
3 Ninsaal mɛŋ zɔlimisi san'amid o,
la'am nɛ wala ka o sʋʋnr duod nɛ Zugsɔb la.
4 Kpan'am mɔri zuanam bɛdegʋ kenna,
amaa nɔŋdaan zuanam widigidnɛ ka kɛt o.
5 Onɛ dit ziri kasɛt kʋ keŋ zaalim ka da di'e namisʋgɔ,
ba mɛ kʋ bas faad sɔb ka o keŋ zaalim.
6 Nidib bɛdegʋ la'asid onɛ an tuongat san'ani bɔɔd sʋŋir,
ka sɔ' wʋsa zua an onɛ tisid piini.
7 Nɔŋ daan sizuop ya'a nɛ'ɛs o,
di na niŋ wala ka o zuanam wʋsa kʋ luak o!
La'am nɛ on bɛlimmi dɔlli ba la,
o ieedi ba ka pʋ nyɛtaa.
8 Onɛ ieed ya'am la nɔŋ o mɛŋ;
ka onɛ mɛ gban'ad si'el gbin la kennɛ tuon.
9 Onɛ dit ziri kasɛt kʋ keŋ zaalim ka da di'e namisʋgɔ,
ka faad sɔb na ba'as yɔri.
10 Li pʋ nar ye zɔlʋg bɛ zin'isʋŋinɛ,
ka li bɛ'ɛd mɛ anɛ sankpan'asi na sʋ'oe na'abiis!
11 Ninsaal ya'am kɛt ka o an suguru sɔb;
on pʋ zaŋid sɔ' taal la zugʋ kɛt ka o nyɛt girima.
12 Na'ab sʋnf ya'a pɛlig o nwa'amnɛ wʋʋ gbigim,
amaa o nimbaanlzɔɔr nwɛnɛ mɛligim na lit mɔɔg zug.
13 Bizɔlʋg kɛtnɛ ka o saam ba'as yɔri,
ka pu'a kanɛ nɔŋ zaba nwɛnɛ ku'om na nyun tuak-tuak nɛ.
14 Ya' nɛ kpan'am anɛ faar linɛ yit du'adibin na,
amaa Zugsɔb la tisid pu'a kanɛ mɔr ya'am.
15 Gbanya'a gbisidi tigid,
ka onɛ pʋ siakid ye o nɔbir yaki keŋ tʋʋma ni la,
on sɔb na dig nɛ kɔ'ɔm.
16 Onɛ di'ed zi'elʋg na vʋe yuug,
amaa onɛ nɛ'ɛsi li na kpi.
17 Onɛ sʋŋid tadimnam pɛ'ɛŋidnɛ tisid Zugsɔb la,
ka o na yɔɔ o on maal si'el la zug.
18 Tɛɛgimi fʋ biig tʋbir saŋa kanɛ ka ti'ir nam bɛ la,
ka da bas o ka li kɛ ka o kpi tɔ'ɔtɔɔ.
19 Sʋnpɛɛn galisʋg sɔb na nyɛɛ li yɔɔd;
fʋ ya'a sʋŋi yis o yɛla ni, o na lɛn kpɛn' ka fʋ lɛn yis o ya'as.
20 Kɛlisim sa'alʋg ka di'e pa'alʋg,
ka li naarin la fʋ na an ya'am sɔb.
21 Ninsaal pʋtɛn'ɛr gban'adi yɛla bɛdegʋ,
amaa Zugsɔb la bɔɔdim na zi'en.
22 Ninsaali bɔɔd si'el anɛ nɔŋilim linɛ pʋ naada;
fʋ ya'a an nɔŋdaan li sɔn'oe fʋn na an faad sɔb.
23 Zugsɔb zɔtim mɔri vʋm kenna:
ala ka fʋ na nyɛ vʋ'ʋsʋm ka yɛla kʋ paae fɔ.
24 Gbanya'a na nɔk o nu'ugʋ tʋm laan;
amaa ka kʋ nyaŋi nɔki niŋ nɔɔrinɛ!
25 Nwɛ'ɛm nintʋ'ʋs ka banɛ nan ka' ya'am la na zamis ya'am;
sa'alim onɛ gban'ad pian'ad gbin ka o na paam baŋiri pɛ'ɛs.
26 Onɛ faaɛn o saam la'ad ka kad o maa yis la,
o sɔb mɔri nyan nɛ zuziigi kenna.
27 M biiga, fʋ ya'a pʋ lɛn kɛlisid sa'alʋgɔ,
fʋ na yidig ka kʋ baŋ ya'am pian'adɛ.
28 Onɛ tisid zam kasɛt tʋ'ʋdi yɛlsida,
ka bugusnam la vɔn tʋʋmbɛ'ɛd wʋʋ li anɛ diib.
29 Namisʋg bɛɛ gur nintʋ'ʋsnam,
ka bʋ'ʋd mɛ digi gur banɛ an zɔn la.