18
1 Ninkanɛ ka' zua la mɔɔdnɛ o mɛŋ yɛla ma'aaka zan'asid linɛ an sa'al sʋŋ wʋsa.
2 Zɔlʋg pʋ mɔr ya'amlɛog nɛ ya'am zamisʋgɔ,
amaa o mɔɔdi ye o pa'al o mɛŋ pʋtɛn'ɛri gban'e si'el la ma'aa.
3 Bugusim ya'a ti kena, ala ka nɛ'ɛsʋg dɔl,
ka nyan mɛ ken nɛ zuziid.
4 Ninsaal pian'ad nwɛnɛ ku'ozuluŋ nɛ
amaa ya'am nwɛnɛ ku'okanɛ bun buligin.
5 Li ka' sʋm nɛ fʋn na tis bugusim sɔb bʋʋd
ka lɛɛ mɔŋ sida sɔba.
6 Zɔlʋg pian'ad mɔri zaba kennɛ o san'an na,
ka o nɔɔr ieed bʋ'ʋdi tisid o.
7 Zɔlʋg nɔɔri san'amid o,
ka an baŋi gban'ad o mɛŋ.
8 Bayɛʋg sɔb pian'ad malis nɛ nwɛnɛ sa'anwɛdir nɛ;
li sigid nɛ bɔlimm-bɔlimm paad pʋʋgin sa.
9 Gbanya'am sɔb
nɛ la'asan'auŋ sɔb anɛ ba'abiis.
10 Zugsɔb la yʋ'ʋr anɛ suak zin'ig;
Pʋpielnam la zɔti kpɛn'ɛdi su'adi ani ka paam faangir.
11 Arezak sʋŋidi bʋndaan wʋʋ zaŋguom kpi'ema sʋŋid tempʋʋg si'em la,
o tɛn'ɛs ye li anɛ zaŋguom kanɛ ka sɔ' kʋ nyaŋi ianki kpɛn' naa.
12 Nid ya'a ti dʋ'ʋsid o mɛŋ, o liigi dɔl,
amaa A-sie-m-mɛŋ ya'a kena, na'asi dɔl.
13 Onɛ lɛbis pian'ad ka pʋ kɛlisɛ,
li anɛ gɛtim nɛ nyannɛ tis o.
14 Ninsaal siigi tisid o kpi'euŋ o ban'as saŋa,
amaa anɔ'ɔnɛ na nyaŋi kpɛmis onɛ siigi tadigɛ?
15 Onɛ mɔr ya'am ieednɛ baŋiri paasid;
ka o sɔb tʋba yɔ'ɔgi ieedi li zin'ig.
16 Piini yɔ'ɔgidi suori tit Onɛ piinid la
ka vɛ'ɛgid o la'asid nɛ nintitada.
17 Onɛ dɛŋ tuonnɛ tu'as o pian'ad la li nwɛnɛ on sɔba mɔr bʋʋd,
asɛɛ ka o tiraan la ti kena bu'os o bu'osa ka li nie.
18 Pɔnsʋgʋ pansigid zaba
ka widigid paŋ dim banɛ zabid nɛ taaba la.
19 Fʋ ya'a san'ami fʋ ba'abiig sʋʋnr, li tɔi pamm nɛ on na basi fʋ taali gaad fʋn na nyaŋ tempʋkanɛ mɔr kpi'euŋ,
ka zaba mɛ gu'ud nidibi lɛbisid wʋʋ teŋ kanɛ ka ba yɔ' nɛ kʋnt gam.
20 Ninsaal nɔɔr pian'adi tisid o diib ka o pʋʋr pɛ'ɛn
ka o nɔŋgbannɛ tisid o si'el linɛ sia'al o.
21 Zilimi mɔr kum nɛ vʋm paŋ,
ka banɛ nɔŋi li na dii li wala.
22 Onɛ di pu'a sʋŋ nyɛ bʋnsʋŋ
ka na nyɛ sʋŋir Zugsɔb la san'an.
23 Nɔŋ daan sɔsidi ye ba zɔɔ o nimbaanlig,
amaa bʋmmɔr on lɛbisidi nɛ nyinyiug.
24 Sɔ' na tun'e mɔr zuanam bɛdegʋ ka ba pʋ nyaŋi sʋ'ʋŋɔɔ,
amaa ka zua si'a bɛɛ gati fʋ mabiig.