17
1 Fʋ ya'a di zɔm ka mɔr sumbʋgʋsʋm li sɔn'oe yir kanɛ ka fʋ dii tig ka nɔŋgbannwa'ar bɛ.2 Sankpan'as kanɛ mɔr ya'am na sʋ'oe yibiig kanɛ diisid o yidim nyan,
o na la'asi di faar wʋʋ o anɛ yibiig nɛ.
3 Bugum ka ba mɔri nyɛligid anzurifa nɛ sanlima siligid,
amaa Zugsɔb la kpansid ninsaal sʋnf.
4 Bugus kɛlisidi pian'ad linɛ an bɛ'ɛd
ka faad sɔb mɛ kɛlisid ziri kikɛung.
5 Onɛ la' nɔŋ dim tʋ'ʋdi Onɛ Maali ba la;
onɛ ka yɛla paae sɔ' ka o sʋnf ma'ae la na nyɛ namisʋg.
6 Yaas anɛ na'am zupibigi tis bʋnkʋdʋg,
ka biis mɛ dʋ'ʋsidi ba mɛŋi ba du'adib zug.
7 Ya'am pian'ad pʋ nar nɛ zɔlʋgɔ;
ka li bɛ'ɛd wʋsa anɛ na'akanɛ faad!
8 Onɛ da'ad kpi'emnam nɛ ligidi la tɛn'ɛs ye linɛ fɛndigid nidib ya'am;
ka on fɛndig zin'isi'a wʋsa o na di ya'an.
9 Onɛ wʋsa lusid taal kɛt ka nɔŋilim bɛ,
amaa onɛ wʋsa tɛɛnsid yɛla san'amidi zuod.
10 Fʋ ya'a zɛrig ya'am sɔb vugiri li na tiak o
gat zɔlʋgʋ na di'e kpa'asa kɔbiga.
11 Ninvʋbɛ'ɛd anɛ onɛ zan'asid yɛlsida;
ka ba mɛ na tʋm onɛ pʋ zɔt nimbaanlig o san'an ka o vɛɛns o.
12 Fʋ ya'a tʋ'ʋs bʋnyua kanɛ ka ba faaɛn o biis
sɔn'oe fʋn na tʋ'ʋs zɔlʋg ka o tʋmm o zɔlim tʋʋma.
13 Nid ya'a maalif sʋ'ʋŋa ka fʋ lɛbis o bɛ'ɛd,
bɛ'ɛd kʋ naae fʋ yir pʋʋginɛ.
14 Onɛ pin'il nɔŋgbannwa'ar li tɔɔg nwɛnɛ fʋn na bi'ed mu'ar;
alazug dɛŋim bas yɛl la ka li da lieb zabaa.
15 Azɛrig bʋʋd sɔb ka tis bugus bʋʋd la
anɛ linɛ ka Zugsɔb la kisi li wʋsa.
16 Zɔlʋg ya'a pʋ mɔr pʋtɛn'ɛr ye o ie ya'am,
o ligidi tʋʋm an bɔ?
17 Zua anɛ onɛ nɔŋif saŋa wʋsa,
ka ba'abiig mɛ an onɛ sʋŋid yɛlpakir saŋa.
18 Ninkanɛ ka' ya'am nɔkid o la'adi zi'en kasɛt
ye o kpi'a pɛ'ɛŋ.
19 Onɛ nɔŋ nɔŋgbannwa'ar la nɔŋnɛ bɛ'ɛd
onɛ niŋid ala ieedi yɛla tisid o mɛŋ.
20 Ninkanɛ an zam sɔb la pʋ ken tuonnɛ;
ka ziri sɔb mɛ kpɛn'ɛd yɛla ni.
21 Fʋ ya'a du'a zɔlʋg li anɛ sʋnsa'aŋ,
zɔlʋg saam sʋʋnr ka' ma'arɛ.
22 Onɛ sʋʋnri malis, li tisid o nɛ laafi
amaa sʋnsa'aŋ kpɛn'ɛsidi ban'as nid kɔnba ni.
23 Ninkanɛ an bugus la su'adi di'esid ligidi
ye o san'am yɛlsida dim la suor.
24 Onɛ pʋtɛn'ɛri vʋe la mɔr ya'am,
amaa zɔlʋg gi'esidnɛ yɔri-yɔri.
25 Bikanɛ an zɔlʋg tisid o ba' sʋnsa'aŋ
ka kɛ ka onɛ du'a o la sʋʋnr zabid.
26 Li ka' sʋm nɛ fʋn na namis sɔ' zaalim-zaalim,
bɛɛ fʋ bʋ' ninsʋŋ o yɛlsida zugɔ.
27 Ninkanɛ mɔr baŋir pian'adi ka gu'usid
ka onɛ gban'ad yɛl gbin sʋnf pʋ pɛligid tɔ'ɔtɔɔ.
28 Hali zɔlʋg ya'a ti an baanlimm ba na yɛl ye o mɔr ya'am,
ka o ya'a gban'e o nɔɔr ba na tɛn'ɛs ye o mɔri baŋir.