16
1 Ninsaal sʋnfʋ gban'ad gban'ar,amaa Zugsɔb la sʋ'oe maalʋg yɛla.
2 Ninsaal suoya wʋsa anɛ sʋ'ʋŋa o mɛŋ nini ni,
amaa Zugsɔb la kpansid o sʋnfʋ an si'em.
3 Zaŋim fʋn maan si'el wʋsa tis Zugsɔb la,
ka fʋ gban'ar wʋsa na maal sʋ'ʋŋa.
4 Zugsɔb la maal si'el wʋsa mɔri li naar;
hali bugusim sɔb naar anɛ san'auŋ.
5 Zugsɔb la kis banɛ wʋsa mɔr nyɛɛsim.
Baŋimi ye ba kʋ yi namisʋgʋnɛɛ.
6 Nɔŋir nɛ sida kɛt ka Wina'am na kɛ taali bas;
Zugsɔb la zɔtim kɛt ka ninsaal na nyaŋi bas tʋʋmbɛ'ɛd.
7 Ninsaal suoya ya'a malis Zugsɔb la,
hali o na kɛ ka on nɛ o bi'emnam na la'am bɛ nɛ sumbʋgʋsʋm.
8 Li an sʋm nɛ fʋn na mɔr bi'ela ka li an pʋpielim bunnɛ
gaad fʋn na nyɛ bɛdegʋ ka li an zam bʋn.
9 Ninsaal gban'ad o sʋnfʋn on na keŋ si'em,
amaa Zugsɔb la pa'annɛ o nɔba yakid si'em.
10 Na'ab pian'adi nɛ Wina'am ya'am;
li pʋ sʋm ye o kad saria ka li pʋ dɔl suorɛ.
11 Makir linɛ an sʋm ka tu'al yitnɛ Zugsɔb ni na;
linɛ ka ba mɔri makid tɛbisim la
o ba'a bɛ nɛ li wʋsa.
12 Na'anam kis linɛ pʋ dɔl suorɛ,
bɔzugɔ pʋpielim kɛt ka na'am la zi'e kiŋ-kiŋ.
13 Na'anam bɔɔd ye ba wʋm pian'ad linɛ ka' zirii;
ninkanɛ pian'ad sida la ba nɔŋ o nɛ.
14 Na'ab sʋnpɛɛn anɛ linɛ ziid kum na,
amaa onɛ mɔr ya'am la na ma'ae li.
15 Na'ab ya'a ti yidig o nindaa, li mɔri vʋm kenna;
o sʋŋir nwɛnɛ saa na kʋ sigir saŋa kenna la.
16 Fʋ ya'a paam ya'am li gat fʋn na paam sanlim!
Fʋ ya'a bɔ baŋir, li sɔn'oe fʋn na gaŋ anzurifa!
17 Banɛ bɛllim an sʋ'ʋŋa la dɔlnɛ suoraug ka bɛ'ɛd kae;
onɛ gu'usid nɛ o ken pʋʋgin gu'ud o nyɔvʋr.
18 Adʋ'ʋsi-m-mɛŋ ya'a dɛŋ tuonnɛ, san'auŋʋ dɔl,
ka nyɛɛsim mɛ ken ka liig kat o bugir.
19 Fʋ ya'a sie fʋ mɛŋ ka ba kaali fʋ pɛ'ɛs nɔŋdimin,
li sɔn'oe fʋn na la'as nɛ banɛ dʋ'ʋsidi ba mɛŋ ka ya fan' la'adi pʋdig.
20 Banɛ kɛlisid ka siakid pa'ala kennɛ tuon,
ka albareka mɛ bɛ nɛ onɛ niŋ Zugsɔb la yadda.
21 Ba buon onɛ mɔr ya'am ye baŋir sɔb;
pian'ad linɛ malis la sʋŋid ka pa'alʋg ken tuon.
22 Banɛ mɔr ya'am gban'ad si'el gbin tɔ'ɔtɔ la, li nwɛnɛ buligi bunnɛ tisidi ba nyɔvʋr,
amaa zɔlimis mɔri namisʋgʋ ken zɔn ni na.
23 Ya'am sɔb gu'usid nɛ o nɔɔr pian'ad,
ka li kɛt ka nidib di'ed o pa'alʋg.
24 Pian'asʋma malis nɛ nwɛnɛ siind,
li malis nɛ tisi fʋ nɔɔr la ka tisidi fʋ niŋgbiŋ wʋsa laafi.
25 Suosi'a bɛɛ nwɛnɛ li anɛ sʋ'ʋŋaa tis ninsaal,
amaa li naar mɔr o kennɛ kum zin'igin.
26 Ya'amlɛogʋ kɛt ka tʋmtʋm nyidigid
ka kɔ'ɔm zabir kpɛmisid o ka o tʋm.
27 Nimbɛ'og gban'adnɛ gban'abɛ'ɛd
ka o pian'ad dit nwɛnɛ bugum pielim nɛ.
28 Ninkanɛ ieed yɛla tuginnɛ nidib,
bayɛʋg mɛ san'amidi zuod.
29 Zaba sɔb bɛlisid o kpi'a
kpɛn'ɛsid o suobɛ'ɛdin.
30 Onɛ amisid la gban'adi gban'abɛ'ɛd;
onɛ mi'ed nidib la tɛn'ɛsidi bɛ'ɛd.
31 Zupielim anɛ na'am zupibig kanɛ vɛnl,
pʋpielim dim ma'aa nyɛti li.
32 Sumbʋgʋsʋm sɔb sɔn'oe zabzabid onɛ kpi'em,
ka onɛ nyaŋi gban'ad o mɛŋ gat onɛ nyaŋ teŋ mum.
33 Bʋgʋlʋm-bʋgʋlʋm dim bʋgʋlʋm ye ba gban'e gban'ar,
amaa gban'ar wʋsa yitnɛ Zugsɔb la san'an na.