15
1 Lɛbisʋg linɛ an baanlimm yisidnɛ sʋnpɛɛn,amaa ɛndʋg pian'ad duodi sʋnf.
2 Ya'am sɔb zilim pian'adnɛ baŋir yɛla sʋ'ʋŋa,
amaa gɛdʋg nɔɔr pɛ'ɛl nɛ zɔlim ma'aa.
3 Zugsɔb la nini bɛ nɛ zin'ig wʋsa,
gɔsid bugusim dim nɛ banɛ tʋm sʋm wʋsa.
4 Nɔɔr kanɛ pian'adi mɔr laafi na nwɛnɛ tiig linɛ wala an vʋm,
amaa nɔɔr kanɛ pian'ad ziri la tisidi sʋnsa'aŋ.
5 Zɔlʋgʋ nɛ'ɛsid o ba' sa'alʋg,
amaa onɛ siakid sa'alʋg anɛ ya'am sɔb.
6 Pʋpielim sɔb yin mɔri kpan'am bɛdegʋ;
amaa bugusim sɔbi nyɛt si'el la ziidi yɛla na.
7 Ya'am sɔb pian'adnɛ baŋir pian'ad,
amaa li ka' ala nɛ zɔnnɛ.
8 Zugsɔb la kis bugusim sɔb maan,
amaa onɛ bɛllim an sʋm la pʋ'ʋsim ma'ad o sʋʋnr.
9 Zugsɔb la kis bugusim dim suoya
amaa o nɔŋ banɛ dɔl pʋpielim dim suor.
10 Namisʋg digi gur onɛ bas suor dɔllim;
onɛ kis sa'alʋg na kpi.
11 Kpi'im teŋ nɛ aba'as-yɔri dignɛ Zugsɔb la tuon
ka ninsaalib sʋnf na nyaŋi su'a o san'anɛɛ?
12 Onɛ la'ad nidib kis ban na yɛl o gbɛlʋŋ;
o pʋ nwɛ'ɛd ya'am sɔb sɔɔraa.
13 Onɛ sʋnfʋ malis la lɔdigid o nindaa,
amaa sʋnzabir mɔri sʋnsa'aŋʋ kenna.
14 Onɛ mɔr pʋtɛn'ɛr la ieed baŋir
amaa banɛ an zɔn la zɔlim tʋʋma aan ba diib.
15 Onɛ bɛ mugusʋg pʋʋgin la dabisa wʋsa anɛ tɔɔg,
amaa onɛ mɔr sumalisim la ditnɛ saŋa wʋsa.
16 Fʋ ya'a mɔr bi'ela ka zɔt Zugsɔb dabiem
li sɔn'oe onɛ mɔr bɛdegʋ ka bɛ yɛla ni.
17 Li an sʋm nɛ fʋn na ɔnb vaand ma'aa
gat fʋn na ɔnbid na'akanɛ mɔr kpaam ni'im ka kisidim bɛ.
18 Sʋnpɛɛn sɔb ziidi nɔŋgbannwa'ari kenna,
amaa suguru sɔb kpiisidi nɔŋgbannwa'ar.
19 Gbanya'a suor pɛ'ɛl nɛ gɔn'ɔs,
amaa onɛ bɛllim an sʋm la suor anɛ suoraug.
20 Bikanɛ mɔr ya'am ma'ad o ba' sʋʋnr,
amaa zɔlʋg nɛ'ɛsid o ma.
21 Zɔlʋg ya'am ka'alʋg ma'ad o mɛŋ sʋnf,
amaa ninkanɛ gban'ad si'el gbin la tʋmnɛ linɛ an sʋ'ʋŋa.
22 Onɛ sa'an ya'a kae lin ka yɛla san'amid,
amaa sa'ansa'annib ya'a zu'oe ba na nyaŋi maal yɛla.
23 Nid ya'a lɛbis bu'osʋg sʋ'ʋŋa li ma'ad o sʋʋnr,
ka pian'ʋk mɛ ya'a pian' saŋa kanɛ nar, li anɛ sʋ'ʋŋa!
24 Mi'ilim sɔb suori tisid o nyɔvʋr
ka gur o ka o da sig kpi'im teŋa.
25 Zugsɔb la san'amid nyɛɛsim sɔb yir,
amaa ka gur pʋkɔɔnr titɔndis sʋ'ʋŋa.
26 Zugsɔb la kis bugusim sɔb tɛn'ɛsa,
amaa o sʋnf lɛɛ malisi nɛ pʋpielim sɔb.
27 Kpian'asʋg sɔb ziidi yɛla kpɛn'ɛsid o yin,
amaa onɛ kʋ siak ye ba da' o la na vʋe yuug.
28 Pʋpielim sɔb ɛɛnti tɛn'ɛs nɛ sʋ'ʋŋa ka nyaan gandig bu'osʋg,
amaa bugus nɔɔr yisidi bɛ'ɛd yɔri-yɔri.
29 Zugsɔb la lal nɛ bugusim sɔb
amaa o wʋm pʋpiel winsɔsʋg.
30 Onɛ pʋ lɔɔd nindaa li tisid o sʋnf malisim,
ka labasʋŋ mɛ tisid niŋgbiŋ wʋsa laafi.
31 Onɛ kɛlisid sa'alʋg linɛ tisid vʋm la,
ba na kaal o paas ya'am dim san'an.
32 Onɛ wʋsa nɛ'ɛs zamisʋg nɛ'ɛs nɛ o mɛŋ
amaa onɛ wʋsa siakid o gbɛlʋŋ maligim gban'ad si'el gbin.
33 Zugsɔb la zɔtim pa'an ninsaal ya'am,
a-sie-m-mɛŋi gat tuon ka na'asi nyaan dɔl.