14
1 Pu'a kanɛ an ya'am sɔb la mɛɛd o yir,amaa pu'a kanɛ ka' ya'am la nwa'ad o din.
2 Ninkanɛ dɔl suor linɛ an sʋm ka nar zɔt Wina'am dabiem
amaa onɛ dɔl zam suoya la nɛ'ɛsid o nɛ.
3 Zɔlʋg pian'adi kɛt ka o di'ed balaar o nya'aŋ;
amaa ya'am sɔb pian'ad gu'ud o nɛ yisid yɛla ni.
4 Niigi kae zin'isi'a la, gariki la dignɛ zaalim
amaa niigi paŋi kɛt ka ti nyɛt zʋʋd bɛdegʋ bun.
5 Kasɛta sɔb onɛ pian'ad sida la pʋ ma'ada
amaa ziri kasɛta la faad.
6 Ninla'as la ieedi ya'am ka pʋ nyɛta,
amaa onɛ mɔr pʋtɛn'ɛr la nyɛti baŋir na'ana.
7 Zɔm ka bas zɔlʋg,
ka fʋ kʋ nyɛ ya'am o san'anɛ.
8 Ya'am sɔb ya'am kɛt ka o mi' linɛ nar
amaa zɔltita'ar la ma'ad o mɛŋ.
9 Zɔn la'adnɛ onɛ sɔsid tʋʋmbɛ'ɛd suguru,
amaa ninsʋma mɔri Wina'am yɛlsʋm.
10 Onɛ sʋnfʋ pɛligi mi' lin zabid o si'em,
ka sɔ' mɛ kae na nyaŋi pʋdig o sumalisim.
11 Nimbɛ'og yir na san'am,
amaa ninsʋŋ din na nɔbigid.
12 Suosi'a bɛnɛ nwɛnɛ li anɛ sʋ'ʋŋa tis ninsaal,
amaa li naar la mɔr o nɛ ken kum zin'igin.
13 Nid tun'e la'ad ka o sʋʋnr lɛɛ zabid,
sumalisim na tun'e naae nɛ sʋnsa'aŋ.
14 Onɛ ka' yadda la na di'e yɔɔd linɛ nar o,
ka ninsʋŋ mɛ di'e o yɔɔd wʋʋ lin nar si'em.
15 Onɛ ya'am pɔɔd la niŋidi si'el wʋsa yadda,
amaa onɛ mɔr ya'am la gu'usidi nɛ o nɔbir yakir.
16 Ya'am sɔb zɔti Zugsɔb la dabiem ka luakid bɛ'ɛd,
amaa zɔlʋg on nɔkidnɛ o zugʋ kpa' ken.
17 Sʋnpɛɛn sɔb tʋmnɛ tʋʋmyɔɔd,
ka sɔ' wʋsa kis pʋtɛn'ɛbɛ'ɛd sɔb.
18 Onɛ ya'am pɔɔd la ditnɛ zɔlim faar,
amaa ya'am sɔb di'ednɛ baŋir wʋʋ na'am zupibig nɛ.
19 Nimbɛ'ɛdnam la na igin ninsʋma tuon,
ka bugusim dim la bɛ pʋpielim dim za'anɔya nii sɔsid.
20 Onɛ an nɔŋdaan la, hali o kpi'es la'am luakid o nɛ,
amaa onɛ an kpan'a la zuanam anɛ bɛdegʋ.
21 Onɛ nɛ'ɛs o kpi'a tʋm taal
amaa onɛ maan fara dim sʋ'ʋŋa la mɔr zusʋŋ.
22 Banɛ gban'ad gban'abɛ'ɛd la bɔdigid nɛ.
Amaa banɛ gban'ad linɛ an sʋm la mɔr nɔŋilim nɛ sida.
23 Tʋʋm kpi'euŋ wʋsa mɔri nyɔɔdi kenna,
amaa azin'i-sɔnsid ziidi nɔŋ na.
24 Ya'am dim kpan'am anɛ na'am zupibig,
amaa zɔltitada la din anɛ zɔlim ma'aa.
25 Kasɛta sɔb onɛ pian'ad sida la ziid vʋm kenna,
amaa ziri kasɛta anɛ faad ma'aa.
26 Onɛ zɔt Zugsɔb la mɔr suak zin'ig linɛ mɔr kpi'euŋ,
ka li mɛ na an suak zin'igi tis o biis.
27 Zugsɔb la zɔtim anɛ nyɔvʋr bulig
ka yisid ninsaal kum bɛndis pʋʋgin.
28 Nidib bɛdegʋ dʋ'ʋsid na'am,
amaa nidib ya'a kae, san'auŋ na kpɛn' na'abiig.
29 Suguru sɔb gban'ad si'el gbin,
amaa sʋnpɛɛn sɔb pa'annɛ zɔlimis.
30 Fʋ sʋnf ya'a mɔr sumbʋgʋsʋm linɛ tisid niŋgbiŋ laafi,
amaa fufum sɔb kɔnba na ba'asi pun'oe.
31 Onɛ mugusid nɔŋ dim tʋ'ʋdi Onɛ Maali ba la,
amaa onɛ maan fara dim sʋ'ʋŋa la na'asid Wina'am.
32 Bɛ'ɛd ya'a ti lɛb bugusim dim la zugin ba liig paae ya,
amaa hali baa kum zin'igin pʋpielim dim na nyɛ suak.
33 Ya'am bɛ nɛ banɛ mɔr baŋiri ba sʋnfʋn,
amaa zɔn pʋn zi' linɛ buon ya'am.
34 Pʋpielim dʋ'ʋsid teŋ yʋ'ʋr,
ka tʋʋmbɛ'ɛd diisid nidib wʋsa nyan.
35 Na'ab bɔɔdi kpɛɛm kanɛ mɔr ya'am,
amaa o ya'a tʋm nyan tʋʋma li duodi na'ab sʋnf.