13
1 Bikanɛ mɔr ya'am di'esid o ba' sa'alʋg,amaa onɛ la'ad nidib pʋ wʋm tansʋgɔ.
2 Ninsaal nɔɔr pian'adi tisid o bʋnsʋŋ,
amaa banɛ ka' sida dim la ieedi zaba ma'aa.
3 Onɛ gban'ad o nɔɔr gu'ud o nyɔvʋr,
amaa onɛ pian'ad yɔri-yɔri la na ba'as yɔri.
4 Gbanya'a ya'am bɔɔd si'el nɛ ya'amlɛog o kʋ nyɛɛ,
amaa onɛ bɔɔd tʋʋma hali la na nyɛ ka li sia'al o.
5 Pʋpielim sɔb kisi linɛ an ziri,
amaa bugus diisid o mɛŋ nyan.
6 Pʋpielim gur yɛlsida sɔb,
amaa bugusim lugidi tʋʋmbɛ'ɛd sɔb.
7 Dau yinne niŋ o mɛŋ wʋʋ bʋmmɔr, amaa ka lɛɛ ka' si'ela;
ka yinne mɛ niŋ o mɛŋ wʋʋ nɔŋdaan, ka lɛɛ mɔr bɛdegʋ.
8 Kpan'am sɔb na nɔk o kpan'am la da' faaɛn o nyɔvʋr,
amaa sɔ' kʋ vɔlis nɔŋdaana.
9 Pʋpielim sɔb nɛɛsim nied nɛ nyain,
amaa bugusim sɔb fitir kpiisidnɛ tɔ'ɔtɔ.
10 Nyɛɛsim sɔb ziidi zaba kenna,
amaa banɛ siakid sa'alʋg la mɔr ya'am.
11 Zam ligidi pʋ ya'asid naarɛ;
amaa onɛ la'asid o ligidi bi'el-bi'el, li na nɔbig.
12 Fʋ ya'a mɔr ti'ir ka ti kɔ'ɔŋ,
li tisidi susʋnya ban'as;
amaa fʋ ya'a ti nyɛ fʋ ya'amlɛog bʋn,
li sumalisim nwɛnɛ tikanɛ busid nɛ vʋm.
13 Onɛ ka ba san'an o ka o gbiakid la na nyɛɛ li bɛ'ɛd,
amaa onɛ siakid sa'alʋg la na dii li nyɔɔd.
14 Ya'am sɔb pa'alʋg anɛ nyɔvʋr bulig
ka yisid ninsaal kum bɛndis pʋʋgin.
15 Onɛ gban'ad si'el gbin tɔ'ɔtɔ la nyɛt na'asi,
amaa ziri sɔb suor kennɛ san'auŋ zin'igin.
16 Onɛ an ya'am sɔb wʋsa tɛn'ɛsidnɛ ka nyaan maan si'el,
amaa zɔlʋg tʋʋma pa'annɛ o zɔlim paalʋ ni.
17 Fʋ ya'a tʋm nimbɛ'ɛd, o na kpɛn'ɛs o mɛŋ yɛla ni,
amaa tʋmtʋm onɛ an sida sɔb la mɔri laafi kenna.
18 Onɛ pʋ siakid zamisʋg la na lieb nɔŋdaan ka di nyan,
amaa onɛ siakid pa'alʋg la nyɛti na'asi.
19 Fʋ ya'am ya'a bɔɔd si'el ka fʋ ti nyɛɛ li, li ma'adnɛ sʋʋnr,
amaa zɔn la zan'as ye ba kʋ fɛndig ka bas linɛ an bɛ'ɛdɛ.
20 Onɛ gɔɔnd nɛ ya'am dim la mɛ na mɔr ya'am,
amaa onɛ zuanamɛ an zɔn na paam yɛltɔɔg.
21 Yɛlbɛ'ɛd dɔlli tʋʋmbɛ'ɛd sɔb gbin,
amaa yɛlsʋm anɛ pʋpielim sɔb din.
22 Ninsʋŋ yaas na di o faar,
amaa tʋʋmbɛ'ɛd dim kpan'am la su'anɛ gur pʋpielim dim.
23 Nɔŋ daan pɔɔg na nyaŋi maal zʋʋd sʋ'ʋŋa,
amaa teŋ kanɛ ka nidib pʋ dɔl sida la, ba na zii li gaad.
24 Onɛ zɔt sisanbig nyɔɔg kis o biig nɛ,
amaa onɛ nɔŋ o biig na sa'al o sʋ'ʋŋa.
25 Pʋpielim dim la diti ba ya'am bɔɔd si'el,
amaa bugusnam la kennɛ ka kɔ'ɔm kʋʋdi ba.