11
1 Zugsɔb la kis zam makir,amaa o ya'am bɔɔd linɛ ka li makir dɔl sida.
2 Adʋ'ʋsi-m-mɛŋ ya'a gaad tuon, nyannɛ dɔl,
amaa a-sie-m-mɛŋ mɔri ya'am kenna.
3 Ninsʋma sida la guri ba,
amaa banɛ ka' sida dim la, ba zam tʋʋma la na san'ami ba.
4 Sʋnpɛɛn daar ya'a paae, kpan'am anɛ zaalim,
amaa pʋpielim yisid nid kumin.
5 Pʋpielim dimi ka' gba'ar la,
zugʋ kɛ ka ba suor an sappi,
amaa bugusim dim la ka' alaa,
ba bugusim tʋʋma la vɛ'ɛgidi baa sigisid teŋin.
6 Pʋpielim dim bɛllim sʋŋ la yisidi ba
amaa banɛ ka' sida la ya'amlɛogʋ gban'adi ba.
7 Bugusim sɔb ya'a kpi o ti'ir wʋsa naae ya;
linɛ wʋsa ka o tɛn'ɛsid ye o tʋm nɛ o mɛŋ paŋ la na lieb zaalim.
8 Wina'am yisid pʋpiel yɛla ni,
ka lɛɛ kɛ ka li keŋ bugusim sɔb la san'an.
9 Onɛ zi' Wina'am la mɔr o nɔɔr pian'adi san'amid o kpi'a,
amaa baŋir na kɛ ka pʋpielim sɔb yii li pʋʋgin.
10 Pʋpielim sɔb nu'ug ya'a mɔr, teŋ la mɔr sumalisim;
bugus ya'a kpi, nidib maannɛ sumalisim tansid agɔla.
11 Albareka linɛ yit sida dim san'an na la zug ka teŋ la yʋ'ʋr na dʋ,
amaa bugus nɔɔri san'amidi li.
12 Ninkanɛ nɛ'ɛsid o kpi'a la ka' ya'am,
amaa sida sɔb gban'ad o nɔɔr baanlimm.
13 Bayɛʋg sɔb viigidnɛ nidib yɛlsu'ada,
amaa onɛ ka ba niŋ o yadda su'adi yɛla.
14 Teŋ kanɛ pʋ mɔr banɛ sa'an la lit nɛ;
amaa banɛ sa'an ya'a bɛ, bi'esʋg kae ye ba kʋ nyaŋi.
15 Onɛ kaanb ye o na di'e saan samme yɔ na nyɛ namisʋg,
onɛ wʋsa yis o nu'ugʋ li pʋʋgin mɔr yɔlisim.
16 Pu'a kanɛ sʋnfʋ bʋgʋs la nyɛt na'asi,
amaa dap banɛ maannɛ ba ya'amin la na nyɛ nɛ kpan'am ma'aa.
17 Pʋpiel sʋŋid o mɛŋ,
amaa zaba sɔb ieedi yɛla tisid o mɛŋ.
18 Dau bugus di'edi ziri yɔɔd,
amaa onɛ bʋt pʋpielim di'edi yɛlsida yɔɔd.
19 Pʋpielim sɔb amɛŋa nyɛt nyɔvʋr,
amaa onɛ kati dɔl bɛ'ɛd gbin la wa'anɛ kumin.
20 Zugsɔb la kis banɛ an pʋkpɛnnim dim,
amaa o ya'am bɔɔd banɛ pʋ mɔr gbadaa.
21 Li anɛ sida ye bugusim dim la kʋ nyɛ bʋʋd ka yi namisʋgʋ nɛ,
amaa pʋpielim dim la na nyɛ yɔlisim.
22 Pu'a kanɛ vɛnl ka pʋ mɔr ya'am la
nwɛnɛ sanlima baŋi na tʋ kukur nyɔnya ni.
23 Pʋpiel ya'am bɔɔdim naad nɛ sʋm,
amaa bugus ti'ir naad nɛ sʋnpɛɛn.
24 Sɔ' bɛ ka o nu'us siakid tisib
la'am nɛ wala, ka o maligim nyɛt bɛdegʋ,
ka sɔ' mɛ nu'ug pʋ lakida,
amaa ka o la'am lɛbig nɔŋdaan.
25 Onɛ piinid la na maligim nyɛ,
onɛ diisid o taaba la mɛ na nyɛɛ di.
26 Nidib tʋ'ʋdnɛ onɛ vaad diibi su'ad
ye o ti kuosi nyɛ nyɔɔd,
amaa onɛ siaki kuosid la,
albareka bɛɛ o zugin bɛdegʋ.
27 Onɛ ieed linɛ an sʋm na nyɛ yɛlsʋm,
amaa banɛ ieed bɛ'ɛd la, bɛ'ɛd na kɛɛn ba zugin na.
28 Onɛ nɔk o ti'iri niŋ o kpan'amin la na li,
amaa pʋpiel na nwɛnɛ vanma'asir nɛ.
29 Onɛ ieed yɛla tisid o mɛŋ yidim la,
pɛbisʋg ma'aa na aan o faar ka o di;
ka zɔlʋg mɛ na an ya'am sɔb sankpan'as.
30 Pʋpiel tʋʋma anɛ vʋm tiig,
ka onɛ mɔr o taaba ken na ka ba dɔl Wina'am anɛ ya'am sɔb.
31 Pʋpiel ya'a di'e linɛ nar o dunia nwa ni,
ka banɛ zi' Wina'am nɛ tʋʋmbɛ'ɛd dim on kʋ di'e linɛ nari baa?