Solomon siilima
10
1 Nɛ'ɛŋa anɛ Solomon siilima:Bikanɛ mɔr ya'am ziankidi o saam zug;
ka zɔn diisidi ba manam nyan.
2 Fʋ ya'a dɔl zam suori paam kpan'am li kʋ sʋŋi fɔɔ,
amaa pʋpielim yisidif nɛ kumin.
3 Zugsɔb la kʋ kɛ ka pʋpiel ken nɛ kɔ'ɔm,
ka mɛ kʋ kɛ ka nimbɛ'og nyɛ on bɔɔd si'ela.
4 Gbanya'am kɛtnɛ ka fʋ lieb nɔŋdaan,
amaa fʋ ya'a tʋm hali, li na kɛ ka fʋ lieb arezak daan.
5 Ya'am sɔb la'asid o ki nɛ bunib saŋa,
sieba mɛ ya'a ti bɛ bunibin ka fʋn bɛ gbɛɛmin, li anɛ nyan.
6 Pʋpielnam na paam albareka pamm.
Nimbɛ'og pian'ad ziidi zabaa kenna.
7 Ba ya'a tiɛn burikin yɛla li mɔri bareka kenna,
amaa nimbɛ'og yʋ'ʋr na pun'oe.
8 Banɛ mɔr ya'am di'ednɛ sa'al sʋŋ,
amaa banɛ pian'ad nɛ zɔlimis la na ba'as yɔri.
9 Sida dim kennɛ tuon ka dabiem kae,
amaa bugusim dim la ba na sɛnbigi ba.
10 Onɛ amisid o nifʋ pa'an yɛlsu'ada ziidi yɛla kenna,
ka onɛ pian'ad pian'ayɛɛd na ba'as bɛ'ɛd.
11 Pʋpiel pian'ad ziidnɛ vʋm kenna,
wʋʋ bulig ku'om bʋn si'em la;
amaa nimbɛ'og pian'ad ziidnɛ zaba kenna.
12 Kisidim mɔri yɛla kenna,
amaa nɔŋilim kɛtnɛ taab taali basid.
13 Onɛ mi' yɛla bakid pian'ad nɛ ya'am,
amaa zi'ilim daan nya'aŋ tigid nɛ balaar.
14 Ya'am sɔb paamidi baŋir kanɛ wʋsa ka o bɔɔd,
amaa zɔlʋg pian'ayɛɛd ziidnɛ san'auŋʋ kenna.
15 Arezak sʋŋidi bʋndaan wʋʋ zaŋguom kpi'ema sʋŋid tempʋʋg si'em la,
amaa nɔŋ kɛtnɛ ka nɔŋdaan ba'asid yɔri.
16 Tʋʋm sʋma sɔb yɔɔd anɛ vʋm,
amaa tʋʋmbɛ'ɛd yɔɔd anɛ tʋbtɛɛgir.
17 Banɛ wʋm sa'alʋg na vʋe,
amaa banɛ yidig ka pʋ siak ye ba pa'ali ba la na zii ba taaba kpɛn' mɔɔg.
18 Onɛ su'a mɔr kisidim o sʋʋnrin
anɛ dama'am sɔb,
onɛ ginnɛ yɛɛsid anɛ zɔlʋg.
19 Fʋ ya'a pian'adi galis fʋ kʋ luak tʋʋmbɛ'ɛdɛ,
amaa onɛ gban'ad o zilim anɛ ya'am sɔb.
20 Pʋpiel pian'ad nwɛnɛ anzurifa sʋŋ nɛ,
nimbɛ'og pʋtɛn'ɛr anɛ zaalim.
21 Pʋpielim dim pian'ad sʋŋid nidib bɛdegʋ,
amaa zɔn kpiidnɛ ba ya'amka'alʋg zug.
22 Zugsɔb la albareka kɛt ka nid liebid arezak sɔb,
ka li pʋ ziid yɛla kennaa.
23 Tʋʋmbɛ'ɛd nwɛnɛ di'ema tis zɔlʋg,
amaa nimbanɛ mɔr baŋir bɔɔdi ya'am.
24 Bugusnamɛ zɔt si'el dabiem la nyaŋidi ba nɛ,
amaa pʋpielnam on na nyɛ ban bɔɔd si'el.
25 Sisi'em ya'a da'ae li na mɔr nimbɛ'ɛdnam la gaad,
amaa pʋpielnam la zi'enɛ kiŋ-kiŋ saŋa wʋsa.
26 Nwɛnɛ danmi'isʋgʋ mi'is nɔɔrin,
ka nyɔ'ɔs kpand nini si'em la,
ala ka gbanya'a aan tis onɛ tʋm o.
27 Zugsɔb la zɔtim na kɛ ka fʋ vʋe yuug.
Nimbɛ'ɛdnam la kpiidnɛ ka ba daar pʋ paae.
28 Ninsʋma ti'ir ziidi sumalisim kenna,
amaa nimbɛ'ɛdnam pʋ mɔr ti'ir si'a bɛogɔ.
29 Zugsɔb la guri banɛ dɔl suosʋma la,
ka lɛɛ san'amid banɛ tʋm linɛ pʋ nara.
30 Pʋpielnam na zi'e kiŋ-kiŋ saŋa wʋsa,
amaa nimbɛ'ɛdnam kʋ kpɛm bɛ teŋ la zugɔ.
31 Pʋpielnam pian'adi ya'am,
amaa nɔɔr kanɛ pian'ad pian'abɛ'ɛd la na nyɛ san'auŋ.
32 Pʋpielnam mi' linɛ nar ye ba pian',
amaa nimbɛ'ɛdnam pian'adnɛ pian'agɔlima.