Aya'am nɛ yalimis yɛla
9
1 Aya'am mɛɛ o yir,ka ba' zan'antɔlis ayɔpɔi ka li zi'e sappi.
2 O dʋg ni'im sʋ'ʋŋa ka maal damalisiŋ
ka li kpɛlim nidib la na kena di.
3 O tʋm o tʋmtʋm pu'ab tempʋʋgin
ye ba buol nidib na ka ba di.
O zi'e teŋ la zin'ikanɛ dʋ la ni n
ka kaasid agɔla yɛt ye,
4 “Yanam banɛ ya'am nam pʋ bi' la, kem na!”
Ka yɛl banɛ an zɔn la ye,
5 “Kemi na dii m diib la
ka nu dankanɛ ka m digil la.
6 Basim ya'amka'alʋg tʋʋma ka fʋ na vʋe;
ka dɔl baŋir suor sʋ'ʋŋa.”
7 Fʋ ya'a sa'al nintʋ'ʋsim sɔb fʋ di'edi tʋ'ʋd;
fʋ ya'a sa'al nimbɛ'og o na zɛrigif.
8 Da sa'al nintʋ'ʋsa ka o na kisigif;
amaa fʋ ya'a sa'al ya'am sɔb o na nɔŋif.
9 Fʋ ya'a yɛl ya'am dim si'el li maligim paasidi ba nɛ ya'am.
Fʋ ya'a yɛl pʋpielnam si'el li paasidi ba nɛ baŋir.
10 Zugsɔb zɔtim an ya'am pin'ilʋg,
fʋ ya'a mi' Onɛ an Kasi la li anɛ baŋir.
11 Ya'am paasidnɛ fʋ vʋm yʋma
ka fʋ na yuug dunia nwa ni.
12 Fʋ ya'a mɔr ya'am, fʋn nɔɔ na dii li malisim;
fʋ mɛ ya'a ka' ya'am, fʋn nɔɔ na di fara.
13 Pu'ayaliŋ maannɛ vuud,
o zi' si'ela ka mɛ pʋ zɔt nyannɛ.
14 O zi'inɛ o yir za'anɔɔrin,
bɛɛ digil o kʋk tempʋʋginɛ zin',
15 ka buon banɛ gat
ka ba nini mu'oe nɛ ba tʋʋma la ye,
16 “Yanam nimbanɛ ka' ya'am la, kpɛn'ɛmi na!”
Ka yɛt zɔn la ye,
17 “Fʋ ya'a zu ku'om nu li malis nɛ.
Fʋ mɛ ya'a zu diibi su'a di, li malis nɛ hali.”
18 Banɛ ka o buon la zi' ye nimbanɛ kpɛn'ɛd o yin la kpiidnɛ,
ba kʋ tun'e baŋ ye banɛ pʋn kpɛn' la bɛ yaʋgʋn kʋdim-kʋdim saa.