Ya'am yɛla
8
1 Kɛlisimi! Aya'am buon la.Abaŋir yis o mɛŋ paalʋ na.
2 O nwɛnɛ pu'a zi'e suor kanɛ bɛ kʋkʋn zug
nɛ suokita ni.
3 O zi'enɛ suokanɛ dɔlli kpɛn'ɛd tempʋʋgin la,
ani ka o zi'e buon nidib la ye,
4 “Gɔsimi, m pian'adi tisidi ya wʋsa;
m buonnɛ yanam banɛ wʋsa bɛ dunia ni!
5 Yanam ya'am pɔɔdim dima, bɔɔmi ya'am.
Yanam banɛ an zɔnnɛ, mɔɔmi ka gban'e pian'ad gbin.
6 Kɛlisimi ka m mɔri yɛlsʋm sieba ye m yɛl;
man yɛt si'el la wʋsa dɔlli suor.
7 Man nɔɔr tu'asidnɛ sida;
man kisnɛ ziri pian'ad.
8 Linɛ yiti m nɔɔrin na wʋsa mɔri sʋŋir;
ziri baa yinne kae, ka li mɛ kʋ kɛ ka sɔ' kpɛn' mɔɔgɔ.
9 Li nienɛ nyain tis banɛ gban'ad si'el gbin;
ka an tituaa tis banɛ mɔr mi'ilim sʋ'ʋŋa.
10 Gaŋimi man pa'ala la, ka bas anzurifa,
ieemi baŋir ka kɛ sanlima.
11 Man anɛ Aya'am, m gat bʋnsʋma wʋsa;
fʋn mɔr ya'amlɛog nɛ si'el wʋsa kʋ nyaŋi nɔki mak nɛ mam.
12 Man anɛ Aya'am, m gban'ad si'el gbin;
man mɔr baŋir nɛ pʋtɛn'ɛsʋma.
13 Zugsɔb la zɔtim anɛ fʋn na kis tʋʋmbɛ'ɛd.
Man kis nyɛɛsim nɛ tita'alim,
nɛ suobɛ'ɛd nɛ ziri pian'ad wʋsa.
14 M ya'a gban'e si'el m tʋmnɛ ala kimm.
Man gban'ad si'el gbin, ka mɛ mɔr paŋ.
15 Man sʋŋid na'anam ka ba gɔsidi ba teŋ
ka pa'an tuongatib ka ba gban'ad wadsʋma.
16 Manɛ sʋŋid tuongatib wʋsa dunia nwa pʋʋgin
la'am nɛ kpi'emnam nɛ ninsʋma wʋsa.
17 Man nɔŋnɛ banɛ nɔŋim la;
onɛ wʋsa ieed mam sid na nyɛɛm.
18 Arezak nɛ na'asi bɛ nɛ man san'an,
kpan'am nɛ mɔrim linɛ pʋ naad bɛ nɛ man ni.
19 Linɛ ka fʋ na paam man san'an la gat sanlima,
ka tisid bʋnsʋma ka li kʋ nyaŋi mak nɛ anzurifa sʋŋɔ.
20 Mam bɛ nɛ pʋpielim bɛllim;
ka dɔl sida suor tituaa,
21 ka tisid banɛ nɔŋim la kpan'am,
ka kɛt ka arezak pɛ'ɛnnɛ ba yir.
22 Man ka Zugsɔb la da dɛŋin maal yiiga;
on da nan pʋ maal si'el-si'el la ka mam pʋm bɛ.
23 Pin'ilʋgʋn sa ka o maal mam,
manɛ an yiiga ka dunia nyaan pin'il.
24 Ba da du'a man yiiga ka atɛuk nyaan maal,
saŋa kanɛ ka ku'om nam pʋ bʋn la.
25 Zuoya nɛ kʋkʋna da nan kae la,
ka mam pʋm bɛ.
26 Saŋa kan ka Wina'am nam pʋ maal dunia
nɛ teŋgbauŋ nɛ titanbin'isi.
27 On da zi'el saŋgbauŋʋ li zin'igin la, m da bɛɛ ani,
saŋa kanɛ ka o da buoɛn ku'om nɛ teŋ bɛn la.
28 O da kɛ ka saŋgbauŋ zi'en ki',
ka kɛ ka atɛuk pin'ili bʋn nɛ paŋ,
29 ka zi'el nɔɔri tis atɛuk ku'om
ye li da pɛ'ɛli gaad on pa'al si'em la;
onɛ mɛ da pin'il dunia ɛɛnbir la.
30 Saŋkan ka man da bɛɛ o san'an wʋʋ onɛ mi' mɛɛb yɛla nɛ.
Daar wʋsa manɛ da kɛt ka o mɔr sumalisim,
ka m mɛŋ da maan sumalisim o san'an saŋa wʋsa.
31 M sʋnf da malis nɛ dunia la wʋsa
ka m nini tig nɛ ninsaal buudi.
32 M biisɛ, nannanna kɛlisimini m pian'ad nwa;
albareka bɛ nɛ banɛ dɔl man yɛl si'el la.
33 Kɛlisimini m pa'ala la ka pamm ya'am,
mid ka ya nɛ'ɛsi lii bas.
34 Albareka bɛ nɛ onɛ wʋsa wʋmi m pian'ad
ka bɛɛ m san'an daar wʋsa,
ka zi'e m za'anɔɔrini gur.
35 Banɛ ieemi nyɛ la mɔr nyɔvʋr,
ka Zugsɔb la sʋnf mɛ na ma'ae nɛ ba.
36 Banɛ pʋ nyɛ mam la na san'ami ba mɛŋ;
onɛ wʋsa pʋ bɔɔd mam bɔɔd nɛ kum.”