7
1 M biiga, tɛnr man yɛlif si'el la,ka da tam man zi'elif ye fʋ tʋm si'em la.
2 Maalim man pa'al si'el la, ka fʋ na vʋe.
Gu'usim sʋ'ʋŋa ka dɔlli m pa'ala la,
wʋʋ fʋn gu'usid nɛ fʋ nif bielif yɛla si'em la.
3 Kɛl ka m pa'ala la bɛɛ fʋ ni saŋa wʋsa;
lɔɔmi li tabili fʋ nu'ubibis,
ka sɔbi li digili fʋ sʋnfʋn.
4 Yɛlim ya'am ye, “Fʋ anɛ m taʋn,”
ka buol baŋir ye fʋ sizua.
5 Ba na sʋŋif ka fʋ luak pu'agɔɔnda,
nɛ pu'a banɛ dɔl dapi pian'ad zufa'asim pian'ad la.
Pu'agɔɔndir la yɛla
6 Daar yinne ka m daa vɛɛsi m takoro ni
gɔsid yiŋ ye m nyɛ linɛ bɛ.
7 M daa nyɛ dasam bɛdegʋ banɛ ya'am pʋ bi' nannɛ,
amaa yinne daa bɛɛ ani an gɛdʋg.
8 O daa dɔlnɛ tempʋʋgin suor la gati
ti paae lɔdsi'a ka pu'a sɔ' yir bɛɛ ani.
O daa dɛn'ɛdnɛ yir la gat
9 ka nintaŋ bɔɔd liib
ka li sɔbid nyɔs-nyɔs.
10 Ka pu'a la sia'al o,
ka maal o mɛŋ wʋʋ pu'agɔɔndir nɛ,
ka pin'ili bɛlisid o.
11 O daa anɛ pu'a kanɛ zugʋ kpi'em ka pʋ zɔt nyannɛ,
ka bɛ pal la zugʋ ken saŋa wʋsa,
12 ka zi'e lɔdigin,
bɛɛ suoraug la zug, bɛɛ da'an la gur.
13 O daa kuak dasaŋ la, ka muak o,
ka gɔs o nindaa kii, ka ye,
14 “M maali m maan zina,
ka maan la ni'im bɛ.
15 Dinzug ka m yina ieedif;
m ieef nɛ hali ka yʋ'ʋn nyɛɛf nwa!
16 M da'anɛ gadʋ pien sʋma Egipt teŋin
nɔki ligili m gadʋg la.
17 M nɔknɛ tudaar sʋma puusi li
ka li anɛ bʋnnyubisa buudi wʋsa.
18 Kpɛn'ɛm na digin nɛ mam yʋ'ʋŋa
ka bɛog ti nie, ka ti wʋsa na di malisim.
19 M sid ka' yinne,
o duoe nɛ suori keŋ lallisa.
20 On nɔk ligidsi'a la pʋ pɔɔda,
o na paae bakuai ayi'.”
21 Pu'a la daa pan'as o nɛ nɔŋgban malisiŋ,
ka zaŋ antu'a malisiŋi gban'e o.
22 Ka o kpɛn yuk tɔ'ɔtɔ dɔl pu'a la nya'aŋ wʋʋ naaf ka ba mɔri wa'ae kʋʋb,
bɛɛ waligi ianki sig baŋin
23 ka ba kʋns o sʋnf nɛ piim si'em la.
O daa nwɛnɛ niiŋe na ian'adi ken bɛndigin
ka zi' ye o nyɔvʋr bɛnnɛ la.
24 Alazugɔ, m biisɛ, kɛlisimi man yɛt si'el la sʋ'ʋŋa
ka yɔ'ɔgi ya tʋbaa wʋm nɛ nimmua.
25 Mid ka ya kɛ ka ya ya'amlɛog kpɛn' pu'a bannam buudii,
pʋn da bie lɛbi ba san'an baa bi'elaa.
26 O nyaŋi san'am dap bɛdegʋ.
Ya'a kpɛlim banɛ kpi la, fʋ kʋ nyaŋi kaali baa.
27 Fʋ ya'a keŋ o yin, fʋn baŋim ye fʋ bɛ nɛ suori ken kpi'im teŋ.
Li anɛ suogiŋ kanɛ ziidi fʋ ken kumin.