Da kaanb ye fʋ na yɔ sɔ' sammɛ
6
1 M biiga, fʋ ya'a nam mi' kaanbnɛ ye fʋ di'e sɔ' samme yɔ,ka tik nu'ugʋ tis saan;
2 bɛɛ nam mi' pian'anɛ pian'ad ka li diif
ka kaanb kaanbʋg ka li gɛɛlif,
3 ala m biiga, baŋim ye fʋ bɛ nɛ o sɔb nu'usin,
amaa fʋn na niŋ si'em yii li pʋʋginɛ nwa:
zɔm keŋ o san'an tɔ'ɔtɔ
sie fʋ mɛŋ ka nwɛ' o nu'ug.
4 Niŋim tɔ'ɔtɔ ka da maan galim
bɛɛ bɔɔd ye fʋ vʋ'ʋs bɛɛ zɔɔnsim ka nyaan tʋmm.
5 Zɔm yi bɛndig la pʋʋgin wʋʋ walig
bɛɛ niiŋe na nyɛ sʋlʋg ka ianki yi si'em la.
6 Yanam gbanya'anama, zamisimi ya'am yi salinsa'asin,
gɔsimi ban tʋm si'el la ka gban'e li gbin.
7 Ba ka' tuongat bɛɛ na'ab
bɛɛ onɛ sʋ'oe baa.
8 Amaa ba la'asid diib tigir saŋa
ka su'ad zʋʋdi gur kɔ'ɔm saŋa.
9 Gbanyan'a la ye o gbis daba ala?
Ka bʋndaar ka o na nie gbɛɛminɛ?
10 On yɛt si'el anɛ ye, “Kɛl ka m gbis bi'ela, ka zɔɔnsim bi'ela
ka kpɛn'ɛsi m nu'us gɛɛgʋni vʋ'ʋs.”
11 Amaa on bɛ gbɛɛmin la, nɔŋ na kena wʋʋ na'ayiig nɛ
ka fara kpɛn' o nwɛnɛ faandibi kena faaɛn o nɛ.
12 Nimbɛ'ɛdnam bɛɛ
banɛ ka' gban'ar la ginnɛ ma'ad ziri.
13 Ba amisidi ba nini, ka sɔɔndi ba nɔba,
ka tiesid nu'us,
14 ka gban'ad gban'abɛ'ɛdi ba sʋnfʋn,
ka ieed yɛla tugun nidib zin'ig wʋsa.
15 Nɛ'ɛŋa zug tɔɔg na di'igi ba,
ka ba paam sapu'ad bɛ'ɛd bɛ'ɛdi
ka onɛ na ti'ebi ba kae.
16 Bʋnama ayɔpɔi bɛ ka Zugsɔb la kis hali
ka pʋ bɔɔd ye o nyɛ ka ninsaal niŋi li.
17-19 Bʋn ban anɛ:
nyɛɛsim gɔsig
nɛ zilim kanɛ ma'ad ziri
nɛ nu'ubanɛ kʋʋd nimbanɛ pʋ tʋm taalɛ
nɛ pʋtɛn'ɛr kanɛ gban'ad gban'abɛ'ɛd
nɛ onɛ nini mu'oe ka o kirid tɔ'ɔtɔ ye o tʋm bɛ'ɛd
nɛ onɛ dit ziri kasɛt sariakadib zin'igin
nɛ onɛ tugun ba'abiis ka ba zabid.
Dau nɛ pu'a san'auŋ sa'alʋg yɛla
20 M biiga, tʋmmi fʋ saamme ye fʋ tʋm si'el la,
ka da tammi fʋ ma sa'alʋg laa.
21 Kɛl ka ba pian'ad la bɛɛ fʋ ni saŋa wʋsa,
lɔɔmi li kɔlli fʋ niŋgɔɔnrin wʋʋ niŋgɔnkɔrig nɛ.
22 Ba pa'ala la na sʋ'ʋŋif zin'ig wʋsa,
ka gurif yʋ'ʋŋ, ka mɛ sa'alif nintaŋ.
23 Ba pa'ala la anɛ nɛɛsim kanɛ nie,
ba sa'alʋg la na pa'alif fʋn na bɛ si'em,
ka li anɛ nyɔvʋr suori tisif.
24 Li na sʋ'ʋŋif ka fʋ yi pu'agɔɔnda nu'usin,
nɛ banɛ an nidib pu'ab ka mɔr nɔmalisim ye ba yuomif la.
25 Da kɛ ka fʋ ya'am kpɛn' pu'a la vɛnlim zugɔ,
da kɛ ka o nindaa vɛnlim tiaki fʋ ya'am.
26 Pu'agɔɔndir yɔɔd pʋ gat bodobodo gbil ligidii,
amaa sɔ' pu'a na san'ami fʋ nyɔvʋr wʋsa.
27 Fʋ na kpa'ae bugumsaana niŋi fʋ nɔba zug
ka li kʋ la'aŋi fʋ fuugɔɔ?
28 Fʋ na nɔ bugum nɛ nɔba
ka li kʋ vʋnligi fɔɔ?
29 Ala mɛn ka li aaɛn tis onɛ wʋsa dig nɛ sɔ' pu'a.
Onɛ wʋsa si'is pu'a nwa kʋ yi namisʋgʋnɛ.
30 Na'ayiig ya'a zu ka li anɛ o pʋʋr yɛla,
nidib na kɛɛs o bas linzugɔɔ?
31 Ba ya'a gban'e o, o na yɔ on zu si'el la lɛbis nɔɔr ayɔpɔi;
o na nɔk on mɔr si'el la wʋsa yɔ.
32 Amaa dau kanɛ san'am pu'a ka' ya'am,
o kʋdim san'amid nɛ o mɛŋ.
33 Bʋ'ʋd nɛ zufa'asim na aan o yɔɔd,
ka o nyan la na bɛ saŋa wʋsa;
34 bɔzugɔ, fufum na kɛ ka dau sʋʋnr duoe
ka o ya'a ti ye o zab, o kʋ zɔt nimbaanliga.
35 Si'el kae ka fʋ na nɔki yɔɔ o ka o di'e,
si'el kae ka fʋ na tis o ka o sʋnf ma'ae.