Dau nɛ pu'a san'auŋ sa'alʋg
5
1 M biiga, kɛlisimi m pian'adka wʋm linɛ tisid ya'am la sʋ'ʋŋa.
2 Bɔzugɔ li na kɛ ka fʋ baŋ fʋn na mɔri fʋ mɛŋ si'em,
ka fʋ pian'ad na pa'al ye fʋ mɔr baŋir.
3 Pu'agɔɔndir nɔɔr tun'e malis wʋʋ siind nɛ,
bɛɛ bʋki gat kpaam,
4 amaa li naarin o yɛla tɔi gat kʋk,
o na gaad ka basif nɛ sʋnsa'aŋ nɛ tɔɔg.
5 O ziidif nɛ wa'ae kumin;
on dɔl suosi'a la kennɛ kpi'im teŋin.
6 O pʋ dɔl suokanɛ na tis o vʋm la,
o yirid nɛ giligid ka zi' linɛ maana.
7 Nannanna, m biisɛ, kɛlisimi man yɛti ya si'el la,
kɛlisimi sʋ'ʋŋa ka da tamm.
8 Mid ka fʋ li'el pu'a kan buudi,
pʋn da lɛb o yir za'anɔɔr babaa!
9 Fʋ ya'a niŋ ala, fʋ na zaŋi fʋ kpi'euŋʋ tis sieba,
ka fʋ nyɔvʋr bɛlim wʋsa na bɛ ninyɔɔd nu'usin.
10 Ɛɛn, saam na nɔki fʋ arezak la wʋsa!
Ka fʋn ieen ɔnsiri paam si'el la na lieb sɔ' din.
11 Fʋ ya'a ti digi bɔɔd kum fʋ na fabil hali,
bɔzugɔ fʋ niŋgbiŋ nɛ fʋ giinla wʋsa gɛnnɛ
12 ka fʋ yʋ'ʋn yɛt ye, “Bɔ ka m daa pʋ zamis ya'am?
Bɔ ka m daa kis sɔ' na sa'ali ma?
13 M daa pʋ di'e m pa'an la nɔɔrɛ.
M daa pʋ siak m karim saamnamɛ pa'an si'el la.
14 San'auŋ yʋ'ʋn bɔɔdi paam,
man ti ye m baŋ la ka nyan diim nidib sʋʋgin.”
15 Numi fʋ mɛŋ bulig ku'om,
ku'okanɛ bunɛ fʋ mɛŋ buligin la.
16 Da nwɛnɛ bulkanɛ pʋbid yɔɔg-yɔɔg
ka li ku'om yadigid suoraadinɛ.
17 Kɛl ka fʋ bulig ku'om anɛ fʋn ma'aa din;
mid ka fʋ kɛ ka saam nuudi sʋŋidif.
18 Wina'am na niŋi fʋ bulig la albareka.
Mɔr sumalisim nɛ pu'a kanɛ ka fʋ di fʋ dasannimin la.
19 O vɛnlim nwɛnɛ mɔlif bɛɛ walnya'aŋ nɛ,
kɛl ka o bin'isa nɛ o niŋgbiŋ la mɔrif nyɛlʋg saŋa wʋsa.
20 M biiga, bɔ ka fʋ basi fʋ mɛŋ ka pu'agɔɔndir nyaŋi fɔ?
Bɔ ka fʋ ya'amlɛog lɛɛ kpɛn' onɛ ka' fʋ pu'a?
21 Wina'am nyɛt fʋn maan si'el la wʋsa,
fʋn ken zin'isi'a wʋsa nied paalʋ o san'an.
22 Bugusim sɔb tʋʋmbɛ'ɛd anɛ bɛndigi lɛn tis o mɛŋ.
Ba mɛŋ tʋʋmbɛ'ɛdi gban'adi ba ya'as.
23 Ban pʋ mɔr a-gban'a-m-mɛŋ la zug ka ba kpiid.
Ba mɛŋ yalimisi kʋʋdi ba.