Ya'am gat si'el wʋsa
4
1 M biisɛ, kɛlisimi ya ba' sa'alʋg;kɛlisimi sʋ'ʋŋa ka gban'e li gbin.
2 M tisi ya pa'alsʋŋ,
alazugɔ da tami m pa'ala la.
3 Man da nan an dasaŋ ka bɛɛ m saam yin la;
man da nam pɔɔd ka aan m ma biyimmir la,
4 m saam da pa'alim ka yɛl ye,
“Gban'ami m pian'ad la nɛ fʋ sʋnf wʋsa;
kɛl ka m nɔzi'elʋg la bɛɛ fʋ ni ka lin ka fʋ na vʋe.
5 Ieem ya'am, ka linɛ gban'ad pian'ad gbin;
da tami m pian'ad la bɛɛ fʋ bie ka basi lii.
6 Da bas ya'am, ka onɛ na gu'udif;
nɔŋim o ka o na gurif.
7 Ya'am gat si'el wʋsa; dinzugɔ ieem ya'am.
Hali baa li ya'a na tɔi si'em wʋsa n tisi fɔ, fʋn mɔɔm ka bɔ baŋiri paas.
8 Na'asim o ka o na dʋ'ʋsif;
kuakim o ka o na tisif girima.
9 O na maal linɛ ligin zugʋ ligili fʋ zug
ka nɔk na'am zupibig linɛ vɛnli pidif.”
10 Kɛlisim, m biiga, siakim man yɛtif si'el la,
ka fʋ yʋma na zu'oe.
11 M mɔri fʋ dɔlisid nɛ ya'am suor
ka kɛ ka fʋ dɔl suoya banɛ kpa' sappi.
12 Fʋ ya'a ken, si'el kʋ vi' fʋ suorɛ;
fʋ ya'a zɔt, fʋ nɔbir kʋ tu'ugɛ.
13 Di'em sa'al sʋma ka da bas ka li gaadɛ;
guri li sʋ'ʋŋa ka li anɛ fʋ nyɔvʋr.
14 Da nɔki fʋ nɔbiri keŋ bugusnam zin'iginɛ
bɛɛ fʋ ken nɛ nimbɛ'ɛdnama.
15 Luakim ka da dɔl anii;
fɛndigim dɔlli fʋ suori gaad.
16 Bɔzugɔ ba ya'a pʋ tʋm bɛ'ɛdɛ ba kʋ nyaŋi gbisɛ,
ba ya'a pʋ kɛ ka sɔ' lii ba pʋ nyaŋidi gbisida.
17 Ba diib anɛ tʋʋmbɛ'ɛd
ka zaba aan ba daam ka ba nuud.
18 Pʋpielim dim suor nwɛnɛ bɛogʋ na nied nyain nɛ,
ka maligim nied hali ti paae nintaŋ tisʋʋs.
19 Amaa bugusim dim la suor nwɛnɛ liktita'ar;
ba kennɛ tu'usid ka zi' linɛ kɛ ka ba tu'usida.
20 M biiga, kɛlisim man yɛtif si'el la;
kɛlisimi m pian'ad la sʋ'ʋŋa.
21 Da kɛ ka li yii fʋ san'anɛ,
kɛl ka li bɛɛ fʋ sʋnfʋn;
22 bɔzugɔ li anɛ vʋm tis banɛ nyɛɛ li la
ka an laafi tis ninsaal niŋgbina wʋsa.
23 Linɛ gaadi li wʋsa anɛ ye, fʋ gɔsimi fʋ sʋnf sʋ'ʋŋa
ka linɛ an vʋm bulig.
24 Yisim pian'ayaalisi fʋ nɔɔrin;
da kɛ ka ziri pian'ad li'eli fʋ nɔŋgban nɛ.
25 Kɛl ka fʋ nini kpa' fʋ tuon
ka fʋ mi' fʋn ken si'el.
26 Maalimi fʋ suor ka li an sassi
ka gban'ad suoya banɛ zi'e kiŋ-kiŋ.
27 Da bie lɛb datiuŋ bɛɛ dagɔbʋga;
da kɛ ka fʋ nɔba ken bɛ'ɛd zin'iga.