Dasam nɛ pu'asada sa'alʋg
3
1 M biiga, da tami m pa'ala la,amaa kɛl ka m nɔzi'elʋg la bɛɛ fʋ sʋnfʋn.
2 Bɔzugɔ, li na kɛ ka fʋ yʋma zu'oe fʋ nyɔvʋr bɛllimin
ka mɛ na kɛ ka si'el wʋsa an sʋ'ʋŋa tisif.
3 Da kɛ ka nɔŋilim nɛ sida bɛllim pɔ'ɔgi fʋ san'anɛ;
lɔɔmi baa kɔri fʋ niŋgɔɔnrin,
sɔmmi baa fʋ sʋʋnrin.
4 Ala ka Wina'am nɛ nidib sʋʋgin
fʋ na mɔr yʋ'ʋsʋŋ ka ba na bɔɔdi fʋ yɛla.
5 Niŋim Zugsɔb la yadda nɛ fʋ sʋnf wʋsa
ka da ti'e fʋ mɛŋ mi'ilim;
6 fʋ suoya wʋsa ni, tiɛnm Zugsɔb la yɛla,
ka onɛ na pa'alif suokanɛ an sappi.
7 Da ma' fʋ mɛŋ ka tɛn'ɛs ye fʋ mɔr ya'am halii;
zɔm Wina'am ka da tʋm bɛ'ɛdɛ.
8 Nɛ'ɛŋa na tisi fʋ niŋgbina laafi
ka kpɛ'ɛŋi fʋ kɔnba.
9 Na'asim Zugsɔb la nɛ fʋ ligidi,
nɛ zʋʋd linɛ ka fʋ bun yiiga la wʋsa;
10 ka linɛ na kɛ ka fʋ bʋya pɛ'ɛli badigid,
ka fʋ gan'a na pɛ'ɛl nɛ danpaalig.
11 M biiga, da nɛ'ɛs Zugsɔb la tʋbtɛɛgirɛ;
o ya'a zɛrigif fʋn da kɛ ka fʋ sʋnf pɛligɛ,
12 bɔzugɔ Zugsɔb la tɛɛgidnɛ banɛ ka o nɔŋ la tʋba,
nwɛnɛ saamme tɛɛgid bikanɛ ka o ya'am kpɛn' tʋbir si'em la.
13 Wina'am albareka bɛ nɛ dau kanɛ paam ya'am,
nɛ dau kanɛ gban'ad si'el gbin,
14 bɔzugɔ ya'am mɔr nyɔɔdi gat anzurifa,
on yisid si'el na la gat sanlima.
15 Li anɛ bʋnsʋŋ hali gat si'el wʋsa;
linɛ aan fʋ bɔɔdim wʋsa kʋ mak nɛ lii.
16 Nyɔvʋwɔk bɛ nɛ ya'am sɔb datiuŋ
ka o dagɔbʋg mɔr kpan'am nɛ na'asi.
17 O suoya anɛ suosʋma,
ka o suobuga la mɔr sumbʋgʋsʋm.
18 O anɛ vʋm tiigi tis banɛ wʋsa di'e o la;
banɛ gban'e o nu'us ayi' la na nyɛ zusʋŋ.
19 Li anɛ ya'am ka Zugsɔb la da nɔki ɛɛnb dunia la,
ka zaŋ o mi'ilim kɛ ka saŋgbana bɛɛ li zin'igin.
20 O baŋir zug ka o da pʋdig ku'ozulima la,
ka kɛ ka mɛligim yit saŋgbana ni lit teŋin na.
21 M biiga, kpɛm mɔri fʋ ya'am la,
nɛ gban'asʋma banɛ na sʋ'ʋŋif,
da kɛ ka li yi ka basi fɔ.
22 Li na an vʋm tisif,
ka an niŋgɔnkɔrigi fʋ niŋgɔɔnrinɛ pɛ'ɛs vɛnlim.
23 Ala ka fʋ suor pʋʋgin, yɛl kʋ paae fɔ;
ka fʋ nɔbir kʋ tu'ugɛ.
24 Fʋ ya'a digi fʋ kʋ zɔt dabiem;
fʋ ya'a diginɛ gbis fʋ gbɛɛm na malis.
25 Da zɔt dabiem ye yɛltɔɔgʋ na ti paaf
wʋʋ san'auŋʋ ɛɛnti gbirigi paae bugusim dim si'em laa.
26 Zugsɔb la ka fʋ na ti'e
ka o na gu' fʋ nɔba ka baans kʋ gban'e fɔ.
27 Fʋ ya'a mɔr paŋ,
fʋn da mɔŋ sɔ' bʋnsʋŋ linɛ nar ye o di'e.
28 Mid ka fʋ yɛli fʋ kpi'a ye
“Kem ka lɛb na; ka bɛogɔ m saa na tisif,”
ka pʋn mɔri li bʋnnɛ.
29 Mid ka fʋ gban'e gban'abɛ'ɛdi fʋ kpi'a
onɛ an sida sɔb ka kpi'e nɛf la.
30 Mid ka fʋ ma'aa tabili fʋ kpi'a zaalim-zaalim
ka o pʋ maalif bɛ'ɛdɛ.
31 Da mɔr fufum nɛ onɛ zabid yɔri-yɔri
bɛɛ fʋ gaŋ o suoya la sieba dɔlla.
32 Zugsɔb la kis onɛ bɛllim pʋ dɔl suorɛ;
amaa banɛ bɛllim an sʋm la on nɛ ban anɛ yinne.
33 Zugsɔb la nɔpɔɔr bɛ bugusim sɔb yin,
amaa o niŋid pʋpielim dim yir bareka.
34 Banɛ dʋ'ʋsidi ba mɛŋ nɛ nyɛɛsim la'adi ba taaba la
Zugsɔb la mɛ na la'adi ba,
ka lɛɛ tisid banɛ sie ba mɛŋ la yɔlisim.
35 Ya'am dim na di na'asi faar,
amaa banɛ an zɔn la diti nyan.