Ya'am nyɔɔd
2
1 M biiga, fʋ ya'a na di'e m pian'ad nɛ m pa'alaka kɛ ka m nɔzi'elʋg la bɛ fʋ ni,
2 ka yɔ'ɔgi fʋ tʋba kɛlis ya'am
ka kɛ ka fʋ sʋnf gban'e li gbin,
3 fʋ ya'a kaasidi buon baŋir
ka dʋ'ʋs kʋkɔri kaasid ye fʋ gban'e si'el gbin,
4 fʋ ya'a iee li wʋʋ anzurifa
ka ieedi li wʋʋ kpan'am linɛ su'a,
5 ala ka fʋ na baŋ Zugsɔb la zɔtim gbin
ka nyɛ Wina'am baŋir.
6 Bɔzugɔ Zugsɔb la tisid ya'am,
o nɔɔrin ka baŋir bɛ
nɛ linɛ gban'ad yɛla gbin.
7 O tisid pʋpielim dim nyaŋir,
ka an gbanti'edʋgʋ tis banɛ bɛllim dɔl suor la.
8 Onɛ gɔsid banɛ an sida dim
ka gur nimbanɛ bɛllim dɔl suor la.
9 Ala ka fʋ na gban'e pʋpielim nɛ sida gbin
nɛ linɛ an sʋm nɛ suosʋŋ wʋsa.
10 Ya'am na kpɛn' fʋ sʋnfʋn,
ka baŋir malisi tisif.
11 Pʋtɛn'ɛsʋŋ na gu'udif
ka fʋn tun'e bakid yɛla gbin la na gurif.
12 Ya'am na faaɛn fʋ yis nimbɛ'ɛdnam suoya ni,
nɛ banɛ pian'adi ka' kibar la.
13 Ban banɛ bas sida suor
ka dɔl linɛ bɛ likin la.
14 Ba ya'amlɛog bɛ nɛ bɛ'ɛd tʋʋma ni ma'aa
ka ba mɔr sumalisim nɛ Aka'aya'am dimi tʋm bɛ'ɛd si'em la.
15 Ba suoya anɛ suogɔnlima
ka ba tʋm biriku'an tʋʋma.
16 Li na yisif pu'asan'auŋ pʋʋgin,
nɛ pu'agɔɔndir onɛ mɔr pian'amalisa bɛlisid nidib la.
17 O bas o pu'asatim saŋa sid
ka tam nɔnaar kanɛ ka o maal nɛ Wina'am la.
18 O yisuor la kennɛ sigid kum zin'igin
ka o suoya wʋsa ken kpi'im teŋ tɔ'ɔtɔ.
19 Sɔ' pʋ kpɛn'ɛd o san'an ka lɛn yit na
bɛɛ o lɛn nyɛ nyɔvʋr suorɛ.
20 Lin an si'em la, dɔl ninsʋma suor
ka dɔl pʋpielim dim suor.
21 Yɛlsida dim na kpɛm bɛ teŋin la,
ka banɛ pʋ mɔr gba'ar la kpɛlim ani;
22 amaa bugusim dim la tuŋ kʋ tiɛn,
ba na vuoɛn banɛ ka' sida dim la yis teŋin la nyain.