Siilima
1
1 Solomon onɛ da an David biig, ka an Israel na'ab la siilima nwa:2 Siilima nwa ye li pa'al nɛ nidib ya'am ka sa'ali ba,
ka kɛ ka ba gban'e ya'am pian'ad gbin.
3 Li na sʋŋ nidib ka ba di'e sa'alʋg ka keŋ tuonnɛ
tʋm linɛ nar ka dɔl suor;
4 Siilim bama na kɛ ka Azi'iyɛ'og baŋ ya'am,
ka pa'al dasam nɛ pu'asada ka ba baŋ ya'am suoya, nɛ linɛ mɔr sʋŋir.
5 Kɛl ka ya'am dim kɛlis ka paam baŋiri paas.
Li na sʋŋ banɛ gban'e li gbin la ba tʋʋma ni.
6 Li na kɛ ka nidib baŋ siilima nɛ sɔlima,
ka baŋ ya'am dim pian'ad nɛ bʋgʋlʋm-bʋgʋlʋm gbin.
7 Zugsɔb la zɔtim an baŋir pin'ilʋg
amaa zɔn nɛ'ɛsidnɛ ya'am nɛ sa'alʋg.
Sa'alʋg linɛ na tisif ya'amlɛog ka fʋ bɔ ya'am
8 M biiga, wʋmi fʋ ba' sa'alʋg,
ka da zan'asi fʋ maa na pa'alif si'el la.
9 Ka li na an vɛnlim bɛɛ fʋ zugin,
ka an zɔnti fʋ niŋgɔɔnrin.
10 M biiga, tʋʋmbɛ'ɛd dim ya'a pan'asidif,
fʋn da kɛlisi ba pian'adɛ.
11 Ba ya'a yɛl ye, “Kem na dɔlli ti;
kɛl ka ti su'a kʋ sɔ',
kɛl ka ti su'a suor kpikpɛŋi kʋ nid zaalim-zaalim;
12 kɛlli ka ti vɔli ba vʋt wʋʋ yaʋg nɛ,
ka vɔli ba mummi wʋʋ banɛ sig bʋmbɔkin nɛ;
13 ka ti na nyɛ la'asʋma nɛ li buudi
ka fan' la'adi pɛ'ɛli ti ya';
14 kem na la'as nɛ ti ka ti pʋdig tinamɛ faaɛn si'el la.”
15 M biiga, ba ya'a yɛtif ala fʋn da dɔlli ba keŋɛ,
da nɔki fʋ nɔbiri dɔlli ba suor la;
16 bɔzugɔ ba nɔba zɔti ken bɛ'ɛd zin'ig,
ba zɔti tɔ'ɔtɔ mɔɔd ye ba kʋ nid.
17 Li pʋ dɔl suor nɛ fʋn na ya'ae sʋlʋg la nɔɔr
ka niis la wʋsa gɔsida!
18 Nimbama su'anɛ gur ye ba kʋʋ ba mɛŋ;
ba mɛŋ nyɔvʋr ka ba na yis!
19 Ala ka li aɛn tis onɛ wʋsa kʋʋd ye o paam mɔrim;
o ba'asʋg anɛ kum.
Banɛ zan'as ya'am la sa'alʋg
20 Ya'am nwɛnɛ pu'a kanɛ bɛ suoraugʋn buon,
o dʋ'ʋs o kʋkɔri buon nidibi bɛ zin'isi'a wʋsa;
21 nidibi galis zin'isi'a wʋsa maan tʋkpiidʋg, o bɛɛ ani,
ka kaasidi buon tempʋʋg la za'anɔya ni
ka yɛt ye,
22 “Yanam banɛ an Azi'iyɛ'og dima,
bɔ ka ya nan kpɛn bɛ zi'iliminɛ?
Bɔ ka nintʋ'ʋsnam nan kpɛn nɔŋ nintʋ'ʋsim,
ka zɔn la mɛ kis baŋirɛ?
23 Ya ya'a siakini m sa'alʋg,
m naan pɛligini m pʋʋgi tisi ya
ka kɛ ka ya baŋim tɛn'ɛsa.
24 Yanamɛ sadigim zan'asi m buolʋg,
ka m tiɛn m nu'ug ka sɔ' pʋ kɛligɛ,
25 yanamɛ zan'asi m sa'alʋg
ka m tansi ya ka ya pʋ wʋm la,
26 ala ka tɔɔg ya'a ti paae ya, m mɛ na la'adi ya,
dabiem ya'a ti kpɛn' ya m na maali ya siaa.
27 Li ya'a ti paae ya wʋʋ sisi'em nɛ;
tɔɔg ya'a ti mɔri ya keŋ wʋʋ sisi'epiliŋ nɛ
ka yɛla nɛ sʋnsa'aŋ paae ya, m ba'a kae.
28 Ani ka ba na buonim amaa m kʋ siakɛ;
ba na ieedim, amaa ba kʋ nyɛɛ ma.
29 Ban kis baŋir
ka pʋ gaŋ Zugsɔb zɔtim la zug,
30 ban zan'asi m sa'alʋg
ka m tansi ba ka ba pʋ wʋm la,
31 ala ka ban bʋd si'el la ka ba na bʋn
ban gban'e si'el la li na bi'igi ba.
32 Azi'iyɛ'og dim kalinka'alim la na kʋʋ ba
zɔn ya'a ti ye nɛ' ka' yɛllɛ, linɛ na san'ami ba;
33 amaa onɛ wʋsa kɛlis mam pian'ad na bɛ nɛ laafi
ka kʋ zɔt dabiem nɛ yɛlbɛ'ɛdɛ.”