Zun'or yʋʋm
40
1 M bʋgʋli m sʋʋnri gu'usid Zugsɔb laka o fɛndig na ka wʋmi m kaasig.
2 O vɛ'ɛgimi yis bʋmbɔk bɛ'ɛd la pʋʋgin,
zin'ikanɛ an bian'ar ka bu'ad la;
o nɔkimi zi'el tampiing zug
ka tisim zin'isʋŋ ye m zi'en.
3 O pa'alim yʋʋm paal ye m yʋ'ʋm,
yʋʋm kanɛ dʋ'ʋsidi ti Wina'am la.
Nidib bɛdegʋ na nyɛ ka zɔ dabiem
ka tis Zugsɔb la sida.
4 Yɛlsʋm bɛ nɛ nimbanɛ
ti'e Zugsɔb la nɛ ba sʋʋnr wʋsa
ka pʋ gɔsid banɛ dʋ'ʋsidi ba mɛŋ
nɛ banɛ fɛndigi pʋ'ʋsid wina banɛ ka' sida la.
5 O m Zugsɔb nɛ m Wina'am,
nyalima banɛ ka fʋ maal la zu'oya.
Fʋn gban'e ti yɛla si'em la
sɔ' kʋ nyaŋi kaali pa'alɛ;
li ya'a an ye m pian' li yɛla,
li zu'onɛ galis ka m kʋ nyaŋi kaalɛ.
6 Fʋ pʋ bɔɔd bʋnkɔnbid nɛ zʋʋd malimaa,
amaa fʋ yɔ'ɔgi m tʋba ye m kɛlis.
Nyu'or maan nɛ tʋʋmbɛ'ɛd maan
ka' linɛ ka fʋ bɔɔda.
7 Ani ka m yɛl ye, “Manɛ nwa, m kena;
li pʋn sɔbi m yɛla gbauŋʋn la.
8 O Wina'am, m bɔɔd ye m tʋmi fʋ bɔɔdim;
fʋ wada la bɛɛ m sʋʋnrin.”
9 M mɔɔl pʋpielim yɛla fʋ nidib la la'asʋg zin'igin,
m pʋ gban'e m nɔɔr
wʋʋ fʋn pʋm mi' si'em la, m Zugsɔba.
10 M pʋ su'a fʋ pʋpielim la m sʋnfʋnɛ;
m pian'adi fʋ sida nɛ fʋ pʋpielim la yɛla.
M pʋ su'a fʋ nɔŋilim nɛ fʋ sida la
nidib la la'asʋg sʋʋginɛ.
11 Da yisi fʋ nimbaanlzɔɔr la m san'anɛ, O m Zugsɔbaa;
kɛl ka fʋ nɔŋilim nɛ fʋ sida la gurim.
Sʋŋir sɔsʋg
(Yʋm 70)
12 Yɛla banɛ giligim la pʋ mɔr kallɛ,
m tʋʋmbɛ'ɛd la nyaŋim nɛ
ka m pʋ lɛn nyɛta.
Ba zu'oe gati m zuobid kal
ka m ya'am ianki bɔdig sɔee.
13 M Zugsɔba, dim suguru ka faanm;
m Zugsɔba, kem tɔ'ɔtɔ na sʋŋim.
14 Banɛ ieedim ye ba kʋʋm la,
kɛl ka ba ya'am fɛndig ka ba di nyan.
Banɛ wʋsa bɔɔdi m san'auŋ la
na fɛndigi lɛb nɛ nyan.
15 Kɛl ka nyan di banɛ la'ad mam
ye, “Hahaa, hahaa la!”
16 Amaa banɛ wʋsa ieedif la sʋnf na malis
ka ba na mɔr sumalisim nɛf;
kɛl ka banɛ nɔŋi fʋ faangir la yɛt saŋa wʋsa ye,
“Zugsɔb la yʋ'ʋr na nyɛ zun'or!”
17 La'am nɛ wala m anɛ nɔŋdaan ka an fara sɔb;
Zugsɔb la na tɛn'ɛsi m yɛla.
Fʋnɛ aan m sʋŋid nɛ onɛ faandim;
O m Wina'am, da yuugɛ.