Onɛ bɛ namisʋgʋn sɔsid tʋʋmbɛ'ɛd suguru
39
1 M yɛl ye, “M na gu'usid nɛ m suoya laka gban'e m zilim ka kʋ tʋm tʋʋmbɛ'ɛdɛ;
nimbɛ'ɛdnam la ya'a bɛɛ m san'an,
m na gban'e m nɔɔr.”
2 Amaa man sin ka an baanlimm
ka pʋ yɛt si'el linɛ an sʋm la,
m sʋnsa'aŋ la maligim paasidnɛ.
3 M susʋnf tʋligidnɛ,
ka m ya'a tɛn'ɛsid li la'aŋid nɛ bugum;
ka m gʋ'ʋŋ ka yɛl ye,
4 O m Zugsɔba, pa'alimim m nyɔvʋr bɛn,
kɛl ka m baŋi m dabisa kal;
kɛl ka m baŋi m yʋma ken tɔ'ɔtɔ si'em.
5 Fʋ maali m nyɔvʋr ka li anɛ giŋa;
m nyɔvʋr bɛllim anɛ zaalim fʋ san'an.
Sɔ' wʋsa nyɔvʋr ka' si'el si'eli fʋ san'anɛ.
6 Ninsaal nwɛnɛ ma'asim nɛ ken ka tulisid:
o zɔtnɛ giilim zaalim-zaalim;
o la'asid kpan'am digin
ka zi' onɛ na ti dii o faarɛ.
7 “Amaa nannanna, Zugsɔbaa, bɔ ka m ieeda?
M ti'ir bɛ nɛ fʋ san'an.
8 Faanmim tʋʋmbɛ'ɛd pʋʋgin;
da kɛ ka zɔn la la' ma.
9 M na an baanlimm ka kʋ pian'ada,
bɔzugɔ li anɛ fʋnɛ tʋm nɛ'ɛŋa.”
10 Da lɛn namisim ya'asɛ;
ka m gɛnnɛ fʋ nu'ug nwɛ'ɛd.
11 Fʋ zɛrigid ka sa'an nidibi ba tʋʋmbɛ'ɛd yɛla;
ka san'amid linɛ ka ba mɔr la wʋʋ muak nɛ,
ninsaal wʋsa nwɛnɛ pɛbisim nɛ.
12 “O Zugsɔba, wʋmmi m sɔsʋg,
kɛlisimi m kaasig ka sʋŋim;
Da li' fʋ tʋba nɛ m kukuma laa.
Bɔzugɔ m bɛ nɛ fʋ san'an wʋʋ saan nɛ,
m anɛ suoken wʋʋ m yaanamɛ da an si'em la.
13 Fɛndigimi fʋ nindaa m san'an,
ka kɛ ka m nyɛ sumalisim bi'ela ya'as,
ka m kum saŋa nyaan paae
ka m gaad ka kʋ lɛm bɛɛ.”