Onɛ namisid winsɔsʋg
38
1 O Zugsɔba, fʋ sʋnf ya'a ti duoe fʋn da zɛrigimbɛɛ kɛ ka m nyɛ namisʋgɔ.
2 Bɔzugɔ fʋ piema la kʋnsim,
ka fʋ paŋ nwɛ'ɛmi digil teŋin.
3 Fʋ sumpɛɛn la zug ka m niŋgbina pʋ mɔr laafii;
m tʋʋmbɛ'ɛd la kɛnɛ ka m kɔnba zabid.
4 M tʋʋmbɛ'ɛd la nyaŋim nɛ
nwɛnɛ ziid kanɛ tɛbis hali ka m kʋ nyaŋi zii.
5 M fɛn'ɛd la yalig nɛ ka nyuusid
ka li anɛ m zɔlim tʋʋmbɛ'ɛd la zug.
6 Ba lɔɔm nɛ digil teŋin;
dabisir la wʋsa ka m ken ka kum.
7 M nya'aŋ wʋsa tʋlig nɛ zabid;
ka laafi ka' m niŋgbina la nii.
8 M gɛnnɛ tadig hali; ka m sʋʋnr san'am,
ka m niŋgbina zabir kɛ ka m ʋʋnsid.
9 O Zugsɔbaa, fʋ mi' man bɔɔd si'el wʋsa
m kaasig la pʋ su'a fʋ san'anɛ.
10 M ya'am ian'ad, ka m paŋ naae;
hali m nini pʋ lɛn nyɛta.
11 M sapu'ad la zug, m zuanam nɛ m dɔllim taas luakidimnɛ;
m kpi'es pʋ lɛn li'ennɛ ma.
12 Banɛ mɔɔd ye ba kʋʋm la bɛndim nɛ baans,
ka banɛ pʋ bɔɔdi m yɛla la mɔɔdi m san'auŋ;
dabisir la wʋsa ba gban'adi ziri gban'ar.
13 M nwɛnɛ tʋbkpida nɛ, ka pʋ wʋmma,
ka nwɛnɛ gik nɛ, ka kʋ nyaŋi pian';
14 M yʋ'ʋn nwɛnɛ ninkanɛ pʋ wʋmma,
ka o nɔɔr kʋ nyaŋi ya'ae lɛbis pian'adɛ.
15 M gu'usidif nɛ, O Zugsɔbaa;
fʋnɛ na lɛbisi tisim, O Zugsɔb onɛ aan m Wina'am.
16 Man yɛl ye, “Da kɛ ka m dataas sʋnf ma'ae
bɛɛ ba dʋ'ʋsi ba mɛŋ man tu'ug la zugɔ.”
17 Bɔzugɔ m bɔɔdi liig,
ka m niŋgbina zabir la bɛ saŋa wʋsa.
18 M viigi m tʋʋmbɛ'ɛd;
m tʋʋmbɛ'ɛd la daamidim nɛ.
19 M dataas la bɛdegʋ mɔr laafi nɛ paŋ;
banɛ kisim zaalim-zaalim la zu'oya.
20 Banɛ ka m maali ba sʋm la lɛbisidimnɛ bɛ'ɛd,
m ya'a tʋm linɛ dɔl suor ba pian'adi m yɛla bɛ'ɛd.
21 O Zugsɔba, da basi ma;
da lal nɛ ma, O Wina'am.
22 Kem tɔ'ɔtɔ na sʋŋim
O m Zugsɔb nɛ m Faangida.