Bugusim dim nɛ pʋpielnam yɛla
37
1 Da kɛ ka fʋ sʋnf duoe nɛ banɛ tʋm bɛ'ɛd la yɛlabɛɛ fʋ mɔr fufum nɛ bugusim dim la;
2 ba na sʋʋg wʋʋ mɔɔd nɛ,
ka nwɛnɛ mɔma'asa kʋdig nɛ.
3 Tisim Zugsɔb la sida ka tʋm linɛ an sʋm;
bɛ teŋin la ka nyɛ li malisim.
4 Kɛl ka fʋ ya'amlɛog bɛ Zugsɔb la ni;
ka o na tisi fʋ, fʋ ya'am bɔɔd si'el.
5 Pɛsigimi fʋ mɛŋi tis Zugsɔb la;
tisim o sida ka o na tʋm nɛ'ɛŋa:
6 o na kɛ ka fʋ pʋpielim la nie wʋʋ bɛogʋ nied nɛ,
ka fʋ yɛlsida la na nwɛnɛ nintaŋ nɛ.
7 An baanlimm Zugsɔb la tuon ka gu'usid o;
nidib bɛllim ya'a an sʋm tisi ba,
bɛɛ ba ya'a gban'ad gban'abɛ'ɛdɛ,
fʋn da kɛ ka li daami fɔ.
8 Da kɛ ka fʋ sʋnf san'am bɛɛ pɛligɛ;
ka tʋʋmbɛ'ɛd dɔlli sumpɛɛn nya'aŋ.
9 Ba na kʋ tʋʋmbɛ'ɛd dim bɛɛ ba kadi ba yis,
amaa banɛ ti'iri bɛ Zugsɔb san'an la na sʋ'ʋg teŋ la.
10 Li kʋ yuugɛ ka bugusim dim la kʋ lɛm bɛɛ;
hali fʋ na ieedi ba ka kʋ nyɛɛ ba.
11 Amaa banɛ an baanlimm la na sʋ'ʋg teŋ la
ka na mɔr sumbʋgʋsʋm.
12 Bugusim dim la gban'ad bɛ'ɛd pʋpielim dim yɛla
ka ga'ad nyina ba yɛla;
13 amaa Zugsɔb la la'adi ba nɛ,
bɔzugɔ o mi' ye ba dabisir kenna.
14 Bugusim dim la fuoe sʋ'ʋg
ka gʋd tiraug
ye ba kʋ nɔŋ nɛ fara dim,
nɛ banɛ bɛllim dɔl suor la.
15 Amaa ba zaba sʋ'ʋs la na lɛbi kʋnsi ba mɛŋ susʋnya,
ka ba tiraad la na kɔ'.
16 Pʋpielim sɔbi mɔr si'el bi'ela la an sʋm
gat bugusim dimi mɔr si'el bɛdegʋ la;
17 bɔzugɔ bugusim dim la paŋ na naae,
amaa Zugsɔb la na ti'ed pʋpielim dim.
18 Zugsɔb la mi' pʋpielim dim dabisa,
ka ba na di faar saŋa linɛ ka' bɛnnɛ.
19 Yɛlpakir saŋa ba kʋ nyaŋi baa;
ka ba na dii tig kɔ'ɔm saŋa.
20 Amaa bugusim dim la na kpi.
Zugsɔb dataas la vɛnlim nwɛnɛ mɔɔd puum
ba na bɔdig wʋʋ nyɔ'ɔs nɛ.
21 Nimbɛ'ɛdnam la ya'a pɛ'ɛŋ ba pʋ yɔɔda,
amaa pʋpielim dim la on tisid piini.
22 Banɛ ka Zugsɔb niŋ bareka la na sʋ'ʋg teŋ la,
amaa banɛ ka o pɔ nɔɔri tisi ba la na kpi.
23 Sɔ' bɛllim ya'a malis Zugsɔb la,
o na kɛ ka o ba' nya'a sʋ'ʋŋa;
24 baa o ya'a tu'ug, o kʋ lii,
bɔzugɔ Zugsɔb la na mɔr o nɛ o nu'us.
25 M da anɛ dasaŋ ka nannanna m yʋ'ʋn kʋdig nɛ,
la'am nɛ wala m nam pʋ nyɛ ka Zugsɔb la bas pʋpielim dim la,
bɛɛ ba biis sɔsid diibɔ.
26 Ba piinid ka pɛmisid nidib saŋa wʋsa;
ba biis na paam bareka hali.
27 Fɛndigim yi bɛ'ɛdin ka tʋm linɛ an sʋm;
ka fʋ na bɛ teŋin la saŋa wʋsa.
28 Bɔzugɔ Zugsɔb la nɔŋ sida dim
ka kʋ basi ba baa bi'elaa.
29 Pʋpielim dim na sʋ'ʋg teŋ la
ka bɛɛ li ni saŋa linɛ ka' naarɛ.
30 Pʋpielim sɔb pian'ad nɛ ya'am
ka pian'akanɛ yit o nɔɔrin na an sida.
31 O Wina'am la wada bɛ nɛ o sʋnfʋn;
ka o nɔbir mɛ pʋ sadigida.
32 Nimbɛ'ɛdnam la dignɛ gur pʋpielim dimi
mɔɔd ye ba kʋʋ ba;
33 amaa Zugsɔb la kʋ tisi ba suorɛ,
bɛɛ o kɛ ka ba kʋʋsi ba bɛ'ɛd antu'a zin'iginɛ.
34 Gu'usim Zugsɔb la
ka dɔl o suor.
O na dʋ'ʋsif ka kɛ ka fʋ sʋ'oe teŋ la;
nimbɛ'ɛdnam la na kpii naae ka fʋ nini nyɛ.
35 M nini nyɛ nimbɛ'og kanɛ zugʋ kpi'em
ka si'el wʋsa an sʋm tis o
wʋʋ tikanɛ ka ba sɛ kʋ'ʋlʋm zin'ig,
36 amaa li pʋ yuugɛ ka m gaadi o zin'igin la
ka gɔs ka o lɛn kae;
la'am nɛ man ieed o nɛ nimmua la
m nini pʋ nyɛɛ o.
37 Kpansim banɛ ka' gba'ar nɛ pʋpielim dim la kii gɔs;
ba mɔr sumalisim bɛog sa.
38 Amaa tʋʋmbɛ'ɛd dim wʋsa na kpi;
nimbɛ'ɛdnam la pʋ mɔr bɛogɔ.
39 Pʋpielim dim faangir yit nɛ Zugsɔb la san'an na;
yɛl ya'a ti paae ba on onɛ aan ba kpi'euŋ sɔb la na guri ba.
40 Zugsɔb la guri ba ka faandi ba;
o faandi ba nimbɛ'ɛdnam la nu'usin,
bɔzugɔ o san'an ka ba zɔti su'ad.