Ninsaal bugusim yɛla
36
1 Tʋʋmbɛ'ɛd nya'amid nimbɛ'ɛd sɔb tʋba ni.O pʋ zɔt Wina'am ka na gu'usɛ.
2 On dʋ'ʋs o mɛŋ la zugʋ
kɛt ka o pʋ baŋid ye o tʋm bɛ'ɛdɛ
bɛɛ o ki'is o tʋʋmbɛ'ɛd yɛla.
3 O nɔɔr pian'ad anɛ bɛ'ɛd nɛ ziri;
o zan'as nɛ on na iee ya'am ka tʋm linɛ an sʋm.
4 Hali o dig zin'igin o la'am gban'adi bɛ'ɛd;
o zaŋ o pʋtɛnda lɔ nɛ suogɔnlima
ka pʋ zan'asid linɛ mɔr gba'arɛ.
Zugsɔb la nɔŋilim yɛla
5 Zugsɔba, fʋ nɔŋilim la paae agɔla
ka fʋ yɛlsida la paae saŋgbana ni.
6 Fʋ pʋpielim la nwɛnɛ zuotitada nɛ,
ka fʋ sida la zulim hali.
O Zugsɔbaa, fʋnɛ gur ninsaalib nɛ bʋnkɔnbid wʋsa.
7 Fʋ nɔŋilim la zu'onɛ ka ligidi kʋ nyaŋi da' lii,
nidib wʋsa su'adi ba mɛŋ nɛ fʋ san'an.
8 Diib linɛ yiti fʋ yin na la ka ba dit;
fʋ maal sʋm tisi ba
ka li nwɛnɛ ku'om linɛ pʋbid ka ba nuud.
9 Fʋ san'an ka vʋm bɛ;
Li anɛ fʋ nɛɛsim la zug ka ti nyɛt.
10 Kɛl ka fʋ nɔŋilim la kpɛn bɛ nɛ banɛ mi' la,
ka fʋ pʋpielim la mɛ bɛ nɛ banɛ pʋ mɔr gba'ar la.
11 Da kɛ ka nyɛɛsim dim la li'eli m san'an naa,
bɛɛ nimbɛ'ɛdnam la nyaŋi kadi ma.
12 Gɔsim tʋʋmbɛ'ɛd dim la li si'em
ba liya ka kʋ nyaŋi duoe!